រោងចក្រផលិតសាច់មាន់ស្តង់ដាអន្តរជាតិដំបូងបង្អស់នៅកម្ពុជា ដាក់ឲ្យដំណើរការនៅក្នុងខេត្តកំពត
- 2019-04-26 04:52:12
- ចំនួនមតិ 0 | ចំនួនចែករំលែក 0
រោងចក្រផលិតសាច់មាន់ស្តង់ដាអន្តរជាតិដំបូងបង្អស់នៅកម្ពុជា ដាក់ឲ្យដំណើរការនៅក្នុងខេត្តកំពត
ចន្លោះមិនឃើញ
រោងចក្រផលិតសាច់មាត់ស្តង់ដាអន្តរជាតិមួយ មានឈ្មោះថា ៣ភីអិលអ៊ីហ្វាម (3PLE Farm) បង្កើតដោយអ្នកវិនិយោគក្នុងស្រុក បានលេចវត្តមាននៅតាមបណ្ដោយផ្លូវជាតិលេខ៤១ ក្នុងភូមិឈើទាល ឃុំជម្ពូវ័ន្ត ស្រុកជុំគិរី ខេត្តកំពត។
លោកបណ្ឌិត ជា វណ្ណដេត ប្រធានគណៈកម្មការផែនការវិនយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា បានដឹកនាំប្រតិភូធ្វើទស្សនកិច្ចសិក្សាស្វែងយល់អំពីរោងចក្រផលិតកែច្នៃសាច់ និងវេចខ្ចប់សាច់មាន់នេះផងដែរ កាលពីថ្ងៃទី២៥ ខែមេសាម្សិលមិញនេះ ដោយមានការអបដំណើរដោយលោក ជាវ តាយ អភិបាលខេត្តកំពត និងមន្ត្រីជាន់ខ្ពស់មកពីក្រសួងកសិកម្ម ក្រសួងបរិស្ថាន ជាច្រើនរូបទៀតផងដែរ។
លោក ជា វណ្ណដេត បានសម្តែងការកោតសរសើរដល់ដំណើរការចង្វាក់ផលិតកម្ម និងស្តង់ដា អនាម័យ សុវត្ថិភាពសាច់នៅក្នុងរោងចក្រនេះ ព្រមទាំងលើកទឹកចិត្តឲ្យក្រុមពង្រីកការផលិត និងចែកចាយផលិតផលរបស់ខ្លួននៅតាមទីផ្សារក្នុងព្រះរាណាចក្រកម្ពុជា និងទៅកាន់ទីផ្សារបរទេស។
អគ្គនាយកក្រុមហ៊ុន៣ភីអិលអ៊ីហ្វាម (3PLE Farm) លោក អ៊ុន ប៊ុនថុល មានប្រសាសន៍ថា រោងចក្រផលិតសាច់មាន់របស់ក្រុមហ៊ុនលោក មានសមត្ថភាពអាចផលិតបានសាច់មាន់ប្រមាណប្រាំបួនតោនក្នុង១ថ្ងៃ និងបង្កើនសមត្ថភាពផលិតនៅឆ្នាំខាងមុខទៀត ដើម្បីបំពេញតម្រូវការនៅលើទីផ្សារកម្ពុជា រួមមានផ្សារទំនើប ភោជនីយដ្ឋាន និងសណ្ឋាគារធំៗជាដើម។ ជាពិសេសទៅទៀតនោះក្រុមហ៊ុនរបស់លោកក៏នឹងទទួលបានវិញ្ញាបនបត្រ Halal ដំបូងគេសម្រាប់អ្នកផលិតសាច់មាន់ នៅក្នុងប្រទេសកម្ពុជា ចេញដោយគណៈកម្មាធិការដឹកនាំហាឡាល់កម្ពុជា (CHSC) នៃក្រសួងពាណិជ្ជកម្ម។
លោកបានបន្ថែមថា ដើម្បីផលិតសាច់មាន់ ដែលមានគុណភាពនិងសុវត្ថិភាពសម្រាប់អ្នកបរិភោគក្រុមហ៊ុនបាននាំចូល និងបំពាក់នៅក្នុងរោងចក្រនូវគ្រឿងម៉ាស៊ីន និងឧបករណ៍កែច្នៃទាំងអស់ ដែលជាបច្ចេកវិទ្យាចុងក្រោយបំផុតរបស់ប្រទេសដាណឺម៉ាក។
លោកអគ្គនាយកបានបញ្ជាក់ទៀតថា រោងចក្ររបស់លោក គឺផ្តោតសំខាន់លើគុណភាព និងអនាម័យ ជាពិសេសសុវត្ថិភាពដល់អ្នកទទួលទានដែលប្រជាពលរដ្ឋខ្មែរត្រូវការចាំបាច់ណាស់សម្រាប់ផលិតផលបែបនេះ។
លោកអគ្គនាយកបង្ហើបឲ្យដឹងដែរថានាពេលអនាគត ក្រុមហ៊ុនរបស់លោកក៏មានគម្រោងនាំសាច់មាន់ចេញទៅលក់នៅលើទីផ្សារអន្តរជាតិផងដែរ ព្រោះផលិតផលសាច់មាន់របស់លោក បានមកពីសត្វមាន់ដែលត្រូវបានចិញ្ចឹម និងថែទាំ ដោយមិនប្រើសារធាតុបំប៉នហាមឃាត់ ដូចជាអង់ទីប៊ីយោទិចនិងអកម៉ូន ជាដើមឡើយ។
ក្រៅពីនេះ និយោជក កម្មករនិយោជិត និងបុគ្គលិកបច្ចេកទេសទាំងអស់របស់ក្រុមហ៊ុនសុទ្ធតែទទួលបានការបណ្តុះបណ្តាលយ៉ាងល្អពីសំណាក់អ្នកជំនាញខាងម្ហូបអាហារដែលទទួលបានវិញ្ញាបនប័ត្រ និងក្រុមគាំទ្របច្ចេកទេសមកពីប្រទេសនូវែលសេឡង់ ដោយក្រុមហ៊ុន ដែលមានឈ្មោះថា Biggs Food Consultancy Ltd. Linco Machineries from Demark និង Asia។
គួរបញ្ជាក់ថាបច្ចុប្បន្នរោងចក្រផលិតសាច់មាន់របស់ក្រុមហ៊ុនក្រុមហ៊ុន៣ភីអិលអ៊ីហ្វាម (3PLE Farm) បានផ្តល់ឱកាសការងារដល់ប្រជាពលរដ្ឋប្រមាណជិត ៣០០នាក់ជាមួយការផ្តល់អាហារពីរពេល កន្លែងស្នាក់នៅ ការបណ្តុះបណ្តាល ប្រាក់ឈ្នួលគោល ២០០ដុល្លារ និងប្រាក់លើកទឹកចិត្តទៅតាមច្បាប់ការងារ៕