សុខ ធី ថាមិនបាក់ទឹកចិត្តនោះទេ ព្រោះជួបកីឡាករខ្លាំងដូច Rodtang ទោះត្រូវសន្លប់លើកដំបូងក្នុងអាជីព
- 2019-05-11 03:45:59
- ចំនួនមតិ 0 | ចំនួនចែករំលែក 0
សុខ ធី ថាមិនបាក់ទឹកចិត្តនោះទេ ព្រោះជួបកីឡាករខ្លាំងដូច Rodtang ទោះត្រូវសន្លប់លើកដំបូងក្នុងអាជីព
ចន្លោះមិនឃើញ
អ្នកប្រដាល់គុនខ្មែរ សុខ ធី ត្រូវបានអាជ្ញាកណ្ដាលបញ្ឈប់ត្រឹមទឹកទី២ ក្រោយរងរបួសជើង ពេលប្រកួតទល់នឹង Rodtang នៅ ONE Championship កាលពីយប់ថ្ងៃទី១០ ខែឧសភា។ នេះជាលើកទី១ សម្រាប់ សុខ ធី ដែលត្រូវបានអាជ្ញាកណ្ដាលបញ្ឈប់បែបនេះ ក្រោយឆ្លងកាត់ការប្រកួតប្រមាណជាង ៣០០ដងកន្លងមក។
សុខ ធី បញ្ចាក់ថា៖ "ខ្ញុំអត់ខ្លាចគេទេ ហើយក៏អត់ស្ដាយក្រោយ ឬបាក់ទឹកចិត្តអីដែរ ព្រោះខ្ញុំបានជួបកីឡាករកំពូលម្នាក់ ដែលបានវាយឈ្នះកីឡាករថៃជាច្រើនមកហើយក្នុងប្រភេទគីឡូនេះ។ ការវាយជាមួយអ្នកល្អដូច Rodtang គឺអាចឲ្យខ្ញុំសិក្សាពីចំណុចខ្វះខាតរបស់ខ្លួនឯង យកទៅកែប្រែ ឬហ្វឹកហាត់ពង្រឹងបន្ថែមទៀត"។
សូមបញ្ជាក់ថា Rodtang បានទាត់ជើងសុខ ធី ឲ្យអាជ្ញាកណ្ដាលរាប់លើកទី១ នៅចុងទឹកទី១ មុនបន្តទាត់សន្ធាប់ថែមទៀតនៅទឹកទី២ រហូតធ្វើឲ្យសុខ ធី ដួល ងើបប្រកួតបន្តលែងកើត។ នេះជាជ័យជម្នះលើកទី៤ របស់ Rodtang ក្នុង ៤ប្រកួតនៅ ONE Championship ដែលធ្វើឲ្យកីឡាកររូបនេះ អាចនឹងឡើងប្រកួតដណ្ដើមខ្សែក្រវាត់នាប្រកួតបន្ទាប់។ ចំណែក សុខ ធី បានចាញ់ជាលើកទី៣ ក្នុង ៣ប្រកួតនៅស្ថាប័នធំបំផុតប្រចាំទ្វីបអាស៊ីមួយនេះ៕