វេទិកា Belt and Road៖ លោក ស៊ី ជីនពីង ប្រើពាក្យ "ឈ្នះឈ្នះ" ខណៈលោកពូទីន ប្រដូចគម្រោងនេះ ទៅនឹងចក្ខុវិស័យរុស្ស៊ី
- 2019-04-26 07:25:06
- ចំនួនមតិ 0 | ចំនួនចែករំលែក 0
វេទិកា Belt and Road៖ លោក ស៊ី ជីនពីង ប្រើពាក្យ "ឈ្នះឈ្នះ" ខណៈលោកពូទីន ប្រដូចគម្រោងនេះ ទៅនឹងចក្ខុវិស័យរុស្ស៊ី
ចន្លោះមិនឃើញ
ក្នុងវេទិកាខ្សែក្រវាត់ និងផ្លូវលើកទី២ នាក្រុងប៉េកាំង លោក ស៊ី ជីនពីង ប្រធានាធិបតីចិន បានថ្លែងថា ដោយផ្អែកលើគោលការណ៍សមភាព និងប្រយោជន៍ទៅវិញទៅមក គម្រោងខ្សែក្រវាត់ និងផ្លូវ (BRI) គឺផ្តោតលើការតភ្ជាប់ និងកិច្ចសហប្រតិបត្តិការ ដើម្បីសម្រេចនូវលទ្ធផល "ឈ្នះឈ្នះ" និងការអភិវឌ្ឍរួមគ្នា។
លោក ស៊ី ជីនពីង បានសង្កត់ធ្ងន់ពីការកសាងហេដ្ឋារចនាសម្ព័ន្ធប្រកបដោយគុណភាពខ្ពស់ តម្លៃសមរម្យ និងមិនងាយកើតមានហានិភ័យ សម្រាប់បណ្តាប្រទេសក្រោមគំនិតផ្តួចផ្តើម BRI នេះ។
ចំពោះការតភ្ជាប់ប្រជាជនវិញ លោកថា ចិននិងបណ្តាប្រទេស BRI នឹងផ្លាស់ប្តូរកម្មវិធីបណ្តុះបណ្តាល វប្បធម៌ វិទ្យាសាស្រ្ត និងស្រាវជ្រាវរួមគ្នា ក៏ដូចជាការផ្ទេរបច្ចេកវិទ្យារវាងគ្នា។ ចំណែកពាណិជ្ជកម្មវិញ ចិននិងបណ្តាប្រទេសក្រោមគម្រោងនេះ នឹងឈានដល់ការចុះកិច្ចព្រមព្រៀងពាណិជ្ជកម្មសេរី ហើយនឹងការមានកាត់បន្ថយពន្ធនាំចូលផងដែរ។
ក្នុងវេទិកានេះផងដែរ ប្រធានាធិបតីរុស្ស៊ី លោក វ្លាឌីមៀ ពូទីន បានលើកឡើងថា គម្រោងដ៏មហិមារបស់ចិននេះ គឺស្រដៀងនឹងចក្ខុវិស័យរបស់រុស្ស៊ីសម្រាប់តំបន់ "អឺរ៉ាស៊ី" ដែលមានគោលបំណងលើកកម្ពស់សន្តិភាព និងវិបុលភាពក្នុងតំបន់។
លោក ពូទីន បញ្ជាក់ថា វេទិកានេះ នឹងផ្តល់ឱ្យបណ្តាប្រទេសនានាមានឱកាសក្នុងការពិភាក្សាអំពីបញ្ហាដូចជាការអភិវឌ្ឍសកល និងសហប្រតិបត្តិការអន្តរជាតិ។ រុស្ស៊ី ពិតជាចាប់អារម្មណ៍ក្នុងការស្តាប់ និងស្វែងយល់ពីគោលដៅរបស់ចិន វិធីសាស្រ្តការអភិវឌ្ឍ និងទំនាក់ទំនងរបស់ចិន ជាមួយប្រទេសជិតខាង។
«BRI នឹងពង្រឹងកិច្ចសហប្រតិបត្តិការ ហើយផ្តល់នូវការអភិវឌ្ឍប្រកបដោយសុខុដុមនីយកម្មក្នុងតំបន់អឺរ៉ាស៊ី ហើយគោលដៅទាំងនេះ បាននាំយើងឱ្យមកដល់ទីនេះក្នុងក្រុងប៉េកាំង»។ នេះជាការថ្លែងរបស់លោក ពូទីន៕