អគ្គមេបញ្ជាការ ថាការធ្វើសមយុទ្ធហនុមានមាស មិនមែនយកទៅវាយប្រទេសជិតខាងនោះទេ

2019-05-08 07:24:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានថ្លែងបញ្ជាក់ថា "សមយុទ្ធហនុមានមាស ២០១៩" មិនមែនជាការគំរាមកំហែងទៅប្រទេសជិតខាង ឬយកទ័ពទៅវាយប្រទេសជិតខាងនោះទេ តែគឺជាការពង្រឹងទៅលើកងយុទ្ធពលខេមរភូមិន្ទ ដើម្បីពង្រឹងវិស័យការងារការពារជាតិ។ ការថ្លែងនេះ ធ្វើឡើងនៅក្នុងពិធីបិទ "សមយុទ្ធហនុមានមាស ២០១៩" កាលពីព្រឹកថ្ងៃទី៨ ខែឧសភា ឆ្នាំ២០១៩ នៅទីលានបាញ់គ្រាប់ពិតតេជោសែនជុំគិរីរបស់កងពលតូចលេខ៧០ ស្ថិតនៅភូមិត្រពាំងវែង ឃុំត្រពាំងវែង ស្រុកជុំគិរី ខេត្តកំពត។

លោកក៏បានប្រកាសដែរថា កងយុទ្ធពលខេមរភូមិន្ទ ប្រឆាំងដាច់ខាតពួកអមិត្តដែលមានបំណងចង់បំភ្លេចបំផ្លាញសន្តិភាព និងការអភិវឌ្ឍដែលកំពុងតែមាននាពេលបច្ចុប្បន្ន នៅក្នុងប្រទេសកម្ពុជា។

«សន្តិភាពមិនអាចរកបានដោយងាយដូច្នេះយើងទាំងអស់គ្នាត្រូវតែការពារឲ្យបានដាច់ខាតទោះក្នុងតម្លៃណាក៏ដោយ។ ទោះក្នុងលក្ខណៈណាក៏ដោយ ដែលប្រើប្រាស់នូវគ្រប់រូបភាពចំពោះដែលប្រើប្រាស់នូវគ្រប់រូបភាពចំពោះក្តី ជាបុគ្គលក្តីដែលចង់បំផ្លាញសន្តិភាព យើងត្រូវតែប្រឆាំងដាច់ខាត នឹងមានវិធានការផ្លូវច្បាប់ ចំពោះអ្នកណាចង់បំផ្លាញសន្តិភាព»។ នេះជាការលើកឡើងបន្ថែមរបស់លោកអគ្គមេបញ្ជាការ។

សូមជម្រាបថា សមយុទ្ធនេះចាប់ផ្តើមធ្វើឡើងកាលពីព្រឹកថ្ងៃទី៤ ខែឧសភា ឆ្នាំ២០១៩ ដោយមានកម្លាំងយោធាចូលរួមចំនួន ១៥៩៥នាក់។ អាវុធយុទ្ធភណ្ឌដែលប្រើប្រាស់ក្នុងសមយុទ្ធនេះ មានដូចជា កាំភ្លើងធំ ១៥២មម និង ១២២មម កាំភ្លើង ២៣មម កាំភ្លើង៣៧មម កាំភ្លើង BM21 RM70 រថក្រោះ រថពាសដែក រថយន្តពេទ្យ រថយន្តពន្លត់អគ្គិភ័យ រថយន្តដឹកជញ្ជូន និងឧទ្ធម្ភាគចក្រ៕