ចិន នឹងធ្វើឱ្យកម្ពុជា ដើរតួនាទីសំខាន់ក្នុងតំបន់ឥណ្ឌូចិន និងអាស៊ាន
- 2019-04-24 08:33:11
- ចំនួនមតិ 0 | ចំនួនចែករំលែក 0
ចិន នឹងធ្វើឱ្យកម្ពុជា ដើរតួនាទីសំខាន់ក្នុងតំបន់ឥណ្ឌូចិន និងអាស៊ាន
ចន្លោះមិនឃើញ
ចិននឹងជួយពង្រឹងសេដ្ឋកិច្ចកម្ពុជា និងធ្វើឲ្យកម្ពុជាដើរតួនាទីសំខាន់ក្នុងតំបន់ឥណ្ឌូចិន និងអាស៊ាន។ នេះបើតាមការបញ្ជាក់របស់លោក ឈិន យន់ ប្រធានសមាគមទំនាក់ទំនងអន្តរជាតិចិន ក្នុងជំនួបពិភាក្សាជាមួយសម្តេចនាយករដ្ឋមន្រ្តី ហ៊ុន សែន នាព្រឹកថ្ងៃទី២៤ ខែមេសា ឆ្នាំ២០១៩។
លោក ឈិន យន់ បានគោរពជម្រាបជូនសម្តេចតេជោនាយករដ្ឋមន្ត្រី អំពីដំណើរទស្សនកិច្ចលើកទី២ របស់លោកមកកម្ពុជា ដើម្បីស្វែងរកឱកាសជួយដល់អ្នកវិនិយោគគិនចិន មកវិនិយោគនៅក្នុងប្រទេសកម្ពុជា និងដើម្បីជួយជំរុញការកាត់បន្ថយភាពក្រីក្ររបស់ពលរដ្ឋខ្មែរ ឱ្យបានឆាប់រហ័សបំផុត។ ទន្ទឹមនឹងនេះដែរ លោកបានឃើញផ្ទាល់ភ្នែកនូវការរីកចម្រើនលឿនរបស់កម្ពុជា ទាំងនៅតាមបណ្តាខេត្ត ជាពិសសេសនៅរាជធានីភ្នំពេញដែលមានការរីកចម្រើនយ៉ាងខ្លាំង។
នៅក្នុងដំណើរទស្សនកិច្ចនេះ លោក ឈិន យន់ និងប្រតិភូ នឹងបន្តធ្វើទស្សនកិច្ចនៅខេត្តព្រះសីហនុផងដែរ។
លោកបានស្នើ សម្តេចតេជោនាយករដ្ឋមន្ត្រី ក្នុងការអភិវឌ្ឍរបៀងសេដ្ឋកិច្ចនៅផ្លូវជាតិលេខ៩ ពិសេសរវាងកម្ពុជា និងប្រទេសឡាវនៅពេលខាងមុខ។ អ្វីដែលលោកចង់ឃើញ គឺការផ្លាស់ប្តូរបទពិសោធន៍គ្នាទៅវិញទៅមក ជាពិសេស លោកបានបញ្ជាក់ពីរបៀងប៉ូលសេដ្ឋកិច្ចរវាងរាជធានីភ្នំពេញ និងខេត្តព្រះសីហនុ ដែលនឹងអាចធ្វើជាប៉ូលសេដ្ឋកិច្ចដ៏សំខាន់សម្រាប់កម្ពុជា។
ជាមួយគ្នានោះដែរ លោក ឈិន យន់ បានគោរពស្នើ សម្តេចតេជោនាយករដ្ឋមន្រ្តី ដើម្បីជួយសម្រួលឱ្យមានចរាចរណ៍ប្រើប្រាស់រូបិយបណ្ណចិននៅក្នុងទីផ្សាររបស់កម្ពុជាផងដែរ ដែលនឹងកាន់តែទាក់ទាញវិនិយោគគិនជាច្រើនទៀតមកកម្ពុជា និងពីប្រទេសដទៃៗទៀត។
សម្តេច ហ៊ុន សែន បានបញ្ជាក់ប្រាប់ លោក ឈិន យន់ អំពីកំណែទម្រង់ស៊ីជម្រៅរបស់កម្ពុជា ជាបន្តបន្ទាប់ ជាពិសេសនៅក្នុងវេទិការាជរដ្ឋាភិបាល និងវិស័យឯកជនកន្លងទៅថ្មីៗនេះ ដែលបានជួយកាត់បន្ថយការចំណាយយ៉ាងច្រើនដល់អ្នកវិនិយោគគិន ដើម្បីក្រុមហ៊ុនមានលទ្ធភាពបង់ពន្ធនាំចេញចូលងាយស្រួល ចំណាយតិចក្នុងការផលិត និងដឹកជញ្ជូន និងបានទទួលមកវិញនូវប្រាក់ចំណេញកាន់តែច្រើន។
សម្តេច ហ៊ុន សែន បានជម្រាបលោក យន់ អំពីគម្រោងអញ្ជើញទៅចូលរួមវេទិកាផ្លូវ១ខ្សែក្រវ៉ាត់១ ដែលនឹងចេញដំណើរនៅថ្ងៃស្អែកចាប់ពីថ្ងៃទី២៥ ដល់ ២៩ មេសា ២០១៩។ សម្តេចគ្រោងនឹងជួបពិភាក្សាបន្ថែមអំពីគម្រោងជំរុញកិច្ចសហប្រតិបត្តិការពាណិជ្ជចិនកម្ពុជា ដែលពាក់ព័ន្ធនឹងផ្លូវ១ខ្សែក្រវ៉ាត់១ ស្របជាមួយនឹងយុទ្ធសាស្រ្តចតុកោណរបស់កម្ពុជាផងដែរ នៅក្នុងអំឡុងពេលដែលសម្តេចអញ្ជើញជួបលោកប្រធានាធិបតីចិន ស៊ី ជិនពីង និង លោក លី គឺឈាង នាយករដ្ឋមន្រ្តីចិន ក្នុងប៉ុន្មានថ្ងៃខាងមុខនេះ។ ជាមួយគ្នានេះដែរ សម្តេចនាយករដ្ឋមន្រ្តី នឹងស្នើសុំការគាំទ្រ និងកិច្ចសហការជាមួយមិត្តចិន ដើម្បីជំរុញតំបន់សេដ្ឋកិច្ចពាណិជ្ជកម្មពិសេសនៅខេត្តព្រះសីហនុ ដែលជាខេត្តកំពុងមានសក្តានុពលនោះ ឱ្យកាន់តែរីកចម្រើនខ្លាំងឡើងថែមទៀត៕