គ្រោះថ្នាក់យន្តហោះដឹកអ្នកដំណើរធំៗទាំង ១៨ ក្នុងរយៈពេល ៥ឆ្នាំចុងក្រោយ
- 2019-03-11 03:58:27
- ចំនួនមតិ 0 | ចំនួនចែករំលែក 0
គ្រោះថ្នាក់យន្តហោះដឹកអ្នកដំណើរធំៗទាំង ១៨ ក្នុងរយៈពេល ៥ឆ្នាំចុងក្រោយ
ចន្លោះមិនឃើញ
យន្តហោះប៊ូអ៊ីង 737 MAX 8 របស់ក្រុមហ៊ុនអាកាសចរណ៍អេត្យូពី Ethiopian Airlines បានធ្លាក់ ពេលហោះចេញពីរដ្ឋធានី Addis Ababa ប្រទេសអេព្យូពី ទៅកាន់រដ្ឋធានី Nairobi ប្រទេសកេនយ៉ា កាលពីថ្ងៃទី១០ ខែមីនាម្សិលមិញនេះ សម្លាប់មនុស្សទាំង ១៥៧នាក់។ គិតទាំងគ្រោះថ្នាក់នេះ គឺមានគ្រោះថ្នាក់យន្តហោះធំៗ ចំនួន ១៨ ហើយ គិតចាប់ពីឆ្នាំ ២០១៤ មក។
ខែមីនា ឆ្នាំ២០១៤៖ យន្តហោះប៊ូអ៊ីង 777 របស់ក្រុមហ៊ុនអាកាសចរណ៍ម៉ាឡេស៊ី Malaysia Airlines បានបាត់ខ្លួននៅលើមហាសមុទ្រឥណ្ឌា ពេលហោះចេញពីម៉ាឡេស៊ី ទៅកាន់ប្រទេសចិន។ យន្តហោះដែលរកមិនទាន់ឃើញនោះ ផ្ទុកមនុស្ស ២៣៩នាក់ ដែលភាគច្រើនជាជនជាតិចិន។
ខែកក្កដា ឆ្នាំ២០១៤៖ យន្តហោះប៊ូអ៊ីង 777 របស់ក្រុមហ៊ុនអាកាសចរណ៍ម៉ាឡេស៊ី Malaysia Airlines ត្រូវបានបាញ់ទម្លាក់នៅភាគខាងកើតប្រទេសអ៊ុយក្រែន សម្លាប់មនុស្សទាំង ២៩៨នាក់។
ខែកក្កដា ឆ្នាំ២៩១៤៖ យន្តហោះ ATR 72 របស់ក្រុមហ៊ុនអាកាសចរណ៍ TransAsia Airways ហោះពីក្រុងតៃប៉ិ ទៅកាន់កោះ Penghu (តៃវ៉ាន់) បានធ្លាក់ចំអគារ ពេលប្រុងប្រៀបចុះចតនៅព្រលាន សម្លាប់មនុស្ស ៤៨នាក់។
ខែកក្កដា ឆ្នាំ២០១៤៖ យន្តហោះ McDonnell Douglas MD-83 របស់ក្រុមហ៊ុនអាកាសចរណ៍ Air Algerie ហោះពីប៊ូគីណាហ្វាសូ ទៅកាន់អាល់ហ្សេរី បានធ្លាក់នៅប្រទេសម៉ាលី សម្លាប់មនុស្ស ១១៦នាក់។
ខែធ្នូ ឆ្នាំ២០១៤៖ យន្តហោះ Airbus A320 របស់ក្រុមហ៊ុន Indonesia AirAsia បានធ្លាក់នៅសមុទ្រជ្វា ពេលហោះពីឥណ្ឌូណេស៊ី ទៅកាន់សិង្ហបុរី។ មនុស្សទាំង ១៦២នាក់នៅលើយន្តហោះ បានស្លាប់។
ខែមីនា ឆ្នាំ២០១៥៖ យន្តហោះ Airbus A320 របស់ក្រុមហ៊ុន Germanwings ហោះពីអេស្ប៉ាញ ទៅអាល្លឺម៉ង់ បានហោះបុកភ្នំ Alps ប្រទេសបារាំង សម្លាប់មនុស្សទាំង ១៥០នាក់។ មូលហេតុ គឺដោយសារអ្នកបើកយន្តហោះ សម្លាប់ខ្លួន (បើកបំបុកភ្នំ)។
ខែសីហា ឆ្នាំ២០១៥៖ យន្តហោះ ATR 42-300 របស់ក្រុមហ៊ុនអាកាសចរណ៍ Trigana Air Service បានធ្លាក់ពេលហោះពីតំបន់ Sentani ទៅកាន់តំបន់ Oksibil ប្រទេសឥណ្ឌូណេស៊ី សម្លាប់មនុស្ស ៥៤នាក់។
