សិង្ហបុរី បង្ហាញនាវាមុជទឹកពិសេសរបស់ខ្លួន ជាលើកដំបូង
- 2019-02-20 03:10:07
- ចំនួនមតិ 0 | ចំនួនចែករំលែក 0
សិង្ហបុរី បង្ហាញនាវាមុជទឹកពិសេសរបស់ខ្លួន ជាលើកដំបូង
ចន្លោះមិនឃើញ
នាវាមុជទឹកថ្មី១គ្រឿងរបស់សិង្ហបុរី ត្រូវបានបង្ហាញជាផ្លូវការ នៅក្នុងពិធី នាក្រុង Kiel ប្រទេសអាល្លឺម៉ង់ កាលពីថ្ងៃទី១៨ ខែកុម្ភៈ ឆ្នាំ២០១៩។ នាវាមុជទឹក ប្រភេទ 218SG ដែលគេឲ្យឈ្មោះថា "Invincible" នេះ នឹងត្រូវដាក់ឲ្យដំណើរការដោយកងទ័ពជើងទឹកសិង្ហបុរី នៅក្នុងឆ្នាំ២០២១។
ថ្លែងប្រាប់អ្នកសារព័ត៌មានក្នុងពិធីសម្ពោធ លោក Ng Eng Hen រដ្ឋមន្ត្រីការពារជាតិសិង្ហបុរី បានប្រាប់ឲ្យដឹងថា នេះជាពេលវេលាដ៏ល្អ ដើម្បីរួមចំណែកក្នុងការដោះស្រាយបញ្ហាសន្តិសុខនៅជុំវិញប្រទេសសិង្ហបុរី។ នាវាដែលមានប្រវែង ៧០ម៉ែត្រនេះ នឹងត្រូវប្រើប្រាស់ជំនួសនាវាមុជទឹករបស់កងទ័ពជើងទឹកសិង្ហបុរី។ វាត្រូវបានផលិតឡើងសម្រាប់តែកងទ័ពជើងទឹកសិង្ហបុរីប៉ុណ្ណោះ។
លោករដ្ឋមន្ត្រីការពារជាតិសិង្ហបុរី បញ្ជាក់ថា ចិន ឥណ្ឌូណេស៊ី ថៃ ឥណ្ឌា និងកូរ៉េខាងត្បូង ក៏គ្រោងទិញនាវាមុជទឹកបន្ថែមទៀតផងដែរ ដូច្នេះវាជាពេលវេលាដ៏សក្ដិសមមួយសម្រាប់សិង្ហបុរី ក្នុងការពង្រឹងផ្នែកជើងទឹករបស់ខ្លួន។ លោកបន្តថា ទឹកប្រាក់ចំណាយលើផ្នែកការពារជាតិ បានកើនដល់ ៤៤៧ ពាន់លានដុល្លារ ក្នុងឆ្នាំ២០១៧ នៅទ្វីបអាស៊ី។
លក្ខណៈពិសេសរបស់នាវាខាងលើ អាចស្ថិតនៅក្នុងទឹកបានយូរជាងនាវាមុជទឹកបច្ចុប្បន្នរបស់កងទ័ពជើងទឹកសិង្ហបុរី និងបំពាក់ប្រព័ន្ធដែលអាចកំណត់ទីតាំងរបស់សត្រូវបានឆាប់រហ័សជាងមុន។
សូមជម្រាបថា ក្រោយពិធីខាងលើ នាវាឈ្មោះ Invincible នឹងត្រូវដាក់ឲ្យបើកសាកល្បង មុននឹងបញ្ជូនទៅកាន់ប្រទេសសិង្ហបុរី នៅក្នុងឆ្នាំ២០២១៕