លោក ដូណាល់ ត្រាំ ចង់ឱ្យប្រទេស១ដែលនៅជាប់វេណេហ្ស៊ុយអេឡា ចូលជាសមាជិកណាតូ

2019-03-20 03:30:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីអាមេរិក លោក ដូណាល់ ត្រាំ បានលើកឡើងនូវលទ្ធភាពអំពីការចូលជាសមាជិកថ្មីរបស់ប្រេស៊ីល (ជាប្រទេសដែលនៅជាប់វេណេហ្ស៊ុយអេឡា) ក្នុងអង្គការណាតូ ដើម្បីបង្កើនកិច្ចសហប្រតិបតិការ និងសន្តិសុខរវាងប្រទេសទាំង២។ លោកថ្លែងដូច្នេះទៅកាន់អ្នកសារព័ត៌មាននៅសេតវិមាន កាលពីថ្ងៃទី១៩ ខែមីនា ឆ្នាំ២០១៩ រួមជាមួយប្រធានាធិបតីប្រេស៊ីល លោក Jair Bolsonaro ក្រោយជំនួបពិភាក្សា។

រូបថត៖ ផ្តល់សិទ្ធិដោយ Reuters

លោក ដូណាល់ ត្រាំ បានបញ្ជាក់យ៉ាងដូច្នេះថា៖ «**ខ្ញុំមានបំណងជ្រើសរើសប្រេស៊ីល ជាសម្ព័ន្ធមិត្តមិនមែនណាតូ ដ៏ធំមួយ។ ប្រសិនបើអ្នកចាប់ផ្តើមគិតអំពីវា គឺអាចនឹងក្លាយជាសមាជិកណាតូមួយតែម្តង**»។

ប្រធានាធិបតីអាមេរិកបន្ថែមថា ទំនាក់ទំនងរវាងប្រទេសទាំង២ អាមេរិក-ប្រេស៊ីល គឺមិនដែលមានភាពល្អប្រសើរឡើយ។ «ខ្ញុំគិតថា វាមានអរិភាពនឹងគ្នាច្រើន ជាមួយនឹងប្រធានាធិបតីផ្សេងៗ ប៉ុន្តែគ្មានអរិភាពឡើយ ជាមួយខ្ញុំ»។

រូបថត៖ ផ្តល់សិទ្ធិដោយ Reuters

សូមជម្រាបថា អង្គការណាតូដែលមានអាយុកាល ៧០ឆ្នាំហើយមកដល់ពេលនេះ កាលពីខែមុន បានត្រួសត្រាយផ្លូវឱ្យម៉ាកសេដូនី ក្លាយជាសមាជិកទី៣០របស់ខ្លួន។ លោក ដូណាល់ ត្រាំ តែងតែរិះគន់ចំពោះប្រទេសអឺរ៉ុបដែលជាសមាជិកណាតូ នូវការមិនព្រមបង្កើនការចំណាយយោធា។

គួរកត់សម្គាល់ដែរថា ការលើកឡើងរបស់លោក ដូណាល់ ត្រាំ ខាងលើនេះ ធ្វើឡើងខណៈដែលអាមេរិក កំពុងពិចារណាធ្វើអន្តរាគមន៍យោធាដើម្បីបណ្តេញប្រធានាធិបតីវេណេហ្ស៊ុយអេឡា លោក នីកូឡាស ម៉ាឌូរ៉ូ ចេញពីអំណាច ដោយគាំទ្រមេបក្សប្រឆាំង ឱ្យឡើងកាន់តំណែងជំនួសវិញ៕

ប្រភព៖ Channelnewsasia ប្រែសម្រួល៖ សំភី