មន្ទីររ៉ែខេត្តកោះកុង ពន្យល់ពីបញ្ហាខ្វះថាមពលអគ្គិសនីប្រើប្រាស់ នៅក្រុងនិងស្រុក ចំនួន២
- 2019-03-15 02:50:26
- ចំនួនមតិ 0 | ចំនួនចែករំលែក 0
មន្ទីររ៉ែខេត្តកោះកុង ពន្យល់ពីបញ្ហាខ្វះថាមពលអគ្គិសនីប្រើប្រាស់ នៅក្រុងនិងស្រុក ចំនួន២
ចន្លោះមិនឃើញ
មន្ទីររ៉ែ និងថាមពលខេត្តកោះកុង កាលពីថ្ងៃទី១៤ ខែមីនា ឆ្នាំ២០១៩ បានជូនដំណឹងថា ដោយសារអាកាសធាតុក្នុងពេលបច្ចុប្បន្ននេះ មានភាពរាំងស្ងួត ធ្វើឲ្យស្ថានីយវារីអគ្គិសនីស្ទឹងតាតៃ និងវារីអគ្គិសនីស្ទឹងឫស្សីជ្រុំ មានកម្ពស់ទឹកទាប ពុំអាចទាញយកថាមពលអគ្គិសនីសម្រាប់ផ្គត់ផ្គង់ ក្នុងការប្រើប្រាស់បានគ្រប់គ្រាន់ ក្នុងខេត្តនេះ។
មន្ទីររ៉ែខេត្តកោះកុង ក៏បានអំពាវនាវឲ្យប្រជាពលរដ្ឋមានការយោគយល់ ពីព្រោះស្ថានភាពនៅពេលនេះ ថាមពលអគ្គិសនីមានត្រឹមតែ 10 MW ទេ ហើយសម្រាប់ផ្គត់ផ្គង់ជូនប្រជាពលរដ្ឋប្រើប្រាស់ ក្នុងក្រុងខេមរភូមិន្ទ និងស្រុកមណ្ឌលសីមា ពុំបានគ្រប់គ្រាន់ឡើយ ដោយតំបន់ខ្លះមានអគ្គិសនីប្រើប្រាស់ ហើយតំបន់ខ្លះ ពុំមានអគ្គិសនីប្រើប្រាស់ ដោយក្រុមហ៊ុនអគ្គិសនី ធ្វើការផ្គត់ផ្គង់ប្ដូរវេន។
មន្ទីររ៉ែខេត្តកោះកុងបន្ថែមថា ថាមពលអគ្គិសនី 10 MW នេះ ក្នុងការផ្គត់ផ្គង់ជូនប្រជាពលរដ្ឋប្រើប្រាស់ មួយផ្នែកបានមកពីវារីអគ្គិសនីតាតៃ និងមួយផ្នែកទៀត បានទិញពីប្រទេសថៃ។ ដូច្នេះ មន្ទីរបានអំពាវនាវឲ្យប្រជាពលរដ្ឋ ម្ចាស់សណ្ឋាគារ ផ្ទះសំណាក់ សហគ្រាស ត្រៀមម៉ាស៊ីនភ្លើងផ្ទាល់ខ្លួន សម្រាប់ប្រើប្រាស់ដោយខ្លួនឯង ចាប់ពីថ្ងៃជូនដំណឹងនេះតទៅ។
មន្ទីររ៉ែខេត្តកោះកុងឲ្យដឹងទៀតថា នៅពេលដែលអគ្គិសនីកោះកុង បានទិញថាមពលអគ្គិសនី និងរៀបចំបណ្ដាញបន្ថែម ពីប្រទេសថៃ រួចរាល់ ការផ្គត់ផ្គង់ថាមពលអគ្គិសនីជូនប្រជាពលរដ្ឋ នឹងបានប្រើប្រាស់ជាធម្មតាឡើងវិញ៕