អាមេរិក-ចិន ជ្រើសរើសកាលបរិច្ឆេទពន្លត់ភ្លើងសង្គ្រាមពាណិជ្ជកម្ម

2019-02-21 06:48:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ត្រីសហរដ្ឋអាមេរិក និង ចិន នឹងបើកកិច្ចប្រជុំមួយ ចាប់ពីថ្ងៃទី២១ ដល់ ២២ ខែកុម្ភៈ ឆ្នាំ២០១៩ នៅក្រុងវ៉ាស៊ីនតោន ដើម្បីឈានដល់កិច្ចព្រមព្រៀងមួយ ដើម្បីបញ្ចប់សង្គ្រាមពាណិជ្ជកម្ម ដែលបានអូសបន្លាយអស់រយៈពេលជាច្រើនខែកន្លងមក។ នេះបើយោងតាមការចុះផ្សាយរបស់ Reuters នៅថ្ងៃទី២១កុម្ភៈ។

សង្គ្រាមពាណិជ្ជកម្ម បានបង្កផលប៉ះពាល់ដល់ទំនិញរាប់ពាន់លានដុល្លារអាមេរិក ពន្យឺតកំណើនសេដ្ឋកិច្ចសកលលោក ផ្ដល់ឥទ្ធិពលអវិជ្ជមានដល់ខ្សែសង្វាក់ផ្គត់ផ្គង់ និងរំខានដល់រោងចក្រនានា។

ប្រភពដែលដកស្រង់សម្ដីពីមន្ត្រីពាក់ព័ន្ធនឹងជំនួបនេះឲ្យដឹងថា ភាគីទាំងសងខាង អាចនឹងចុះហត្ថលេខាលើកិច្ចព្រមព្រៀងមួយ នៅថ្ងៃទី១ ខែមីនា ឆ្នាំ២០១៩ បន្ទាប់ពីការចរចាកន្លងមក ផ្ដោតលើអនុស្សរណៈនៃការយោគយល់គ្នា ស្ដីពី ការផ្លាស់ប្ដូរបច្ចេកវិទ្យាដោយបង្ខំនិងចោរកម្មតាមប្រព័ន្ធអ៊ីនធឺណិត កម្មសិទ្ធិបញ្ញា សេវាកម្ម រូបិយវត្ថុ កសិកម្ម និង ពាណិជ្ជកម្មមិនជាប់របាំងពន្ធ។

សូមជម្រាបថា មន្ត្រីអាមេរិក និងចិន បានធ្វើការចរចាគ្នានៅក្រុងប៉េកាំង កាលពីសប្ដាហ៍មុន ដើម្បីគូសវាសពីកាតព្វកិច្ចរបស់ភាគីទាំងសងខាងនៅលើក្រដាស។

គួរបញ្ជាក់ថា សង្គ្រាមពាណិជ្ជកម្មរវាងសហរដ្ឋអាមេរិក និងចិន បានអូសបន្លាយអស់រយៈពេលហែល ៧ខែមកហើយ។ វាបានចាប់ផ្តើមកើតឡើងតាំងពីថ្ងៃទី៦ ខែកក្កដា ឆ្នាំ២០១៨មក ដែលពេលនោះអាមេរិក បានដំឡើងពន្ធនាំចូល ២៥% លើទំនិញរបស់ចិនជាង ៨០០មុខ គិតជាទឹកប្រាក់ប្រមាណ ៣៤ពាន់លានដុល្លារក្នុង១ឆ្នាំ។ ហើយចិនក៏បានចាត់វិធានការឆ្លើយតបភ្លាមៗ គឺបានដំឡើងពន្ធនាំចូល ២៥% លើទំនិញអាមេរិកវិញផងដែរ៕

ប្រភព៖ Channelnewsasia ប្រែសម្រួល៖ លាភ.