អបិយជំនឿ ៩ ដែលពលរដ្ឋកូរ៉េនៅបន្តជឿដល់សព្វថ្ងៃ

2019-05-11 02:48:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើតាមគេហទំព័រ Culture Trip ខាងក្រោមនេះ ជាអបិយជំនឿចំនួន ៥ ដែលពលរដ្ឋកូរ៉េ (ភាគច្រើនកូរ៉េខាងត្បូង) នៅបន្តជឿរហូតដល់សព្វថ្ងៃ៖

១. ការឲ្យអំណោយជាស្បែកជើងដល់គូស្នេហ៍ នឹងធ្វើឲ្យបែកបាក់គ្នា៖ គូស្នេហ៍មួយចំនួននៅកូរ៉េខាងត្បូងមានមួយចំនួន ជឿថា ការឲ្យអំណោយជាស្បែកជើង ធ្វើឲ្យដៃគូស្នេហានឹងដើរចេញពីពួកគេ។

២. កង្ហារអាចសម្លាប់អ្នក៖ នៅកូរ៉េខាងត្បូង មានពលរដ្ឋមួយចំនួន នៅបន្តជឿថា កង្ហារអាចធ្វើឲ្យមនុស្សស្លាប់បាន។ ការភ័យខ្លាចនេះ កើតចេញដំបូងៗបំផុត នៅឆ្នាំ ១៩២៧ នៅពេលកង្ហារទើបត្រូវបាននាំចូលជាលើកដំបូង ក្នុងឧបទ្វីបកូរ៉េ។ នៅពេលនោះកាសែតជាតិមួយបានចុះផ្សាយថា បច្ចេកវិទ្យាកង្ហារ នឹងធ្វើឲ្យអ្នកប្រើប្រាស់ចុកពោះ និងថប់ដង្ហើម ដោយសារតែវាអាចធ្វើឲ្យឈ្លក់ឧស្ម័នកាបូនិចក្នុងខ្លួនរបស់ពួកគេ។ លើសពីនេះ មានអ្នកខ្លះបានលើកឡើងថា រដ្ឋាភិបាលកូរ៉េខាងត្បូង បានថែមទាំងព្យាយាមឃោសនាជំនឿនេះទៀតផង ដើម្បីទប់ស្កាត់ពលរដ្ឋប្រើប្រាស់អគ្គិសនីច្រើន ក្នុងអំឡុងឆ្នាំ ១៩៧០ នៅពេលពិភពលោកបានជួបវិបត្តិថាមពល។

៣. ការហូបអាហារស្អិតធ្វើឲ្យការចងចាំបានល្អ៖ ក្នុងមជ្ឈដ្ឋានសិស្សនៅកូរ៉េមួយចំនួន ពេលជិតប្រលង ពួកគេត្រូវបានប្រទះឃើញទទួលទានអាហារស្អិតៗ ដូចជា នំ Yeot ជាដើម ព្រោះពួកគេជឿថា អាហារទាំងនេះ នឹងធ្វើឲ្យពួកគេចងចាំមេរៀនបានល្អ។ ផ្ទុយទៅវិញ ពួកគេជឿថា បើសិនហូបអាហាររាវៗ ដូចជាស៊ុប ជាដើម លទ្ធផលប្រលងរបស់ពួកគេក៏នឹងរាវទៅតាមហ្នឹងដែរ។

៤. សរសេរឈ្មោះដោយប្រើអក្សរពណ៌ក្រហម គឺមានន័យជាការប្រមាថអាយុជីវិត៖ កាលពីសម័យដើម នៅពេលគ្រួសារមានសមាជិកស្លាប់ ឈ្មោះរបស់ពួកគេត្រូវបានចុះក្នុងអក្សរពណ៌ក្រហម។ ឈ្មោះក្នុងអក្សរពណ៌ក្រហម មានន័យថា ឈ្មោះបុគ្គលដែលស្លាប់។ ដូច្នេះហើយ សម្រាប់ពលរដ្ឋកូរ៉េមួយចំនួន ការសរសេរឈ្មោះរបស់បុគ្គលដែលកំពុងរស់រានមានជីវិត ក្នុងអក្សរពណ៌ក្រហម គឺការប្រមាថអាយុជីវិត។

៥. យល់សប្ដិឃើញជ្រូក គឺនាំលាភ៖ សម្រាប់ប្រទេសជាច្រើន ជ្រូកត្រូវបានចាត់ទុកជាសត្វកខ្វក់។ ទោះជាយ៉ាងណា នៅកូរ៉េវិញ ពលរដ្ឋមានទស្សនៈវិជ្ជមានចំពោះសត្វមួយនេះ។ ដោយក្នុងភាសាកូរ៉េ ការបញ្ចេញសំឡេងពាក្យ "ជ្រូក" ស្រដៀងគ្នានឹង "ថ្មមានតម្លៃ"។ ហេតុនេះហើយ ជ្រូកគឺជាសត្វមួយដែលត្រូវបានពលរដ្ឋមួយចំនួននៅកូរ៉េ ជឿថា នាំចូលភោគទ្រព្យ សំបូរសប្បាយ និងរកស៊ីមានបាន។ ការយល់សប្ដិឃើញសត្វនេះ ត្រូវបានពួកគេជឿថា នឹងនាំមកនូវលាភ។

៦. លេខ ៤ គឺជាលេខស៊យ៖ ដូចចិនដែរ លេខ ៤ គឺជាលេខមិនល្អ ដោយសារការបញ្ចេញសំឡេងរបស់ពាក្យនេះ គឺស្រដៀងពាក្យ "ស្លាប់"។ ដូច្នេះហើយ បានជានៅតាមជណ្ដើរប្រអប់ជាច្រើននៅកូរ៉េខាងត្បូង អក្សរ F ត្រូវបានប្រើប្រាស់ជំនួសលេខ ៤ ដើម្បីតំណាងជាន់ទីបួន។

៧. កុំទុកកញ្ចក់នៅមុខទ្វារ៖ ពលរដ្ឋកូរ៉េមួយចំនួនជឿថា ការដាក់កញ្ចក់នៅមុខផ្ទះ ធ្វើឲ្យសំណាងល្អមិនអាចចូលផ្ទះបាន ដោយសារកញ្ចក់ផ្លាតចេញ។

៨. កក់សក់ថ្ងៃចូលឆ្នាំដេញសំណាងល្អចេញពីខ្លួន៖ ក្នុងថ្ងៃចូលឆ្នាំ ពលរដ្ឋកូរ៉េខ្លះ នឹងមិនកក់សក់ឡើយ ព្រោះពួកគេជឿថា ធ្វើបែបនេះ នាំឲ្យជ្រុះចេញនូវសំណាងល្អឆ្នាំថ្មី។ ចំពោះសិស្សកូរ៉េខ្លះវិញ មុនពេលប្រលងពួកគេនឹងមិនកក់សក់ឡើយ ព្រោះពួកគេជឿថា បើកក់ ជ្រុះបាត់មេរៀនដែលរៀនមុនប្រលង។

៩. ផ្លុំកញ្ចែពេលយប់គឺកោះហៅព្រលឹងខ្មោច៖ នៅកូរ៉េខាងត្បូង មានប្រជាជនខ្លះជឿថា ការផ្លុំកញ្ចែនៅពេលយប់ គឺតំណាងឲ្យការកោះហៅព្រលឹងខ្មោចបិសាច៕

ប្រែសម្រួល៖ ហ៊ីម រស្មី