កត្តាអត់ទឹកនៅតាមអូរ ត្រពាំងថ្លុកក្នុងដែនជម្រកសត្វព្រៃ គឺជាគ្រោះមហន្តរាយដល់សត្វស្លាបជិតផុតពូជ
- 2019-03-25 04:41:31
- ចំនួនមតិ 0 | ចំនួនចែករំលែក 0
កត្តាអត់ទឹកនៅតាមអូរ ត្រពាំងថ្លុកក្នុងដែនជម្រកសត្វព្រៃ គឺជាគ្រោះមហន្តរាយដល់សត្វស្លាបជិតផុតពូជ
ចន្លោះមិនឃើញ
រដូវប្រាំងរាំងឬស្ស (ក្តៅហែងស្ទើរងាប់ដើមឈើ) នាឆ្នាំនេះ ពិតជាមិនអនុគ្រោះដល់ជីវិតសត្វទូទៅទេ។ ពិសេសសត្វស្លាបបក្សាបក្សីរស់នៅក្នុងព្រៃ និងវាលទំនាបត្រូវការទឹកផឹកមិនអាចខ្វះបាន។
លោក ប៊ូ វរសក្ស នាយកកម្មវិធីប្រចាំកម្ពុជារបស់អង្គការជីវិតសត្វស្លាបអន្តរជាតិ បានឱ្យដឹងកាលពីពេលថ្មីៗនេះថា កម្ពុជាឆ្នាំនេះពិតជាក្តៅខ្លាំងជាងបណ្តាឆ្នាំមុនៗ។ សត្វធាតុទូទៅពិតជារងផលប៉ះខ្លាំងណាស់ ដល់ការផឹកឬមុជសម្រាប់បន្តរស់តទៅទៀត។ បើសត្វចិញ្ចឹមវាមានម្ចាស់ជួយផ្តល់ទឹកឲ្យផឹក ឬមុជបានតាមត្រូវការ តែសត្វព្រៃវិញទាមទារដើរហើរស្វែងរកទឹកផឹកដោយខ្លួនឯង។
ពេលនេះទឹកអូរ ថ្លុកត្រពាំង នៅសេសសល់បន្តិចបន្តួចត្រូវរីងស្ងួតអស់ហើយនៅតាមដងព្រៃ ដែនជំរកសត្វព្រៃនានា។ សត្វរស់នៅក្នុងព្រៃរងនូវហានិភ័យខ្ពស់របស់ព្រានព្រៃ ដែលរង់ចាំនៅតែតាមបឹងបួរ ស្ទឹងត្រពាំងដែលនៅមានទឹកបាញ់ប្រហារសត្វស្លាបឬសត្វនានាដែលវារត់រកទឹកផឹក។ គោលដៅកន្លែងមានទឹកតិចតួចនេះហើយ គឺជាគោលដៅបាញ់ប្រហារពីសំណាក់ព្រានកំណាច។
លោកថាដែនជម្រកសត្វព្រៃសៀមប៉ាងខេត្តស្ទឹងត្រែងទឹកក្នុងព្រៃបានរីងអស់ហើយ។ សត្វទាំងឡាយកំពុងអត់ទឹកផឹក។ នេះជាគ្រោះមហន្តរាយដល់សត្វក្រៀល ត្រយ៉ងយក្ស ត្រយ៉ងចង្កំសរ ត្មាតនិងរមាំង ឈ្លូសនិងសត្វជាច្រើនទៀត។
«យើងកំពុងតាមដានជាមួយឧទ្យាននុរក្សដែនជំរកស្វែងរកមើល ថាតើមានសត្វអ្វីខ្លះត្រូវងាប់ដោយអត់ទឹកផឹក ត្រូវព្រានសម្លាប់ ដោយសារកត្តាអត់ទឹកផឹក ពីព្រោះសត្វទាំងនេះជាប្រភេទសត្វជិតផុតពូជ ដែលត្រូវការពារវាគ្រប់កាលៈទេសៈណាទាំងអស់»។ នេះបើតាមការបញ្ជាក់បន្ថែមរបស់លោក ប៊ូ វរសក្ស៕