សម្តេច ហ៊ុន សែន អរគុណក្រុមហ៊ុនហ្វេសប៊ុក ដែលជួយឱ្យគ្រប់គ្រងគណនីបានមកវិញ

2019-02-26 04:48:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន នៅថ្ងៃទី២៦កុម្ភៈនេះ បានសម្តែងការអគុណដល់ក្រុមហ៊ុនហ្វេសប៊ុក ដែលបានសហការគ្រប់គ្រងគណនេយ្យហ្វេសប៊ុករបស់សម្តេចបានមកវិញ បន្ទាប់ពីត្រូវបានជនអនាមិក hack កាលពីម្សិលមិញ។

សម្តេចបានលើកឡើងថា៖ «ពូសុំអរគុណកូនក្មួយទាំងអស់ ដែលយកចិត្តទុកដាក់ ចូលរួមទប់ស្កាត់ព័ត៌មានមិនពិត (fake news) ដែលព្យាយាមបំពុលដោយក្រុមជនអគតិមួយចំនួនតូច ក្នុងចេតនាអាក្រក់ផ្សព្វផ្សាយព័ត៌មានបំផ្លាញ សង្គមជាតិយើង។ ពូតែងតែកោតសរសើរកូនក្មួយដែលខិតខំសិក្សាជំនាញបច្ចេកវិទ្យាអាយធី (Information Technology)»។

សម្តេច ហ៊ុន សែន ថ្លែងនាពេលកន្លងមក

ជាមួយគ្នានេះ សម្តេច ហ៊ុន សែន បានបង្ហាញពីបំណងចង់ឱ្យកម្ពុជា ក្លាយជាប្រទេស ដែលរីកចម្រើនផ្នែកបច្ចេកវិទ្យាស្របទៅនឹងតម្រូវការសង្គម ពាណិជ្ជកម្ម និងសេដ្ឋកិច្ចជាតិសព្វថ្ងៃ (E-People & E-government) និងគាំទ្រឱ្យមានការអភិវឌ្ឍកាន់តែខ្លាំងឡើងលើប្រព័ន្ធអ៊ិនធឺណិតល្បឿនលឿន និងមាន free wi-fi ឱ្យកាន់តែច្រើននៅក្នុងប្រទេសយើង។

«ច្បាស់ណាស់ មិនថាតែជំនាញបច្ចេកវិទ្យាមួយទេ គឺគ្រប់ជំនាញទាំងអស់ ក្មួយៗត្រូវតែបន្តសិក្សាស្រាវជ្រាវរៀនសូត្រទៅមុខថែមទៀត ហើយត្រូវមានការប្រយ័ត្នប្រយែងខ្ពស់ក្នុងការប្រើប្រាស់ និងគ្រប់គ្រងឱ្យបានហ្មត់ចត់ល្អបំផុត។ សូម្បីតែគណនីហ្វេសប៊ុក ពូក៏មានក្រុមជនខិលខូច បានព្យាយាមចូលលួចជាច្រើនដងដែរ»។ នេះជាការរៀបរាប់បន្ថែមរបស់សម្តេចនាយករដ្ឋមន្រ្តី។

ប្រមុខរាជរដ្ឋាភិបាលបានលើកទឹកចិត្ត និងគាំទ្រ ឱ្យយុវជនយកជំនាញ និងចំណេះដឹង ជាពិសេសជំនាញបច្ចេកវិទ្យា មកបម្រើកិច្ចការប្រទេសជាតិ ឱ្យមានប្រយោជន៍ ចៀសវាងទៅធ្វើអ្វីមួយដែលបំផ្លាញដល់អ្នកដទៃ និងសង្គមជាតិ៕

អត្ថបទ៖ សំភី