មន្រ្តីជាន់ខ្ពស់បក្សកុម្មុយនីស្តវៀតណាម៖ ការរីកចម្រើនរបស់កម្ពុជា គឺជាការរីកចម្រើនរបស់វៀតណាម

2019-05-29 01:31:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Tran Quoc Vuong គណៈលេខានៃគណៈកម្មាធិការមជ្ឈឹមបក្សកុម្មុយនីស្តវៀតណាម បានកោតសរសើរពីការរីកចម្រើនរបស់ប្រទេសកម្ពុជា ហើយបានបញ្ជាក់ថា ការរីកចម្រើនរបស់ប្រទេសកម្ពុជា គឺជាការរីកចម្រើនរបស់ប្រទេសវៀតណាម។ លោកថ្លែងដូច្នេះក្នុងជំនួបជាមួយសម្តេច ហេង សំរិន ប្រធានរដ្ឋសភាកម្ពុជា កាលពីថ្ងៃទី២៨ ខែឧសភា ឆ្នាំ២០១៩ ក្នុងពេលដែលសម្តេចបំពេញទស្សនកិច្ចនៅវៀតណាម។

លោក Tran Quoc Vuong ក៏បានបង្ហាញក្តីរីករាយដែលឃើញរដ្ឋសភាកម្ពុជា និងវៀតណាម មានទំនាក់ទំនង និងកិច្ចសហប្រតិបត្តិការយ៉ាងល្អនៅក្នុងក្របខណ្ឌទ្វេភាគី និងពហុភាគី។ ទំនាក់ទំនងដ៏ល្អនេះ គឺជាផ្នែកសំខាន់ ដែលបានទ្រទ្រង់ដល់ការអភិវឌ្ឍរបស់ប្រទេសកម្ពុជា និងវៀតណាម។

ឆ្លៀតនៅក្នុងឱកាសនោះ សម្តេច ហេង សំរិន បានចូលរួមរំលែកទុក្ខដ៏ក្រៀមក្រំ និងសោកស្តាយបំផុត ជាមួយបក្ស រដ្ឋ និងប្រជាជនវៀតណាម ចំពោះការបាត់បង់អ្នកដឹកនាំមួយរូបដ៏ឆ្នើមរបស់ខ្លួន គឺលោក ឡេ ឌឹកអាញ់ អតីតប្រធានរដ្ឋវៀតណាម។ សម្តេចបានគូសបញ្ជាក់ថា ការបាត់បង់រូប លោក ឡេ ឌឹកអាញ់ គឺជាការបាត់បង់មិត្តដ៏ជិតស្និទ្ធរបស់កម្ពុជា ដែលបានរួមចំណែកដ៏ធំធេងជួយរំដោះប្រជាជនកម្ពុជា ពីរបបប្រល័យពូជសាសន៍ ប៉ុល ពត ជួយស្តារ កសាង និងអភិវឌ្ឍប្រទេសកម្ពុជាឡើងវិញ។

សម្តេចប្រធានរដ្ឋសភា បានវាយតម្លៃខ្ពស់ចំពោះភាពជោគជ័យ និងសមិទ្ធផលនានា ដែលបក្ស រដ្ឋ រដ្ឋាភិបាល និងប្រជាជនវៀតណាមសម្រេចបាន ក្នុងការកសាង និងអភិវឌ្ឍសេដ្ឋកិច្ចសង្គម មានការរីកចម្រើនយ៉ាងឆាប់រហ័ស។ សម្តេចមានជំនឿមុតមំាថា ក្រោមការដឹកនាំរបស់បក្សកុម្មុយនីស្ត វៀតណាមនឹងសម្រេចបាននូវសមិទ្ធផលថ្មីៗថែមទៀត ក្នុងការអភិវឌ្ឍប្រទេសឱ្យក្លាយជាប្រទេសឧស្សាហកម្មជឿនលឿន ហើយកិត្យានុភាពរបស់វៀតណាមលើឆាកអន្តរជាតិ ត្រូវបានលើកកម្ពស់ជាបន្តបន្ទាប់៕

អត្ថបទ និងរូបថត៖ រដ្ឋសភាជាតិកម្ពុជា