សម្តេច ស ខេង៖ ការកែទម្រង់ការងារអត្តសញ្ញាណកម្ម កាន់តែស្មុគស្មាញទៅ
- 2019-02-18 04:23:56
- ចំនួនមតិ 0 | ចំនួនចែករំលែក 0
សម្តេច ស ខេង៖ ការកែទម្រង់ការងារអត្តសញ្ញាណកម្ម កាន់តែស្មុគស្មាញទៅ
ចន្លោះមិនឃើញ
សម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្គាល់ឃើញថា ពីដំណាក់កាលមួយ ទៅដំណាក់កាលមួយ ការកែទម្រង់ការងារអត្តសញ្ញាណកម្មកាន់តែស្មុគស្មាញទៅៗ ទាំងផ្នែកក្របខណ្ឌច្បាប់ ទាំងផ្នែកបច្ចេកវិទ្យាគមនាគមន៍ និងព័ត៌មាន។ ការថ្លែងនេះ ក្នុងពេលដែលសម្តេច ស ខេង បានអញ្ជើញដឹកនាំកិច្ចប្រជុំលើកទី៣ នៃគណៈកម្មាធិការជាតិដឹកនាំតម្រង់ទិសការងារអត្រានុកូលដ្ឋាន សិ្ថតិអត្រានុកូលដ្ឋាន និងអត្តសញ្ញាណកម្ម (គ.ជ.ដ.អ) នៅទីស្ដីការក្រសួងមហាផ្ទៃ នាព្រឹកថ្ងៃទី១៨ ខែកុម្ភៈ ឆ្នាំ២០១៩។
សម្តេចក្រឡាហោម បានចាត់ទុកថា ការកំណត់អត្តសញ្ញាណបុគ្គលឲ្យបានច្បាស់លាស់ គឺជាកិច្ចការស្នូលរបស់រាជរដ្ឋាភិបាល ដែលត្រូវខិតខំដោះស្រាយ ឲ្យស្របតាមស្ថានភាពជាក់ស្តែងរបស់កម្ពុជាផង និងកាតព្វកិច្ចជាអន្តរជាតិផង។ សម្តេចតែងតែផ្តល់អាទិភាពជាចម្បងលើកិច្ចខិតខំដោះស្រាយ និងជំរុញការងារអត្តសញ្ញាណកម្មនេះ ឲ្យវិវឌ្ឍទៅមុខ ស្របតាមផែនការយុទ្ធសាស្ត្រជាតិ ស្តីពីអត្តសញ្ញាណកម្ម ដែលរាជរដ្ឋាភិបាលបានអនុម័តរួច។
សូមបញ្ជាក់ថា កិច្ចប្រជុំនេះ ពិនិត្យទៅលើរបាយការណ៍ប្រចាំឆ្នាំ២០១៨ ស្តីពីវឌ្ឍនភាពនៃការអនុវត្តផែនការយុទ្ធសាស្ត្រជាតិស្តីពីអត្តសញ្ញាណកម្មឆ្នាំ២០១៧-២០២៦ និងពិនិត្យរបាយការណ៍សង្ខេបស្តីពីវឌ្ឍនភាព នៃការរៀបចំសេចក្តីព្រាងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម និងបញ្ហាផ្សេងៗ។
ទាក់ទងនឹងការរៀបចំសេចក្តីព្រាងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម សម្តេចក្រឡាហោម ស ខេង បានបញ្ជាក់ថា៖ «ទោះបីយើងបានសម្រេចឯកភាពគ្នាជាក្របខណ្ឌគោលការណ៍រួចហើយក៏ដោយ ប៉ុន្តែនៅពេលដែលយើងពិនិត្យមើលលើសេចក្តីព្រាងច្បាប់ យើងអាចនឹងចូលរួមយោបល់ដើម្បីកែសម្រួលបាន។ មួយវិញទៀត ការពិតទៅការងារនេះ គឺក្នុងន័យថា យើងកែទម្រង់ផង និងពង្រឹងប្រសិទ្ធភាពការងារផង ពុំមែនយើងធ្វើឡើងវិញទាំងស្រុងទេ។ ជាក់ស្តែងយើងអនុវត្តបានច្រើនមកហើយ គ្រាន់តែការងាររាយប៉ាយ បានន័យថា ចំណុចណាមិនល្អយើងត្រូវកែ ហើយចំណុចថ្មីខ្លះដែលថា យើងគួរចាំបាច់ត្រូវយកមកដាក់ យើងដាក់បញ្ចូលទៅ។ ការរៀបចំសេចក្តីព្រាងច្បាប់ធ្វើយ៉ាងណាកុំឲ្យផ្ទុយនឹងច្បាប់នានា ដែលមានជាធរមាន ពិសេសគឺកុំឲ្យផ្ទុយទៅនឹងក្របរខណ្ឌរដ្ឋប្បវេណី»។
ចំណែកលោកស្រី ចាន់ សុទ្ធាវី រដ្ឋលេខាធិការក្រសួងយុត្តិធម៌ បានថ្លែងថា បើគិតមើលទិដ្ឋភាព នៃការរៀបចំសេចក្តីព្រាងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្មនេះ វាជាបញ្ហាមួយ មានលក្ខណៈស្មុគស្មាញ ដោយសារវាមានទំនាក់ទំនងជិតស្និទ្ធទៅនឹងជីវភាពរស់នៅប្រចាំថ្ងៃរបស់ប្រជាពលរដ្ឋ។
លោកស្រីបន្តថា៖ «បញ្ហានេះដែរឃើញថា កន្លងមកពុំទាន់មានបទប្បញ្ញត្តិណាមួយរៀបចំឲ្យបានច្បាស់លាស់ស៊ីជម្រៅនៅឡើយទេ ដូច្នេះនៅក្នុងដំណើរការនៃការរៀបចំនេះ វាជាការប្រែប្រួល ជាការផ្លាស់ប្តូរថ្មី នៅក្នុងប្រទេសកម្ពុជាផងដែរ»៕