ដំរី១ក្បាលនៅមណ្ឌលគិរី ត្រូវព្រានបាញ់សម្លាប់យកភ្លុក

2019-02-25 01:29:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សត្វដំរីឈ្មោលមួយក្បាលត្រូវបានព្រានព្រៃបាញ់សម្លាប់ ដើម្បីកាត់យកភ្លុក។ ដំរីនេះ ត្រូវបានមន្ត្រីបរិស្ថានប្រទះឃើញពេលកំពុងដើរល្បាត កាលព្រឹកថ្ងៃទី២៤ ខែកុម្ភៈ ឆ្នាំ២0១៩។

សត្វដំរីបានងាប់ជាង ១០ថ្ងៃមកហើយ នៅក្នុងចម្ការស្វាយចន្ទី ស្ថិតនៅក្នុងភូមិស្រែល្វី ឃុំស្រែខ្ទុម ស្រុកកែវសីមា ខេត្តមណ្ឌលគិរី ដោយមានសភាពហើមស្អុយ ធ្លាយពោះ រលួយ ជះក្លិនស្អុយខ្លាំង។

លោក នេត្រ ភក្រ្តា អ្នកនាំពាក្យក្រសួងបរិស្ថានបានថ្លែងប្រាប់ [ខ្លីៗ] កាលពីរសៀលថ្ងៃទី២៤ ខែកុម្ភៈ ថា ក្រោយពីការពិនិត្យទៅលើដងខ្លួនសត្វដំរីដែលងាប់នោះ គឺមានស្លាកស្នាមប្រវែងមួយចំអាមនៅក្រោមភ្នែក ធ្លុះចូលទៅក្នុង គឺជាការបាញ់សម្លាប់សត្វដំរីដើម្បីយកភ្លុក ហើយដំរីដែលត្រូវបាញ់សម្លាប់ គឺជាដំរីឈ្មោល និងមានវ័យចំណាស់។ ហើយសមត្ថកិច្ចកំពុងតែធ្វើការពិនិត្យជុំវិញកន្លែងដែលដំរីងាប់ ដើម្បីរកដានអ្នកដែលបាញ់សត្វនេះ។

លោកបានបន្តថា ចំពោះសត្វដំរីដែលងាប់ និងយកទៅកប់នៅកន្លែងសុវត្ថិភាពមួយ ដើម្បីរក្សាគ្រោងឆ្អឹង សម្រាប់ធ្វើការស្រាវជ្រាវជាបន្តទៀតក្នុងការសិក្សាស្រាវជ្រាវជាផលប្រយោជន៍បែបវិទ្យាសាស្រ្ត។

ជាមួយគ្នានេះ ក្រសួងបរិស្ថាន ក៏បានអំពាវនាវឲ្យប្រជាពលរដ្ឋទាំងអស់ ចូលរួមនិងការពារអភិរក្សធនធានធម្មជាតិ ការពារសត្វព្រៃ។