អ្នកវិភាគប្រដាល់ថៃ ៣រូប បញ្ចេញទស្សនៈបែបណា រវាង សុខ ធី និង រ៉តថាំង នៅ ONE?
- 2019-04-23 06:30:00
- ចំនួនមតិ 0 | ចំនួនចែករំលែក 0
អ្នកវិភាគប្រដាល់ថៃ ៣រូប បញ្ចេញទស្សនៈបែបណា រវាង សុខ ធី និង រ៉តថាំង នៅ ONE?
ចន្លោះមិនឃើញ
អ្នកប្រដាល់គុនខ្មែរ សុខ ធី ហៅកាកា នឹងឡើងប្រកួតក្នុងសង្វៀន ONE Championship ជាថ្មី ដោយត្រូវប៉ះកីឡាករលំដាប់កំពូលរបស់ថៃ Rodtang Jitmuangnon នៅក្នុងព្រឹត្តិការណ៍ ONE: WARRIORS OF LIGHT នៅទីក្រុងបាងកក ប្រទេសថៃ នាថ្ងៃទី១០ ខែឧសភា ឆ្នាំ២០១៩។
១. លោក Poptorn Roongsamai មកពីទស្សនាវដ្ដី Champ Boxing Magazine (ទស្សនាវដ្ដីប្រដាល់ថៃមួយ ក្នុងចំណោមទស្សនាវដ្ដីប្រដាល់ធំបំផុតទាំង៣ របស់ថៃ)។ លោកក៏ជាគណៈកម្មការប្រចាំស្ថាប័នប្រដាល់ WBC និង WMO ផងដែរ។ លោកបាននិយាយថា៖
"ខ្ញុំគិតថានេះជាការចាប់គូប្រកួតដ៏ល្អ។ កីឡាករទាំង២ សុទ្ធតែជាអ្នកចូលវ៉ៃដូចគ្នា (striker)។ វានឹងក្លាយជាការប្រកួតដ៏ជក់ចិត្ត។ យ៉ាងណាក្ដី ខ្ញុំគិតថា ការប្រកួតនេះ អត់មានអ្នកសន្លប់ទេ ប៉ុន្តែ Rodtang មានភាគរយឈ្នះច្រើនជាងកាកា គឺឈ្នះដោយពិន្ទុ"។
២. លោក Sroi Mungmee មកពីទស្សនាវដ្ដី Khaosod (ទស្សនាវដ្ដីល្បីបំផុតមួយនៅថៃ)។ លោកជាអ្នកវិភាគប្រដាល់ដ៏ល្បីមួយរូប ដែលតែងតែត្រូវបានគេសួរ នៅមុនការប្រកួតធំៗនានា។ លោកតែងតែទៅតាមកីឡាករផ្ទាល់នៅរាល់ការប្រកួតធំ ដែលរួមមានទាំងការទៅដល់សហរដ្ឋអាមេរិក ដើម្បីសរសេរពីការប្រកួតរបស់កីឡាករប្រដាល់សាកលថៃ Srisaket Sor Rungvisai ផងដែរ។ លោកបាននិយាយថា៖
"Rodtang និង កាកា គឺកំពុងឡើងដៃដូចគ្នា ហើយក៏ជាកីឡាករកំពូលប្រចាំប្រទេសរៀងខ្លួននាពេលបច្ចុប្បន្នផងដែរ។ កីឡាករទាំង២ មានជំនាញខ្ពស់ដូចគ្នា និងស្ថិតនៅកម្រិតដូចគ្នា។ ពួកគេមានក្បាច់គ្រប់ទាំងអស់ មិនថាម៉ាត់ ទាត់ខ្ពស់ កែង ឬទាត់ក្រោមនោះទេ គឺមានគ្រប់។ ខ្ញុំគិតថា កីឡាករទាំង២ នឹងក្លាយជាគូជក់ចិត្ត។ ខ្ញុំគិតថា ការប្រកួតនេះ នឹងអាចមានអ្នកសន្លប់ តែខ្ញុំមិនច្បាស់ថាខាងណានឹងសន្លប់នោះទេ។ ប៉ុន្តែបើឲ្យរើស ខ្ញុំរើសយក Rodtang"។
៣. Pornchai Udomsomporn មកពីទស្សនាវីដេអូប្រដាល់ Muay Too Magazine ហើយក៏ជាពិធីករប្រចាំសង្វៀនប្រដាល់ Lumpini Stadium។ លោកបានបញ្ចេញទស្សនៈថា៖
"និយាយដោយត្រង់ ខ្ញុំគិតថា កាកា មានឱកាសឈ្នះ Rodtang តិចណាស់ ដោយសារកត្តា ២។ កត្តាទី១ គឺដោយសារតែ Rodtang ច្បាស់ក្នុងប្រភេទគីឡូ ៦១គីឡូក្រាម ជាង កាកា (គីឡូដើមរបស់ សុខ ធីចំណាំវ៉ៃ គឺ ៥៧)។ កត្តាទី២ គឺដោយសារ សមត្ថភាពប្រកួតរបស់ Rodtang នារយៈពេលចុងក្រោយនេះ គឺកាន់តែខ្លាំង។ វ៉ៃឈ្នះពិន្ទុ ឬសន្លប់ គឺស្ថិតនៅលើ Rodtang ខ្លួនឯង។ បើ Rodtang វ៉ៃបុកខ្លាំង ខ្ញុំជឿថាគាត់អាចឈ្នះកាកា ដោយសន្លប់។ ប្រសិនបើ Rodtang មិនវ៉ៃបុកពីដំបូងទេ ខ្ញុំគិតថា គាត់អាចឈ្នះដោយពិន្ទុ"។
សូមបញ្ជាក់ថា ខាងលើនេះ គឺគ្រាន់តែជាការបញ្ចេញទស្សនៈផ្ទាល់ខ្លួនប៉ុណ្ណោះ មិនមានខុស ឬត្រូវនោះទេ។ ប្រិយមិត្តក៏អាចបញ្ចេញទស្សនៈផ្ទាល់ខ្លួន នៅក្នុងប្រអប់ Comment ខាងក្រោមផងដែរ៕