ក្រុមហ៊ុនចិន គ្រោងវិនិយោគចិញ្ចឹមត្រីដែលអាចផ្តល់ចំណូលដល់ខ្ទង់ម៉ឺនដុល្លារក្នុង១ឆ្នាំ នៅកម្ពុជា

2019-04-14 12:25:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនចិន Hainan XiangTai Fishery Co, Ltd. គ្រោងវិនិយោគការចិញ្ចឹមត្រីក្នុងបែរក្នុងសមុទ្រ នៅក្នុងកម្ពុជា ដោយប្រទេសនេះ មានកម្រិតសីតុណ្ហភាពសមស្របអាចចិញ្ចឹមត្រីបែបនេះបានយ៉ាងល្អ។ នេះបើតាមការបញ្ជាក់របស់លោក Liu Rong Rie ប្រធានក្រុមហ៊ុន ក្នុងកិច្ចប្រជុំពិភាក្សាជាមួយលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី១៤ ខែមេសា ឆ្នាំ២០១៩ ក្នុងឱកាសដែលលោករដ្ឋមន្រ្តី ចុះពិនិត្យនៅកន្លែងកែច្នៃ និងវេចខ្ចប់កន្លែងផលិតចំណីត្រី និងមន្ទីរពិសោធន៍របស់ក្រុមហ៊ុននេះ នៅប្រទេសចិន។

រូបថត៖ ក្រសួងកសិកម្ម

លោកប្រធាន លើកឡើងថា ក្រុមហ៊ុនលោកកំពុងរង់ចាំការអនុញ្ញាតពីក្រុមប្រឹក្សាអភិវឌ្ឍន៍កម្ពុជា ដើម្បីដាក់ទុនវិនិយោគ ហើយដើម្បីធ្វើឱ្យប្រសើរជាងនេះទៅទៀត ក្រុមហ៊ុននឹងប្រើប្រាស់បច្ចេកវិទ្យា AI ដែលមានប្រសិទ្ធភាពសេដ្ឋកិច្ចខ្ពស់។

លោក Liu Rong Rie បានរៀបរាប់ថា ការចិញ្ចឹមត្រីក្នុងបែរក្នុងសមុទ្រនេះមានផលចំណេញច្រើន ជាពិសេសបង្កើនប្រាក់ចំណូលដល់ប្រជាកសិករប្រមាណ ១២០០០ដុល្លារក្នុង១ឆ្នាំ និងបង្កើតការងារប្រមាណ ៤ម៉ឺននាក់ ដោយរួមទាំងកម្មករកែច្នៃ ចញ្ចឹម និងមន្ទីរពិសោធន៍។

ការចិញ្ចឹមត្រីក្នុងបែរ នៅខេត្តព្រះសីហនុ។ រូបថត៖ រដ្ឋបាលជលផល

ជាការឆ្លើយតបលោក វេង សាខុន បានស្វាគមន៍នូវការវិនិយោគបែបនេះនៅកម្ពុជា និងជំរុញឱ្យក្រុមហ៊ុនសហការឱ្យកាន់តែជិតស្និតជាមួយរដ្ឋបាលជលផល និងស្ថាប័នពាក់ពន្ធ័ដើម្បីពន្លឿននូវដំណើរការឱ្យបានឆាប់ ដើម្បីឆ្លើយតបនឹងតម្រូវការត្រីក្នុងស្រុកកាន់តែកើនឡើង និងនាំចេញទៅទីផ្សារអន្តរជាតិផងដែរ៕

អត្ថបទ៖ សំភី