រដ្ឋមន្រ្តីសង្គមកិច្ច៖ ជនពិការដែលបម្រើការងារក្នុងស្ថាប័នរដ្ឋ និងឯកជន មានជិត ៦ពាន់នាក់
- 2019-03-21 06:54:53
- ចំនួនមតិ 0 | ចំនួនចែករំលែក 0
រដ្ឋមន្រ្តីសង្គមកិច្ច៖ ជនពិការដែលបម្រើការងារក្នុងស្ថាប័នរដ្ឋ និងឯកជន មានជិត ៦ពាន់នាក់
ចន្លោះមិនឃើញ
លោក វង សូត រដ្ឋមន្រ្តីសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ បានឱ្យដឹងថា រាជរដ្ឋាភិបាលបានកំណត់ជ្រើសរើសជនមានពិការភាពឱ្យចូលបម្រើការងារ នៅតាមក្រសួង-ស្ថាប័នរដ្ឋឱ្យគ្រប់២% និងវិស័យឯកជន ១%។ ជាក់ស្តែងក្នុងឆ្នាំ២០១៨ ជនមានពិការភាពសរុបចំនួន ២៨៣៩ នាក់ ក្នុងនោះ ជនពិការកម្រិតធ្ងន់មានចំនួន ១៤៧៨ នាក់ បានចូលបម្រើការងារនៅតាមក្រសួង ស្ថាប័នរដ្ឋចំនួន ៤០ ចំណែកវិស័យ ឯកជនចំនួន ៧៧ មានជនពិការចំនួន៣០៥៥ នាក់ បាននឹងកំពុងបម្រើការងារ។ សរុបទាំងស្ថាប័នរដ្ឋ និងឯកជនមានចំនួនប្រមាណ ៥៨៩៤ នាក់។
ការថ្លែងខាងលើនេះ ធ្វើឡើងក្នុងពិធីសម្ពោធដាក់ឱ្យដំណើរការកម្មវិធីសហប្រតិបត្តិការអូស្ត្រាលី-កម្ពុជា ដើម្បីការផ្តល់សេវាប្រកបដោយនិរន្តរភាព និងសមធម៌ (ហៅកាត់ ACCESS) នាព្រឹកថ្ងៃទី២១ ខែមីនា ឆ្នាំ២០១៩។
លោកបានបញ្ជាក់ថា ផ្តើមចេញពីការយកចិត្តទុកដាក់របស់រាជរដ្ឋាភិបាលកម្ពុជា បានផ្តល់សច្ចាប័នលើអនុសញ្ញាស្តីពីសិទិ្ធជនមានពិការភាព និងបានក្លាយជារដ្ឋភាគីជាផ្លូវការនៅថ្ងៃទី១៩ ខែមករា ឆ្នាំ២០១៣។ ក្នុងនោះ កម្ពុជា ក៏ជាប្រទេសហត្ថលេខីអនុវត្តយុទ្ធសាស្រ្ត អ៊ីនឈាន់ «ធ្វើឱ្យសិទ្ធិក្លាយជាការពិត» សម្រាប់ជនមានពិការភាពក្នុងតំបន់អាស៊ី និងប៉ាស៊ីហ្វិក ទសវត្សរ៍ ជនមានពិការភាព ឆ្នាំ២០១៣-២០២២ ផងដែរ។
លោករដ្ឋមន្រ្តីបានបន្ថែមថា គិតត្រឹមខែមករា ឆ្នាំ២០១៩ រាជរដ្ឋាភិបាលបានផ្តល់របបគោលនយោបាយជនពិការក្រីក្រតាមសហគមន៍ដល់ជនមានពិការភាព បានចំនួន ១០ខេត្ត សរុបចំនួន ១១៦២៨នាក់។
សូមជម្រាបថា កម្មវិធី ACCESS នឹងអាចជួយដល់ជនមានពិការភាព និងស្រ្តីដែលរងគ្រោះដោយអំពើហិង្សា ទាក់ទងនឹងយ៉េនឌ័រ (Gender Based Violent GBV) នឹងទទួលបានអត្ថប្រយោជន៍ពីកម្មវិធីនេះ ដែលមានសេវាកម្មប្រកបដោយនិរន្តរភាពគុណភាព ទាំងនៅថ្នាក់ជាតិ និងក្រោមជាតិ។ ក្នុងន័យនេះ ចាត់ទុកថាកម្មវិធី ACCESS គឺជាកាលានុវត្តភាពថ្មីមួយទៀត ក្នុងការបើកទំព័រជួយដល់វិស័យពិការភាព បន្ទាប់ពីរាជរដ្ឋាភិបាលកម្ពុជា បានអនុវត្តដោយជោគជ័យនៃផែនការយុទ្ធសាស្ត្រជាតិស្តីពីពិការភាព ២០១៤-២០១៨ នាពេលកន្លងទៅនេះ៕