ADB នឹងបន្តជួយកម្ពុជាលើកសិកម្ម ថាមពល អប់រំ និងផែនការអភិវឌ្ឍន៍ទីក្រុង
- 2019-02-22 08:06:23
- ចំនួនមតិ 0 | ចំនួនចែករំលែក 0
ADB នឹងបន្តជួយកម្ពុជាលើកសិកម្ម ថាមពល អប់រំ និងផែនការអភិវឌ្ឍន៍ទីក្រុង
ចន្លោះមិនឃើញ
ក្រោមក្របខណ្ឌយុទ្ធសាស្រ្តភាពជាដៃគូសម្រាប់អភិវឌ្ឍន៍កម្ពុជាឆ្នាំ២០១៩-២០២៣ ធនាគារអភិវឌ្ឍន៍អាស៊ី (ADB) នឹងបន្តគាំទ្ររាជរដ្ឋាភិបាលលើកិច្ចអភិវឌ្ឍស្របតាមយុទ្ធសាស្រ្តចតុកោណដំណាក់កាលទី៤ និងផែនការយុទ្ធសាស្រ្តអភិវឌ្ឍន៍ជាតិ ២០១៩-២០២៣ ជាពិសេស គឺផ្តោតលើការវិនិយោគលើការបង្កើនទិន្នផលកសិកម្ម ការតភ្ជាប់ទីជនបទ ទៅកាន់ទីប្រជុំជន, ការផ្គត់ផ្គង់អគ្គិសនីដោយប្រើប្រាស់ថាមពលកកើតឡើងវិញ, ការរៀបចំផែនការអភិវឌ្ឍន៍ទីក្រុង, ការអភិវឌ្ឍវិស័យអប់រំកម្រិតទុតិយភូមិ, ការបណ្តុះបណ្តាលវិជ្ជាជីវៈ និងការធ្វើវិមជ្ឈការសេវាសាធារណៈ។
ការបញ្ជាក់ខាងលើនេះ ធ្វើឡើងដោយលោក Shivaji Kshatrapati នាយកប្រតិបត្តិរបស់ ADB ទទួលបន្ទុកប្រទេសអាហ្គានីស្ថាន, បង់ក្លាដេស, ប៊ូតាន់, ឥណ្ឌា, ឡាវ, តាជីគីស្ថាន, និងតួកមេនីស្ថាន ក្នុងជំនួបជាមួយលោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២០ ខែកុម្ភៈ ឆ្នាំ២០១៩។
លោក Shivaji Kshatrapati បន្ថែមថា ADB គាំទ្រដល់ដំណើរការអភិវឌ្ឍន៍វិស័យធនធានមនុស្សមនុស្សរបស់រាជរដ្ឋាភិបាល, ការអភិវឌ្ឍន៍វិស័យថាមពលដើម្បីកំណើនសេដ្ឋកិច្ចខ្ពស់, បង្កើនចំណេះដឹងផ្នែកអភិវឌ្ឍន៍វិស័យឧស្សាហកម្ម, ការរៀបចំហិរញ្ញវត្ថុសាធារណៈប្រកបដោយបរិយាប័ន្ន។
ក្នុងជំនួបពិភាក្សានេះ លោកឧបនាយករដ្ឋមន្រ្តី អូន ព័ន្ធមុនីរ័ត្ន បានណែនាំឱ្យការរៀបចំក្របខណ្ឌយុទ្ធសាស្រ្តភាពជាដៃគូសម្រាប់អភិវឌ្ឍន៍កម្ពុជាឆ្នាំ ២០១៩-២០២៣ ដោយមានភាគីកម្ពុជា ជាម្ចាស់ក្នុងការដឹកនាំរៀបចំឱ្យយុទ្ធសាស្រ្ត ឆ្លើយតបទៅនឹងតម្រូវការអភិវឌ្ឍន៍ជាក់ស្តែងរបស់កម្ពុជា ដូចជា៖
១. វិស័យអប់រំបណ្តុះបណ្តាលបច្ចេកទេស និងវិជ្ជាជីវៈ
២. គោលដៅអភិវឌ្ឍន៍ប្រកបនិរន្តភាពរបស់កម្ពុជា
៣. ការអភិវឌ្ឍសហគ្រាសធុនតូច និងមធ្យម
៤. កំណែទម្រង់ហិរញ្ញវត្ថុសាធារណៈ
៥. ការពង្រឹងអភិបាលកិច្ច
និង៦. សេដ្ឋកិច្ចឌីជីថលជាដើម៕
រូបថត៖ ក្រសួងសេដ្ឋកិច្ច និងហិរញ្ញវត្ថុ