សង្វៀន ONE: WARRIORS OF LIGHT នាថ្ងៃទី១០ ខែឧសភាកន្លងទៅនេះ ក្រុងបាងកក បានទាក់ភ្នែកអ្នកតាមដានជាច្រើន​ប្រទេស ក្នុងនោះ​ក៏មាន​អ្នកគាំទ្រ​ពីកម្ពុជា​ជាច្រើន​ផងដែរ។ ព្រឹត្តិការណ៍នេះ មានរឿង​គួរ​ឲ្យ​ចាប់អារម្មណ៍ ចំនួន ៣ ដែល​មាន​ដូចខាងក្រោម៖

១. កីឡាករ​គុនខ្មែរ សុខ ធី សន្លប់​ជា​លើក​ដំបូង​ក្នុងអាជីព ក្រោយ​ចាញ់ Rodtang នៅទឹកទី២

ជើងខ្លាំងតំណាងឲ្យកម្ពុជា សុខ ធី ហៅ កាកា ចុះចាញ់ត្រឹមទឹកទី២ បន្ទាប់ពី Rodtang ទាត់បំបែកកង់ចុងទឹកទី១ និងបន្តទៅប្រកួតលែងកើតនៅដើមទឹកទី២។ កាកា មិនអាចបន្តការប្រកួតទៀតបានទេ ក្រោយពីការទាត់សន្ធាប់របស់កីឡាករប្រដាល់ថៃដែលមានរហស្សនាមថា «The Iron Man» នៅដើមទឹកទី២។ បន្ទាប់ពីការប្រកួត សុខ ធី បានថ្លែងថា ៖« Rodtang គេនៅកម្រិត A យើង​បានត្រឹម B ប៉ុណ្ណោះ។ ប៉ុន្តែខ្ញុំបានវ៉ៃជាមួយជើងខ្លាំងលំដាប់ A របស់ប្រទេសថៃ គឺ ល្អណាស់។ ខ្ញុំដឹងពីចំណុចខ្វះខាតត្រូវហ្វឹកហាត់បន្ថែមឲ្យខ្លាំងដូចគេ។ ខ្ញុំនឹងប្រើពេល ២ ទៅ ៣ ឆ្នាំទៀតដើម្បីដល់កម្រិតនេះ»។ ជាមួយគ្នានោះ គ្រូបង្វឹក ហ៊ុន ច័ន្ទរាជ្យ បានបញ្ជាក់ថា Rodtang ល្អ លឿន និង រឹងខ្លាំង ហើយគេសឹងលំដាប់លេខ១នៅស្រុកថៃ និង ជាលំដាប់​លេខ១ក្នុងពិភពលោកដែរក្នុងប្រភេទគីឡូនេះ។ លោកបញ្ជាក់ថា តាមពិតចុងទឹកទី១ គឺឈឺធ្ងន់ទៅហើយ ប៉ុន្តែទឹកចិត្តកីឡាករនៅស៊ូទៀតមិនចុះចាញ់ងាយៗ។

Rodtang វាយ​សំដៅ​មុខ សុខ ធី (រូបភាព៖ ONE Championship)

២. កីឡាករថៃ Nong-O Kaiyanghadao ការពារ​ខ្សែក្រវាត់ ONE Bantamweight Muay Thai World Champion

Nong-O Kaiyanghadao នៅតែរក្សាខ្សែក្រវាត់ ONE Bantamweight Muay Thai World Champion ដោយឈ្នះពិន្ទុជាឯកច្ឆន្ទលើកីឡាករសញ្ជាតិជប៉ុន Hiroaki Suzuki នៅសង្វៀន ONE: WARRIORS OF LIGHT។ ដោយចាប់ផ្ដើមទឹកដំបូង Nong-O បានគ្រប់គ្រងស្ថានការយ៉ាងល្អដោយការទាត់ចំដើមទ្រូង របស់ Hiroaki ជាច្រើនជើង ដែលធ្វើឲ្យកក្រើករេញ Impact Arena នាក្រុងបាងកក។ Hiroaki កាន់តែដើរចូលកាន់តែត្រូវរន្ទះជើងរបស់ Nong-O ដែលជើងខ្លាំងម្ចាស់ខ្សែក្រវាត់៣នៅសង្វៀន Lumpinee របស់ថៃ។ នៅទឹកទី២ មិនខុសទឹកទី១ ទេ ដោយកីឡាករសញ្ជាតិជប៉ុនវ័យ ៣៤ឆ្នាំ នៅតែដើរចូលវាយដដែលដើម្បីយកពិន្ទុវិញ ប៉ុន្តែនៅតែរងការទាត់ពេញទំហឹងរបស់ Nong-O រួមទាំងកណ្ដាប់វ៉ៃការពារទៀតផង។ ពេលអ្នកក្បាច់គុនជនជាតិជប៉ុន ដើរចូលកាន់តែច្រើន កាន់តែរងគ្រោះថ្នាក់ពីសំណាក់អ្នកលេងមួយថៃរបស់ម្ចាស់ផ្ទះ។ Nong-O បានវ៉ៃបក និងទាត់ឲ្យ Hiroaki ដួលម្ដងម្កាលទៀតផង។ លទ្ធផលសម្រេចចុងក្រោយ កីឡាករជប៉ុនមិនអាចដណ្ដើមខ្សែក្រវាត់ពីកីឡាករថៃបានឡើយ។

Nong-o ការពារ​ខ្សែក្រវាត់​បានសម្រេច (រូបភាព៖ ONE Championshiip)

៣. កីឡាករ​ថៃ Petchdam Petchyindee Academy គ្រងខ្សែក្រវាត់ ONE Flyweight Kickboxing World Champions*

Petchdam Petchyindee Academy បានក្លាយជា​ម្ចាស់​ខ្សែក្រវាត់ ONE Flyweight Kickboxing World Champions ក្រោយឈ្នះកីឡាករសញ្ជាតិអាល់ហ្សេរី Elias Mahmoudi។ ចូលទឹកទី១ Elias បានច្រឡំប្រើកែងដាក់កីឡាករម្ចាស់ផ្ទះ ដែលធ្វើឲ្យអាជ្ញាកណ្ដាលពិន័យកាតលឿងកាត់ពិន្ទុ។ បន្ទាប់មក Elias ខំដើរចូលវ៉ៃដើម្បីស្ដារពិន្ទុ ប៉ុន្តែ Petchdam ដកថយវាយបកចូលមួយៗយ៉ាងដំណំដែរ។ Elias មិនខ្លាចនឹង Petchdam ទេ ដោយដើរចូលវ៉ៃនិងប្រើក្បាច់ រវ៉ែញឹកញាប់ ប៉ុន្តែ Petchdam ទាត់កាត់ និងប្រើកណ្ដាប់ដៃឆ្វេងបានល្អនៅទឹកទី ២, ៣ និង ទឹក៤។ នៅដើមទឹកទី៥ Petchdam បានទាត់ជើងឆ្វេងរបស់ខ្លួនចំក្បែរប្រដាប់ការពាររបស់ Elias។ ហើយ Elias ត្រូវសម្រាក ៣ នាទីដើម្បីពិនិត្យមើលថាតើអាចប្រកួតបានទៀត ឬ យ៉ាងណា។ ទីបំផុតចៅក្រមសម្រេចឲ្យ Petchdam Petchyindee Academy ឈ្នះការប្រកួត ក្រោយ Elias មិនអាច​បន្ត​ការប្រកួតបាន៕

Petchdam ក្រោយឈ្នះខ្សែក្រវាត់ (រូបភាព៖ ONE Championship)