ខែតុលា ឆ្នាំ២០១៥៖ យន្តហោះ Airbus A321 របស់ក្រុមហ៊ុនអាកាសចរណ៍ Kogalymavia ហោះពីអេហ្ស៊ីប ទៅ St. Petersburg (រុស្ស៊ី) បានផ្ទុះ បណ្ដាលឲ្យស្លាប់មនុស្សទាំង ២២៤នាក់។
ខែមីនា ឆ្នាំ២០១៦៖ យន្តហោះប៊ូអ៊ីង 737 របស់ក្រុមហ៊ុនអាកាសចរណ៍ FlyDubai ហោះពីអារ៉ាប់រួម ទៅកាន់រុស្ស៊ី បានធ្លាក់ដោយសារបញ្ហាអាកាសធាតុ បណ្ដាលឲ្យស្លាប់មនុស្សទាំង ៦២នាក់
ខែឧសភា ឆ្នាំ២០១៦៖ យន្តហោះ Airbus A320 របស់ក្រុមហ៊ុនអាកាសចរណ៍ EgyptAir ហោះពីអេហ្ស៊ីប ទៅបារាំង បានធ្លាក់ចូលសមុទ្រមេឌីទ័ររ៉ានេ បណ្ដាលឲ្យស្លាប់មនុស្ស ៦៦នាក់។
ខែវិច្ឆិកា ឆ្នាំ២០១៦៖ យន្តហោះ Avro RJ85 របស់ក្រុមហ៊ុន LaMia ហោះពីប្រទេសបូលីវី ទៅកាន់កូឡុំប៊ី បានធ្លាក់ដោយសារអស់សាំង។ មនុស្ស ៧១នាក់ ក្នុងចំណោមអ្នកដំណើរ ៧៧នាក់បានស្លាប់ ដែលក្នុងនោះក៏មានក្រុមកីឡាករនៃក្លឹបបាល់ទាត់មួយរបស់ប្រេស៊ីលផងដែរ។
ខែធ្នូ ឆ្នាំ២០១៦៖ យន្តហោះ ATR 42-500 របស់ក្រុមហ៊ុន Pakistan International Airlines បានធ្លាក់ដោយសារបញ្ហាម៉ាស៊ីន ធ្វើឲ្យមនុស្ស ៤៨នាក់បានស្លាប់។
ខែកុម្ភៈ ឆ្នាំ២០១៨៖ យន្តហោះ Antonov An-148 របស់ក្រុមហ៊ុនរុស្ស៊ី Saratov Airlines បានធ្លាក់ក្រោយហោះចេញពីទីក្រុងមូស្គូបានបន្តិច ធ្វើឲ្យមនុស្ស ៧១នាក់ស្លាប់។
ខែកុម្ភៈ ឆ្នា២០១៨៖ យន្តហោះ ATR 72 របស់ក្រុមហ៊ុន Aseman Airlines បានធ្លាក់នៅអ៊ីរ៉ាក់ បណ្ដាលឲ្យមនុស្ស ៦៦នាក់ស្លាប់។ កំហុសអ្នកបើក រួមទាំងកត្តាអាកាសធាតុ ជាមូលហេតុនៃការធ្លាក់នេះ។
ខែមីនា ឆ្នាំ២០១៨៖ យន្តហោះ Bombardier Dash របស់ក្រុមហ៊ុន US-Bangla ហោះពីបង់ក្លាដេស ទៅនេប៉ាល់ បានឆេះពេលចុះចតនៅប្រទេសនេប៉ាល់ បណ្ដាលឲ្យមនុស្ស ៥២នាក់ស្លាប់ (នៅរស់ ១៩នាក់)។
ខែឧសភា ឆ្នាំ២០១៨៖ យន្តហោះប៊ូអ៊ីង 737 របស់ក្រុមហ៊ុនអាកាសចរណ៍ Cubana (ជើងហោះហើរក្នុងស្រុករបស់គុយបា) បានធ្លាក់ ស្លាប់មនុស្ស ១១២នាក់ ដោយសារកំហុសអ្នកបើក។
ខែតុលា ឆ្នាំ២០១៨៖ យន្តហោះប៊ូអ៊ីង 737 Max របស់ក្រុមហ៊ុនអាកាសចរណ៍ Lion Air បានធ្លាក់នៅឥណ្ឌូណេស៊ី ស្លាប់មនុស្ស ១៨៩នាក់។
ខែមីនា ឆ្នាំ២០១៩៖ យន្តហោះប៊ូអ៊ីង 737 Max 8 របស់ក្រុមហ៊ុនអាកាសចរណ៍ Ethiopian Airlines បានធ្លាក់ពេលហោះចេញពីអេត្យូពីរ ទៅកាន់កេនយ៉ា បានធ្លាក់ក្រោយហោះចេញពីព្រលាន បានតែ ៦នាទី បណ្ដាលឲ្យមនុស្សទាំង ១៥៧នាក់ ស្លាប់។ មុនពេលធ្លាក់ អ្នកបើកយន្តហោះបានស្នើហោះមកកាន់ព្រលានវិញ។ ការស៊ើបអង្កេត កំពុងធ្វើឡើង ដើម្បីរកមូលហេតុពិតប្រាដកនៃការធ្លាក់៕