Airbus ចុះកិច្ចព្រមព្រៀងលក់យន្តហោះឱ្យចិន ៣០០គ្រឿង
- 2019-03-26 08:40:50
- ចំនួនមតិ 0 | ចំនួនចែករំលែក 0
Airbus ចុះកិច្ចព្រមព្រៀងលក់យន្តហោះឱ្យចិន ៣០០គ្រឿង
ចន្លោះមិនឃើញ
ក្រុមហ៊ុន Airbus បានឱ្យដឹងកាលពីថ្ងៃទី២៥ ខែមីនា ឆ្នាំ២០១៩ថា ខ្លួនបានចុះកិច្ចព្រមព្រៀងលក់យន្តហោះដឹកអ្នកដំណើរប្រមាណ ៣០០គ្រឿង ទៅឱ្យក្រុមហ៊ុនអាកាសចរណ៍ចិន។ កិច្ចព្រមព្រៀងនេះ ធ្វើឡើងក្នុងអំឡុងពេលដែលប្រធានាធិបតីចិន លោក ស៊ី ជិនពីង កំពុងបំពេញទស្សនកិច្ចនៅប្រទេសបារាំង។
កិច្ចព្រមព្រៀងនេះ គឺគ្របដណ្តប់លើយន្តហោះត្រកូល A320 ចំនួន ២៩០គ្រឿង និងត្រកូល A350 ចំនួន១០គ្រឿង។ ក្រុមហ៊ុន Airbus បានហៅការបញ្ជាទិញនេះថា ជាសញ្ញាតម្រូវការពីគ្រប់វិស័យនៃទីផ្សារអាកាសចរណ៍ចិន ដែលកំពុងពង្រីកយ៉ាងឆាប់រហ័ស។
គួរកត់សម្គាល់ថា ការចុះកិច្ចព្រមព្រៀងខាងលើនេះ គឺធ្វើឡើងខណៈដែលយន្តហោះ 737 Max របស់ក្រុមហ៊ុនអាមេរិក Boeing ដែលជាគូប្រជែងដ៏ស្រួចស្រាវរបស់ Airbus បានធ្លាក់ដល់ទៅ២លើក មិនដល់កន្លះឆ្នាំផង។ ក្នុងនោះ ធ្លាក់លើកទី១ កាលពីខែតុលា ឆ្នាំ២០១៨ គឺជើងហោះហើររបស់អាការចរណ៍ Lion Air ប្រទេសឥណ្ឌូណេស៊ី ស្លាប់មនុស្ស ១៨៩នាក់ និងលើកទី២ ធ្លាក់កាលពីដើមខែមីនា ឆ្នាំ២០១៩ គឺជើងហោះហើររបស់អាកាសចរណ៍អេត្យូពី ស្លាប់មនុស្ស ១៥៧នាក់។
យន្តហោះ ៣០០គ្រឿងបញ្ជាទិញខាងលើនេះ ក៏ស្រដៀងគ្នាទៅហ្នឹងចំនួនក្រុមហ៊ុន Boeing លក់យន្តហោះទៅឱ្យចិនផងដែរ ដែលកិច្ចព្រមព្រៀងពេលនោះ គឺធ្វើឡើងក្នុងអំឡុងទស្សនកិច្ចរបស់លោក ដូណាល់ ត្រាំ ប្រធានាធិបតីអាមេរិក នៅក្រុងប៉េកាំង កាលពីខែវិច្ឆិកា ឆ្នាំ២០១៧៕