លោក ម៉ូន ចេអ៊ីន សន្យាបង្កើនការជួយកម្ពុជា ក្រោមគោលនយោបាយដ៏ធំបំផុតរបស់លោក

2019-03-15 08:12:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីកូរ៉េខាងត្បូង លោក ម៉ូន ចេអ៊ីន បានសន្យាបង្កើនការគាំទ្របន្ថែមសម្រាប់កម្ពុជា ក្រោមគោលនយោបាយថ្មីឆ្ពោះទៅទិសខាងត្បូង (NSP) របស់លោក ខណៈដែលកម្ពុជា បានក្លាយជាប្រទេសធំបំផុតទី២ នៃការផ្តល់ជំនួយអភិវឌ្ឍន៍របស់កូរ៉េខាងត្បូង។ លោកថ្លែងដូច្នេះទៅកាន់អ្នកសារព័ត៌មាន ក្រោយបញ្ចប់ជំនួបទ្វេភាគីជាមួយសម្តេចនាយករដ្ឋមន្រ្តី ហ៊ុន សែន នាថ្ងៃទី១៥ ខែមីនា ឆ្នាំ២០១៩នេះ ក្នុងអំឡុងដំណើរទស្សនកិច្ចរបស់លោកនៅរាជធានីភ្នំពេញ។

លោក ម៉ូន ចេអ៊ីន បានវាយតម្លៃខ្ពស់ចំពោះកិច្ចពិភាក្សារវាងភាគីទាំង២ នាពេលនេះ ក្នុងការជំរុញកិច្ចសហប្រតិបត្តិការបន្ថែមទៀត។

ពេលចាប់ផ្តើមជំនួបជាមួយនាយករដ្ឋមន្រ្តីកម្ពុជា លោក ម៉ូន ចេអ៊ីន បានបង្ហាញជំនឿថា ទំនាក់ទំនងប្រទេសទាំង២ មានសក្តានុពលខ្ពស់ ក្នុងការរីកលូតលាស់ទៅមុខយ៉ាងឆាប់រហ័សនាពេលអនាគត។

ជាមួយគ្នានេះ សម្តេច ហ៊ុន សែន ក៏បានប្រកាសគាំទ្រយ៉ាងសកម្មចំពោះគោលនយោបាយ NSP របស់លោក ម៉ូន ចេអ៊ីន និងបង្ហាញក្តីសង្ឃឹមថា ទំនាក់ទំនងកូរ៉េខាងត្បូង-កម្ពុជា និងកូរ៉េខាងត្បូង-អាស៊ាន នឹងបន្តអភិវឌ្ឍបន្ថែមទៀតក្រោមគោលនយោបាយថ្មីនេះ។

សូមជម្រាបថា គោលនយោបាយថ្មីឆ្ពោះទៅទិសខាងត្បូង គឺជាគំនិតផ្តួចផ្តើមនៃគោលនយោបាយការបរទេសដ៏សំខាន់បំផុតមួយរបស់ប្រធានាធិបតីសាធារណរដ្ឋកូរ៉េ ដើម្បីជំរុញទំនាក់ទំនងការទូត និងសេដ្ឋកិច្ចរបស់ប្រទេសនេះ ជាមួយអាស៊ាន និងប្រទេសឥណ្ឌា។

ក្រុងសេអ៊ូល គ្រោងនឹងធ្វើជាម្ចាស់ផ្ទះនៃកិច្ចប្រជុំកំពូល កូរ៉េខាងត្បូង-អាស៊ាន នៅចុងឆ្នាំនេះ ដើម្បីអបអរខួបលើកទី៣០ នៃការបង្កើតទំនាក់ទំនងរវាងកូរ៉េខាងត្បូង និងអាស៊ាន៕

អត្ថបទទាក់ទង៖ កម្ពុជា-កូរ៉េខាងត្បូង ចុះកិច្ចព្រមព្រៀងពាក់ព័ន្ធនឹងឥណទាន ថាមពល សុខាភិបាល វិនិយោគ និងស្ថាប័នស្រាវជ្រាវ

ប្រភព៖ Yonhapnews ប្រែសម្រួល៖ សំភី