កសិករដាំស្វាយចន្ទី ស្វែងរកអន្តរាគមន៍ រឿងឈ្មួញទម្លាក់ថ្លៃ
- 2019-02-13 06:31:43
- ចំនួនមតិ 0 | ចំនួនចែករំលែក 0
កសិករដាំស្វាយចន្ទី ស្វែងរកអន្តរាគមន៍ រឿងឈ្មួញទម្លាក់ថ្លៃ
ចន្លោះមិនឃើញ
ប្រជាកសិករដាំស្វាយចន្ទី នៅខេត្តស្ទឹងត្រែង ស្វែងរកកិច្ចអន្តរាគមន៍ពីស្ថាប័នពាក់ព័ន្ធទៅលើទីផ្សារ គ្រាប់ស្វាយចន្ទី ព្រោះកសិផលប្រមូលផលបាន នៅឆ្នាំ២០១៩នេះ ត្រូវឈ្មួញទម្លាក់ថ្លៃ ធ្វើឲ្យពួកគាត់បាត់បង់ប្រាក់ចំណូលស្ទើរទាំងស្រុង។ នេះបើយោងតាមក្រសួងព័ត៌មាន ចុះផ្សាយ នៅថ្ងៃទី១៣ ខែកុម្ភៈ ឆ្នាំ២០១៩។
នៅរដូវប្រមូលផលគ្រាប់ស្វាយចន្ទី កាលពីថ្ងៃទី១១ ខែកុម្ភៈ ឆ្នាំ២០១៩ លោក សាន វិបុល កសិករដាំស្វាយចន្ទី នៅក្រុងស្ទឹងត្រែងបានបញ្ជាក់ថា ផលដំណាំផ្នែកឧស្សាហកម្មមួយនេះ ឈ្មួញចេះតែទិញបង្អាប់ថ្លៃ ធ្វើឲ្យកសិករខាតបង់ប្រាក់ទូទាត់ជាមួយការចំណាយមិនតុល្យភាពនឹងគ្នាឡើយ។
លោកបញ្ជាក់ថា កាលពីដើមខែមករា ផ្លែស្វាយចន្ទីលក់បានជាង ៧ពាន់រៀលក្នុងមួយគីឡូក្រាម ចំណែកគ្រាប់ហាលស្ងួត បានរហូតដល់ទៅ ៨០០០រៀល តែបច្ចុប្បន្នឈ្មួញបានទម្លាក់ថ្លៃ ចំណែកស្ថាប័នជំនាញមិនទាន់មានការចាប់អារម្មណ៍រឿងនេះទេ។
លោក សុ ផៃ មេការដេប៉ូវៀតណាមទទួលទិញគ្រាប់ស្វាយចន្ទីប្រចាំនៅក្រុងស្ទឹងត្រែង បានអះអាងថា ការទទួលទិញ គ្រាប់ស្វាយចន្ទី ក្រុមហ៊ុនបានបែងចែកជាបីប្រភេទ គឺគ្រាប់ លេខ១ -លេខ២ -និងលេខ៣ ព្រោះកាលឆ្នាំកន្លងមក ប្រជាកសិករខ្លះ ប្រមូលផលគ្រាប់ស្វាយចន្ទី នៅខ្ចីទុកមិនបានយូរបណ្តាលឲ្យខូចគុណភាព ទម្រាំដឹកចេញទៅរោងចក្រកែច្នៃ។
លោកទទួលស្គាល់ថា បច្ចុប្បន្នក្រុមហ៊ុនឲ្យតម្លៃទៅលើកត្តាពូជដូចជា ពូជក្រុងស្រុកទិញតម្លៃជាង ៥០០០រៀងក្នុងមួយគីឡូក្រាម ចំណែកពូជ M២៣ មានតម្លៃខ្ពស់ជាង ព្រោះវាមានគុណភាពល្អ និងងាយស្រួលនាំយកទៅលក់បន្ត។ ស្វាយប្រភេទធម្មតា ហៅថា ស្វាយខ្មែរតម្លៃ សើម ៥៥០០រៀល ហើយតម្លៃស្ងួតទិញ ៦០០០រៀល ហើយតម្លៃប្រភេទ M២៣ ដែលហៅថាគ្រាប់ពូជ តម្លៃក្នុងមួយគីឡូក្រាម ទិញ ៦០០០រៀល បើស្ងួត ៦៨០០រៀល។
លោក អ៊ុន សុខា ប្រធានមន្ទីរពាណិជ្ជកម្មខេត្តស្ទឹងត្រែងបានបញ្ជាក់ថា បញ្ហានេះគួរតែកសិករ គិតពីគុណភាពផលិតផលខ្លះ ដើម្បីធ្វើឲ្យមានការប្រកួតប្រជែងទៅលើទីផ្សារ ជាពិសេសពេលដាំត្រូវជ្រើសរើសពូជល្អៗយកទៅដាំដុះ ដើម្បីទទួលបានផលមានគុណភាព លក់បានថ្លៃ។
លោកអះអាងថា ចំពោះផ្នែកទីផ្សារដែលកសិករស្នើសុំឲ្យជួយអន្តរាគមន៍នោះ មន្ទីរពាណិជ្ជកម្ម នឹងហៅម្ចាស់ក្រុមហ៊ុនដែលកំពុងបោះទីតាំងទិញ នៅក្នុងខេត្តស្ទឹងត្រែង មកធ្វើការពិគ្រោះយោបល់គ្នា ដើម្បីស្វែងរកដំណោះស្រាយរួមមួយ ធ្វើយ៉ាងណាឲ្យទីផ្សារនេះទទួលយកបានទាំងអស់គ្នា។
សូមបញ្ជាក់ថា ទីតាំងទិញផលស្វាយចន្ទី នៅក្នុងក្រុងស្ទឹងត្រែងបច្ចុប្បន្ន មានចំនួន ៣កន្លែង ក្នុងនោះមានក្រុមហ៊ុនវៀតណាម ២កន្លែង និងខ្មែរមួយកន្លែងដែលមានមុខព្រួញនាំចេញទៅប្រទេសវៀតណាមតែមួយប៉ុណ្ណោះ៕