Pub Street នឹងត្រូវកែប្រែមុខមាត់ ដោយបច្ចេកវិទ្យាថ្មីរបស់ជប៉ុន
- 2019-02-14 08:45:51
- ចំនួនមតិ 0 | ចំនួនចែករំលែក 0
Pub Street នឹងត្រូវកែប្រែមុខមាត់ ដោយបច្ចេកវិទ្យាថ្មីរបស់ជប៉ុន
ចន្លោះមិនឃើញ
ផ្លូវប្រសព្វតំបន់ Pub Street នឹងត្រូវបានរៀបជាបេតុងជ្រាបទឹក ដែលជាគម្រោងសាកល្បងដោយប្រើប្រាស់បច្ចេកវិទ្យាថ្មីរបស់ប្រទេសជប៉ុន ដើម្បីសាងសង់កម្រាល និងចិញ្ចើមផ្លូវក្នុងក្រុងសៀមរាប។ គម្រោងនេះ នឹងត្រូវបញ្ចប់ទាំងស្រុងនៅក្នុងខែមិថុនា ឆ្នាំ២០១៩។ នេះយោងតាមការចុះផ្សាយរបស់ក្រសួងព័ត៌មាន កាលពីថ្ងៃទី១៣ ខែកុម្ភៈ។
បន្ទាប់ពីបានជួបពិភាក្សាការងារជាមួយ លោក ទៀ សីហា អភិបាលខេត្តសៀមរាប កាលពីរសៀលថ្ងៃទី១២ ខែកុម្ភៈ ឆ្នាំ២០១៩ រួចមក នៅព្រឹកថ្ងៃទី១៣កុម្ភៈ ក្រុមហ៊ុន Omura Ceratec Co.,Ltd របស់ជប៉ុនបានចាប់ផ្តើមអនុវត្តគម្រោងសាកល្បងអំពី បច្ចេកវិទ្យាថ្មីសាងសង់កម្រាល និងចិញ្ចើមផ្លូវដោយបេតុងជ្រាបទឹក តាមបណ្តោយផ្លូវ ២ធ្នូ ប្រវែង ៩៣ម៉ែត្រ ពីចំណុចផ្លូវប្រសព្វ Pub Street ដល់មុខខ្លោងទ្វារមន្ទីរពេទ្យបង្អែកខេត្តសៀមរាប។
លោក Hiroya Kon អ្នកគ្រប់គ្រងទីផ្សារនៃក្រុមហ៊ុន Omura Ceratec Co.,Ltd បានបន្តថា គម្រោងសាកល្បងនេះមានគោលបំណងរួមចំណែកការពារទឹកជំនន់ ដក់លើផ្លូវ និងចិញ្ចើមផ្លូវក្នុងទីក្រុង ដោយប្រើប្រាស់កម្រាលដុំបេតុងជ្រាបទឹក (Permeable Interlocking Block Pavement) ជាបច្ចេកវិទ្យា និងស្តង់ដាជប៉ុន។
លោក គឹម ប៉ុណ្ណា ប្រធានមន្ទីរសាធារណការ និងដឹកជញ្ជូនខេត្តសៀមរាប មានប្រសាសន៍ថា នេះជាគម្រោងមួយថ្មី ដែលភាគីពាក់ព័ន្ធនឹងសិក្សាជាបន្តបន្ទាប់ទៀត ក្នុងការបែងចែកទ្រូងផ្លូវ ផ្លូវថ្មើរជើង និងចំណតយានយន្ត ដើម្បីឲ្យមានសណ្ដាប់ធ្នាប់ របៀបរៀបរយ ជួយកាត់បន្ថយនូវការកកស្ទះក្នុងទីប្រជុំជន។
លោកបន្តថា មន្ទីរបានលើកគម្រោងនេះកាលពីចុងឆ្នាំ២០១៦។ ហើយនៅខែមករា ឆ្នាំ២០១៧ ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុនJICAបានមកទំនាក់ទំនង និងសិក្សា ពីទីតាំង ក្រោមការសហការសម្របសម្រួលពីអាជ្ញាធរក្រុងសៀមរាប និងបានការគាំទ្រ ជំរុញបន្ថែម ពីក្រសួងសាធារណការនិងដឹកជញ្ជូន ដោយផ្តោតសំខាន់ទៅលើតំបន់ ក្នុងក្រុង ដែលមានភ្ញៀវទេសចរធ្វើដំណើរថ្មើរជើងច្រើន។
លោក ទៀ សីហា អភិបាលខេត្ត បានការគាំទ្រ និងចាត់ទុកគម្រោងនេះថា ពិតជា មានសារសំខាន់សម្រាប់តំបន់ក្នុងក្រុង ដែលអ្នកទេសចរឆ្លងកាត់ទៅមកច្រើន និងដើម្បីរក្សាបាននូវសុវត្ថិភាព សណ្តាប់ធ្នាប់សាធារណៈ ឲ្យស័ក្ដិសមជាទីក្រុងទេសចរណ៍ប្រវត្តិសាស្ត្ររបស់កម្ពុជា។
លោកអភិបាល បានជំរុញដល់មន្ត្រីជំនាញត្រូវបន្តសិក្សា និងពិនិត្យមើល ទីតាំងបែងចែកគន្លងផ្លូវសម្រាប់ថ្មើរជើង គន្លងផ្លូវសម្រាប់ជនពិកា ទីតាំងសម្រាប់ចត យានយន្តជាដើម៕