គង់ សំបូរ បង្ហាញអារម្មណ៍ពិត ពេលបានហោះពីសៀមរាប ទៅប្រកួតនៅ ONE Championship

2019-02-19 04:51:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករគុនខ្មែរ គង់ សំបូរ បានធ្វើដំណើរចាកចេញពីខេត្តសៀមរាបហើយ កាលពីថ្ងៃទី១៨ ខែកុម្ភៈម្សិលមិញនេះ ដើម្បីទៅប្រកួតលើកដំបូង នៅក្នុងសង្វៀនអន្តរជាតិ ONE Championship។ សំបូរ បញ្ជាក់ថា៖ "ខ្ញុំរំភើបចិត្ត រកពាក្យអ្វីមកនិយាយមិនចេញនោះទេ"។

គង់ សំបូរ (កណ្ដាល) និងគ្រូបង្វឹក ធ្វើដំណើរពីព្រលានយន្តហោះខេត្តសៀមរាប ទៅប្រទេសសិង្ហបុរី កាលពីថ្ងៃទី១៨ កុម្ភៈ (រូបភាព Kingdom Fight Gym)

គួរំលឹកថា ពេលបានដឹងខ្លួនថានឹងត្រូវប្រកួតនៅ ONE អ្នកប្រដាល់ប្រចាំក្លឹប Kingdom Fight Gym ក្នុងខេត្តសៀមរាបរូបនេះ បាននិយាយថា "ខ្ញុំរំភើប ដល់ថ្នាក់និយាយមិនចេញ។ ខ្ញុំចង់ប្រាប់ទៅកាន់អ្នកដែលសើចចំអកខ្ញុំ ថាពួកគេយល់ខុសហើយ។ ពួកគេថាខ្ញុំគ្មានថ្ងៃបានចេញទៅវ៉ៃនៅក្រៅប្រទេសនោះទេ ប៉ុន្តែពេលនេះក្ដីសុបិនរបស់ខ្ញុំក្លាយជាការពិតហើយ។ ពួកគេអស់អីនិយាយទៀតហើយ.."។

គង់ សំបូរ បន្តថា៖ "«ខ្ញុំមានមោទនភាព ដែលមានឱកាសបញ្ចេញសមត្ថភាពនៅ ONE Championship។ ខ្ញុំចង់បង្ហាញប្រាប់អន្តរជាតិថា ក្បាច់គុនខ្មែរនៅតែខ្លាំង មិនបានចុះខ្សោយឡើយ។ ខ្ញុំចង់ប្រាប់ទៅបងប្អូនខ្មែរគ្រប់រូបដែលរង់ចាំមើលការប្រកួតរបស់ខ្ញុំនៅ ONE ថាខ្ញុំនឹងប្រកួតឲ្យអស់ពីលទ្ធភាព និងមិនធ្វើឲ្យបងប្អូនបាក់ទឹកចិត្តលើរូបខ្ញុំឡើយ»។

កីឡាករវ័យ ២៣ឆ្នាំ បញ្ជាក់ថា៖ "ខ្ញុំបានហ្វឹកហាត់ត្រៀមជាង ១ខែមកហើយ។ ខ្ញុំរួចរាល់សម្រាប់ការប្រកួតដ៏ធំនេះហើយ"។

គង់ សំបូរ ហ្វឹកហាត់នៅក្លឹប Kingdom Fight Gym ខេត្តសៀមរាប

សូមបញ្ជាក់ថា គង់ សំបូរ នឹងត្រូវប្រកួតប្រដាល់សេរី ទល់នឹងកីឡាករចិន Zhang Chenglong ដែលមានរហស្សនាមថា ""Muay Thai Boy" ក្នុងព្រឹត្តិការណ៍ ONE: CALL TO GREATNESS ថ្ងៃទី២២ ខែកុម្ភៈ នៅប្រទេសសិង្ហបុរី។ គង់ សំបូរ មិនធ្លាប់ប្រឡូកក្នុងសង្វៀនអន្តរជាតិដ៏ធំដូច ONE នោះទេ ប៉ុន្តែកីឡាកររូបនេះ មានបទពិសោធន៍ច្រើនក្នុងសង្វៀនក្នុងស្រុក។ ចំណែកកីឡាករចិន Zhang Chenglong ធ្លាប់ប្រឡូកក្នុងសង្វៀនអន្តរជាតិជាច្រើន ជាពិសេសគឺនៅក្នុងសង្វៀន Glory។ កីឡាករនេះ មានប្រវត្តិប្រកួតឈ្នះ ៤៧ដង ចាញ់ ៨ដង និងស្មើ ម្ដង៕