ប្រធានក្លឹប PHNOM PENH MMA បង្ហាញជំនឿជាក់លើ ខុន ស៊ីចាន់ មុនប្រកួតនៅ ONE

2019-02-19 04:01:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Alan Mccune ប្រធានក្លឹបយុទ្ធគនចម្រុះ PHNOM PENH MMA ជឿជាក់ថា កីឡាករ ខុន ស៊ីចាន់ នឹងអាចទទួលបានជ័យជម្នះ នៅក្នុងការប្រកួតនៅស្ថាប័ន ONE Championship ប្រទេសសិង្ហបុរី នាថ្ងៃទី២២ ខែកុម្ភៈខាងមុន។

ខុន ស៊ីចាន់ ក្នុងប្រកួតចុងក្រោយ កាលពីឆ្នាំ២០១៨ (រូបភាព៖ ONE Championship)

បុរសជនជាតិស្កុតឡែនរូបនេះ បាននិយាយថា ខុន ស៊ីចាន់ វាយស៊ូ ហើយចាប់ផ្ដើមវាយតាំងពីឮសំឡេងជួង ដល់ចប់ទឹកតែម្តង។ លោកបន្ថែមថា ស៊ីចាន់ ហាត់ឆាប់ចេះ និងចាប់បានលឿន ពោលគឺបង្ហាញតិចនិកត្រឹមក្រោម៥នាទីឲ្យមើល គឺស៊ីចាន់ ចាប់បានយ៉ាងតិចក៏ ៩០ភាគរយដែរ។

សូមបញ្ជាក់ថា ខុន ស៊ីចាន់ នឹងត្រូវប៉ះកីឡាករឥណ្ឌូណេស៊ី Rudy Agustian នៅក្នុងកម្មវិធី ONE: CALL TO GREATNESS នៅប្រទេសសិង្ហបុរី នាថ្ងៃទី២២ ខែកុម្ភៈ ឆ្នាំ២០១៩។ លោក Alan Mccune ដែលធ្លាប់បង្ហាត់ ខុន ស៊ីចាន់ តាំងពីក្នុងកម្មវិធី Khmer Warrior Challenge (KWC) ឆ្នាំ២០១៣ មកនោះ ជាអ្នកដឹកនាំខុន ស៊ីចាន់ ចេញទៅប្រកួតនេះ។

លោក Alan Mccune (ស្ដាំ) និងខុន ស៊ីចាន់ (រូបភាពហ្វេសប៊ុកលោក Alan Mccune)

ស៊ីចាន់ ធ្លាប់ប្រកួត MMA ៥ដង (ឈ្នះ ៣ដង ចាញ់ ២ដង) ប៉ុន្តែទើបប្រឡូកនៅ ONE Championship តែ២ដងប៉ុណ្ណោះ (ឈ្នះ ១ ចាញ់ ១)។ ប្រកួតចុងក្រោយស៊ីចាន់ ឈ្នះកីឡាករឥណ្ឌូណេស៊ី Riski Umar ដោយពិន្ទុ កាលពីខែមីនា ឆ្នាំ២០១៨។ ចំណែក Rudy Agustian ទើបប្រកួតនៅ ONE ២ដងដែរ ប៉ុន្តែឈ្នះទាំង២ ដង។ ប្រកួតចុងក្រោយកាលពីខែវិច្ឆិកា ឆ្នាំ២០១៨ កីឡាកររូបនេះ ឈ្នះកីឡាករបង់ក្លាដែស Asraful Islam ដោយពិន្ទុ។

ទស្សនាវីដេអូ ខុន ស៊ីចាន់ យកឈ្នះ Riski Umar កាលពីខែមីនា ឆ្នាំ២០១៨ ខាងក្រោមនេះ៖

ក្រៅពីខុន ស៊ីចាន់ ក៏នៅមានកីឡាករគុនខ្មែរមួយរូបទៀតដែរ ដែលត្រូវប្រកួតក្នុងកម្មវិធី ONE: CALL TO GREATNESS គឺកីឡាករ គង់ សំបូរ។ កីឡាករមកពីក្លឹប Kingdom Fight Gym រូបនេះ នឹងប៉ះកីឡាករចិន Zhang Chenglong ក្នុងវិញ្ញាសាប្រដាល់សេរី៕