សម្តេច ហ៊ុន សែន៖ រូបទង់ជាតិជប៉ុនលើក្រដាសប្រាក់ខ្មែរ ៥០០រៀល គឺជាករណីដ៏កម្របំផុត
- 2019-05-29 07:56:51
- ចំនួនមតិ 0 | ចំនួនចែករំលែក 0
សម្តេច ហ៊ុន សែន៖ រូបទង់ជាតិជប៉ុនលើក្រដាសប្រាក់ខ្មែរ ៥០០រៀល គឺជាករណីដ៏កម្របំផុត
ចន្លោះមិនឃើញ
សម្តេច ហ៊ុន សែន បានលើកឡើងថា ក្រដាសប្រាក់ខ្មែរ ៥០០រៀលដែលមានរូបស្ពាន និងទង់ជាតិជប៉ុន គឺជាករណីកម្របំផុតដែលទង់ជាតិនៃប្រទេសមួយ បានផុសឡើងនៅលើក្រដាសប្រាក់នៃប្រទេសមួយទៀត។ ការថ្លែងនេះ ក្នុងសិក្ខាសាលាស្តីអំពី «បរិយាកាសវិនិយោគនៅកម្ពុជា» នាព្រឹកថ្ងៃទី២៩ ខែឧសភា ឆ្នាំ២០១៩ នៅក្រុងតូក្យូ ប្រទេសជប៉ុន។
ក្នុងសិក្ខាសាលានេះ សម្តេច ហ៊ុន សែន ក៏បានលើកឡើងពីការផ្តល់ជំនួយរបស់ជប៉ុន ក្នុងការអភិវឌ្ឍប្រទេសកម្ពុជាផងដែរ។ ក្នុងក្របខណ្ឌហិរញ្ញប្បទានសហប្រតិបត្តិការផ្លូវការ គិតចាប់ពីឆ្នាំ១៩៩២ ដល់ឆ្នាំ២០១៨ ជប៉ុនបានផ្តល់ហិរញ្ញប្បទានសហប្រតិបតិ្តការផ្លូវការយ៉ាងច្រើនសន្ធឹកសន្ធាប់ប្រមាណជាង ២,៨ពាន់លានដុល្លារអាមេរិក ស្មើនឹងប្រមាណ ១៥% នៃហិរញ្ញប្បទានសរុបរបស់ដៃគូអភិវឌ្ឍន៍ទាំងអស់ សម្រាប់ចូលរួមអភិវឌ្ឍសេដ្ឋកិច្ច-សង្គមកម្ពុជា។ ទន្ទឹមនឹងនេះ ជប៉ុនបាននឹងកំពុងគាំទ្រលើគម្រោងហេដ្ឋារចនាសម្ព័ន្ធសំខាន់ៗដូចជា ការកសាងស្ពានគីហ្សូណា, ស្ពានត្សឺបាសា, ការធ្វើឱ្យប្រសើរឡើងនូវកំណាត់ផ្លូវជាតិលេខ១ និងលេខ៥, ការអភិវឌ្ឍស្ថានីយកុងតឺន័រថ្មី កំពង់ផែស្វយ័តក្រុងព្រះសីហនុ, និងការធ្វើឱ្យប្រសើរឡើងនូវការការពារទឹកជំនន់រាជធានីភ្នំពេញជំហានទី៤ជាដើម។
សូមរំលឹកថា ក្រដាសប្រាក់ ៥០០រៀលគំរូថ្មីនេះ ត្រូវបានរាជរដ្ឋាភិបាលកម្ពុជា សម្រេចឱ្យចេញផ្សាយ ធ្វើចរាចរ និងប្រើប្រាស់នៅទូទាំងប្រទេស កាលពីខែមករា ឆ្នាំ២០១៥។
-ផ្ទៃខាងមុខ៖ ផ្នែកកណ្តាលនៃក្រដាសប្រាក់នេះ គឺមានរំលេចឡើងនូវព្រះឆាយាល័ក្ខណ៍នៃព្រះករុណាព្រះបាទសម្តេចព្រះបរមនាថ នរោត្តម សីហមុនី។
-ចំណែកផ្ទៃខាងក្រោយ៖ ផ្នែកកណ្តាល គឺមានរំលេចឡើងជាស្ពានគីហ្សូណា ឆ្លងកាត់ទន្លេមេគង្គ នៅក្រុងកំពង់ចាម ហើយផ្នែកខាងស្តាំ មានរូបស្តូបអនុស្សាវរីយ៍មិត្តភាពកម្ពុជា-ជប៉ុន ដែលស្ថិតនៅក្បាលស្ពានគីហ្សូណា។ ដោយឡែកផ្នែកខាងឆ្វេង មានរូបភាពព្រាលៗនៃផ្នែកកណ្តាលរបស់ស្ពានឆ្លងកាត់ទន្លេមេគង្គនៅអ្នកលឿង (ស្ពានត្សឺបាសា) ផងដែរ៕