ផ្ទុះឆេះឃ្លាំងផលិតប្រេងម៉ាស៊ូតមួយកន្លែងនៅកំពង់ស្ពឺ

2019-05-21 10:48:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាល្ងាចថ្ងៃទី២១ ខែឧសភានេះ ឃ្លាំងស្លប្រេងម៉ាស៊ូតមួយកន្លែងនៅចំណុចភូមិដំណាក់ត្រាច ឃុំដំបូងរូង ស្រុកភ្នំស្រួច ខេត្តកំពង់ស្ពឺ បានផ្ទុះឆេះយ៉ាងសន្ធោសន្ធៅ។ រថយន្តពន្លត់អគ្គីភ័យកំពុងចេញអន្តរាគមន៍។

ការឆេះនេះ តាំងពីម៉ោងជាង៤រសៀល រហូតមកដល់៥:៣០នាទីល្ងាចនេះ នៅមិនទាន់រលត់នៅឡើយទេ។ យ៉ាងណាក្ដី ការឆេះនេះ មិនបណ្តាលឲ្យមានអ្នកស្លាប់ ឬរបួសនោះទេ។

ស្នងការខេត្តកំពង់ស្ពឺបានឲ្យដឹងថា ទីតាំងដែលឆេះ គឺជាទីតាំងផលិតប្រេងម៉ាស៊ូត (ទិញប្រេងម៉ាស៊ីនចាស់ៗដែលច្រាលចោលពីឡាន យកទៅរំងាស់ចេញទៅជាប្រេងម៉ាស៊ូត)។ ទីតាំងនេះ គឺមិនមានច្បាប់អនុញ្ញាតត្រឹមត្រូវនោះទេ ដោយកាលពីពេលថ្មីៗនេះ នាយកដ្ឋាននគរបាលសេដ្ឋកិច្ច សហការជាមួយស្នងការនគរបាលខេត្តកំពង់ស្ពឺ ធ្លាប់បានចុះបង្ក្រាប និងបញ្ជូនទៅតុលាការថែមទៀតផង ដោយទីតាំងនេះ ត្រូវបានផ្អាកជាបណ្តោះអាសន្ន។ ម្ចាស់ទីតាំងនេះ សង្ស័យថាបានលួចផលិតទៀត ទើបបណ្តាលឲ្យមានការឆាបឆេះប្រេងម៉ាស៊ូត។