ពលរដ្ឋវៀតណាមផ្អើល ថ្លៃភ្លើងឡើងខុសពីធម្មតា

2019-04-25 04:21:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ពលរដ្ឋវៀតណាមមួយចំនួនបានសម្ដែងអារម្មណ៍ភ្ញាក់ផ្អើល និងហួសចិត្តនៅពេលទទួលបានវិក្កយបត្រភ្លើងនៅក្នុងខែមេសា សម្រាប់ថ្លៃភ្លើងដែលប្រើប្រាស់កាលពីខែមីនា។ នេះជាវិក្កយបត្រដំបូង ក្រោយពីក្រសួងថាមពល និងពាណិជ្ជកម្មវៀតណាមបានសម្រេចកែសម្រួលតម្លៃអគ្គិសនីនៅថ្ងៃទី ២០ ខែមីនារួចមក។ តម្លៃដែលកែសម្រួលថ្មីគឺមានការកើនឡើង ៨,៣៦% ប៉ុន្តែនៅក្នុងវិក្កយបត្រគឺឡើងច្រើនលើសនេះទៅទៀត។

កញ្ញា Tue Thu ដែលរស់នៅទីក្រុងហូជីមិញនិយាយថា មុនពេលមានការដំឡើងថ្លៃអគ្គិសនី គ្រួសាររបស់ខ្លួនប្រើប្រាស់ថាមពលចន្លោះ ៤០ ដុល្លារ ទៅ ៤៥ ដុល្លារប៉ុណ្ណោះ។ យ៉ាងណាក្ដីវិក្កយបត្រដែលទទួលបានខែមេសា ឃើញថាការចំណាយមានរហូតដល់ប្រមាណ ៦៦,២ ដុល្លារ ដែលមានការកើនឡើងប្រមាណ ៤៩% ធៀបនឹងពេលមុនៗ។

ស្រដៀងគ្នានេះ វិក្កយបត្ររបស់គ្រួសារអតិថិជនឈ្មោះ Xuan Tien រស់នៅទីក្រុងហូជីមិញដែរ មានការកើនឡើងទ្វេដង។ ក្នុងខែមីនាគ្រួសាររបស់លោកចំណាយលើអគ្គិសនីអស់ប្រមាណ ១៥ ដុល្លារ ហើយនៅខែមេសាឡើងដល់ប្រមាណ ៣៣ ដុល្លារឯណោះ។

ទាក់ទងនឹងបញ្ហាមិនប្រក្រតីលើវិក្កយបត្រនេះដែរ តំណាងអគ្គិសនីជាតិវៀតណាម (EVN) បានលើកឡើងអំពីហេតុផលមួយចំនួនដែលនាំឲ្យមានការកើនឡើងលើថ្លៃប្រើប្រាស់អគ្គិសនី។ អ្នកតំណាងរូបនេះនិយាយថាកត្តាអាកាសធាតុកើនឡើងកម្ដៅក្ដៅខ្លាំងធ្វើឲ្យពលរដ្ឋមួយចំនួនត្រូវប្រើប្រាស់ថាមពលអគ្គិសនីច្រើន ដើម្បីបញ្ចុះកម្ដៅ ដូចជាប្រើកង្ហារ ឬម៉ាស៊ីនត្រជាក់ច្រើនជាងមុនជាដើម។

តំណាង EVN ក៏បានលើកឡើងអំពីហេតុផលមួយទៀត គឺដោយសារតម្លៃអគ្គិសនីបានកែសម្រួលដំឡើងថ្លៃ ៨,៣៦%។ បន្ថែមពីនេះវិក្កយបត្រដែលពលរដ្ឋទទួលបាននៅខែមេសា គឺគិតលើការប្រើប្រាស់រយៈពេល ៣១ ថ្ងៃ ច្រើនជាងវិក្កយបត្រប្រចាំខែមីនាដែលមានរយៈពេល ២៨ ថ្ងៃប៉ុណ្ណោះ។

“ចំនួនថ្ងៃនៃការប្រើថាមពលអគ្គិសនីគឺយូរជាងមុន ដូចនេះបរិមាណអគ្គិសនីដែលប្រើប្រាស់នឹងច្រើនជាងមុន។ បូកបន្ថែមពីលើការកែសម្រួលតម្លៃនៃថាមពលអគ្គិសនីដែលលក់ឲ្យអតិថិជន ធ្វើឲ្យថ្លៃអគ្គិសនីកើនឡើងលើសខែមុន”។ នេះជាការលើកឡើងរបស់តំណាង EVN។

គួរដឹងថាថ្លៃអគ្គិសនីដែលកែសម្រួលថ្មីរបស់វៀតណាមគឺមានចែកចេញជា ៦ កម្រិតដូចខាងក្រោមនេះ ៖

កម្រិតទីមួយចាប់ពី ០ ដល់ ៥០ គីឡូវ៉ាត់ម៉ោង មានតម្លៃ ១ ៦៧៨ ដុង (ប្រមាណ ២៩២ រៀល) ក្នុងមួយគីឡូវ៉ាត់ម៉ោង។
កម្រិតទីពីរចាប់ពី ៥១ ដល់ ១០០ គីឡូវ៉ាត់ម៉ោង មានតម្លៃ ១ ៧៣៤ ដុង (ប្រមាណ ៣០២ រៀល)
កម្រិតទីបីចាប់ពី ១០១ ដល់ ២០០ គីឡូវ៉ាត់ម៉ោង មានតម្លៃ ២ ០១៤ ដុង (ប្រមាណ ៣៥០ រៀល)
កម្រិតទីបួនចាប់ពី ២០១ ដល់ ៣០០ គីឡូវ៉ាត់ម៉ោង មានតម្លៃ ២ ៥២៦ ដុង (ប្រមាណ ៤៤១ រៀល)
កម្រិតទីប្រាំចាប់ពី ៣០១ ដល់ ៤០០ គីឡូវ៉ាត់ម៉ោង មានតម្លៃ ២ ៨៣៤ ដុង (ប្រមាណ ៤៩៣ រៀល)
កម្រិតទី ៦ ចាប់ពី ៤០១ គីឡូវ៉ាត់ម៉ោងឡើង មានតម្លៃ ២ ៩២៧ ដុង (ប្រមាណ ៥០៩ រៀល)