ក្រសួងសេដ្ឋកិច្ច បកស្រាយរឿងកម្ពុជា មានបំណុលបរទេសជាង ១ម៉ឺនលានដុល្លារ
- 2019-04-03 06:50:14
- ចំនួនមតិ 0 | ចំនួនចែករំលែក 0
ក្រសួងសេដ្ឋកិច្ច បកស្រាយរឿងកម្ពុជា មានបំណុលបរទេសជាង ១ម៉ឺនលានដុល្លារ
ចន្លោះមិនឃើញ
ជុំវិញព័ត៌មានដែលបានផ្សាយថា កម្ពុជា មានបំណុលបរទេសជាង ១ម៉ឺនលានដុល្លារអាមេរិកគិតត្រឹមឆ្នាំ២០១៨នោះ ក្រសួងសេដ្ឋកិច្ច និងហិរញ្ញវត្ថុ បានបកស្រាយថា គឺជាតួលេខនៃការខ្ចីឥណទានសម្បទានដែលរាជរដ្ឋាភិបាលបានចុះកិច្ចព្រមព្រៀងជាមួយដៃគូអភិវឌ្ឍន៍គិតចាប់ពីឆ្នាំ១៩៩៣ រហូតមកដល់ដំណាច់ឆ្នាំ២០១៨ ពោលគឺពុំមែនជាតួលេខសន្និធិបំណុលបរទេស ដែលកម្ពុជាជំពាក់ជាក់ស្តែងគិតត្រឹមដំណាច់ឆ្នាំ២០១៨នោះទេ។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច កាលពីថ្ងៃទី២ ខែមេសា ឆ្នាំ២០១៩។
ក្រសួងពន្យល់ថា បើចង់ដឹងអំពីទំហំបំណុលជាសាធារណៈក្រៅប្រទេសដែលកម្ពុជាជំពាក់ជាក់ស្តែង គឺគេត្រូវមើលតួលេខសន្និធិបំណុលសាធារណៈក្រៅប្រទេស ដែលគិតត្រឹមដំណាច់ឆ្នាំ២០១៨ គឺមានចំនួនប្រមាណ ៧ពាន់លានដុល្លារអាមេរិកតែប៉ុណ្ណោះ។
«បើគ្រាន់តែចុះកិច្ចព្រមព្រៀងខ្ចីឥណទានពីក្រៅប្រទេស ពុំទាន់មានន័យថា យើងជំពាក់បំណុលបរទេសនោះទេ គឺលុះត្រាតែយើងដកសាច់ប្រាក់ពីដៃគូ យកមកប្រើប្រាស់សិន ទើបគិតថា "ជាបំណុលសាធារណៈក្រៅប្រទេស" ហើយជាក់ស្តែង យើងក៏មានការបង្វែរសាច់ប្រាក់ ដែលមិនមានប្រើប្រាស់មួយចំនួន និងសងប្រាក់ដើមជាបណ្តើរៗទៅដៃគូវិញហើយដែរ»។ ក្រសួងសេដ្ឋកិច្ច បញ្ជាក់បន្ថែម៕