នគរបាលកម្ពុជា-ក្រុមហ៊ុន Huawei សហការរៀបចំទីបញ្ជាការត្រួតពិនិត្យចរាចរណ៍នៅភ្នំពេញ និងព្រះសីហនុ

2019-04-23 01:41:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោក David Li នាយកប្រតិបត្តិក្រុមហ៊ុន Huawei ប្រចាំកម្ពុជា បានពិភាក្សាគ្នាពីគោលការណ៍ឆ្នាំសហប្រតិបត្តិការអនុវត្តច្បាប់កម្ពុជា-ចិន ក្នុងការរៀបចំទីបញ្ជាការត្រួតពិនិត្យចរាចរណ៍នៅរាជធានីភ្នំពេញ និងខេត្តព្រះសីហនុ។ ជំនួបពិភាក្សានេះ ធ្វើឡើងកាលពីថ្ងៃទី២២ ខែមេសា ឆ្នាំ២០១៩ នៅអគ្គស្នងការដ្ឋាននគរបាលជាតិ។

លោក នេត សាវឿន បានសង្កត់ធ្ងន់ឱ្យក្រុមអ្នកបច្ចេកទេសរបស់ក្រុមហ៊ុន HUAWEI និងអ្នកបច្ចេកទេសរបស់អគ្គស្នងការដ្ឋាននគរបាលជាតិ សិក្សាលើកគម្រោងចេញជាទីបញ្ជាការជាកញ្ចប់តែម្តង (សម្ភារៈបច្ចេកទេសបំពាក់ក្នុងទីបញ្ជាការ, សម្ភារៈបច្ចេកទេសសម្រាប់ដាក់តាមគោលដៅនីមួយៗសម្រាប់ត្រួតពិនិត្យ)។

អគ្គស្នងការនគរបាលជាតិ បន្ថែមថា កាមេរ៉ាដែលត្រូវបំពាក់ត្រូវតែធានាលើគុណភាព ប្រសិទ្ធភាពអាចទាញជិត ទាញឆ្ងាយបាន អាចផ្ទុកទិន្នន័យបាន ហើយមិនត្រឹមតែធានាលើការត្រួតពិនិត្យចរាចរណ៍នោះទេ ជាពិសេសគឺអាចបម្រើឱ្យសន្តិសុខ សណ្តាប់ធ្នាប់សាធារណៈបាន។

ជាការឆ្លើយតប ខាងក្រុមហ៊ុន HUAWEI ក៏បានសន្យាថានឹងខិតខំសហការជាមួយក្រុមបច្ចេកទេសអគ្គស្នងការដ្ឋាននគរបាលជាតិ ដើម្បីលើកគម្រោងនេះឱ្យបានឆាប់។

ជាចុងក្រោយ លោកនាយឧត្តមសេនីយ៍សន្តិបណ្ឌិត បានស្នើក្រោយសិក្សាបំពាក់ ត្រូវគិតពីគម្រោងបណ្តុះបណ្តាល ដោយការបណ្តុះបណ្តាលមានពីរ៖ ទី១. បណ្តុះបណ្តាលរបៀបដឹកនាំបញ្ជានៅទីបញ្ជាការប្រចាំបញ្ជា និងទី២. បណ្តុះបណ្តាលបច្ចេកទេសប្រើប្រាស់ឧបករណ៍សម្ភារៈ៕

ប្រភព៖ អគ្គស្នងការដ្ឋាននគរបាលជាតិ ប្រែសម្រួល៖ សំភី