វៀតណាម នឹងប្រឈមមុខការខ្វះថាមពលអគ្គិសនីនាពេលខាងមុខដ៏ខ្លី

2019-05-30 03:38:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាពេលអនាគតដ៏ខ្លីខាងមុខនេះ វៀតណាមអាចនឹងប្រឈមមុខការខ្វះខាតថាមពលអគ្គិសនី ដោយសារតែកំណើនតម្រូវការ។ នេះបើតាមការចុះផ្សាយរបស់ Vietnam News នៅថ្ងៃទី៣០ ខែឧសភា ឆ្នាំ២០១៩។

តាមការលើកឡើងរបស់អ្នកជំនាញក្នុងសិក្ខាសាលាមួយនៅទីក្រុងហូជីមិញ កាលពីថ្ងៃទី២៨ ខែឧសភា ឆ្នាំ២០១៩ ស្តីពីការធានាសន្តិសុខថាមពល ឱ្យដឹងថា ប្រភពថាមពលវារីអគ្គិសនីជាមួយតម្លៃទាបបំផុត ត្រូវបានប្រើប្រាស់ទាញយកប្រយោជន៍ដល់សក្តានុពលពេលលេញរបស់វាទៅហើយ ចំណែកថាមពលឧស្ម័ន ក៏ត្រូវអស់បន្តិចម្តងៗផងដែរ ដោយមិនអាចធានាបានឡើយ។

ទំនប់វារីអគ្គិសនីមួយនៅវៀតណាម (រូបថត៖ វិបសាយ Hydroworld)

ចំពោះថាមពលកកើតឡើងវិញនៅក្នុងប្រទេសវៀតណាម គឺមានការវិនិយោគតិចតួចតែប៉ុណ្ណោះនៅក្នុងគម្រោងថាមពលខ្យល់ ឯថាមពលសូឡា មានការវិនិយោគកើនឡើង តែពឹងផ្អែកលើអាកាសធាតុ។ គម្រោងថាមពលសូឡាប្រមាណ ៣៣២គម្រោង នឹងអាចផលិតអគ្គិសនីបានជាង ២,៦២ម៉ឺនមេហ្គាវ៉ាត់ នៅត្រឹមឆ្នាំ២០៣០។

លោក Le Van Luc អនុប្រធាននាយកដ្ឋានថាមពលអគ្គិសនី និងថាមពលកកើតឡើងវិញ នៃក្រសួងឧស្សាហកម្ម និងពាណិជ្ជកម្មវៀតណាម បានលើកឡើងថា ប្រភពថាមពលវារីអគ្គិសនី ត្រូវបានប៉ាន់ប្រមាណថា នឹងថយចុះពីជាង ២៥ភាគរយ នៅក្នុងឆ្នាំ២០២០ មកនៅត្រឹម ១២,៤ភាគរយ នៅក្នុងឆ្នាំ២០៣០។ ចំណែកប្រភពថាមពលធ្យូងថ្ម នឹងកើនឡើងបន្ថិចពី ៤៩,៣ភាគរយ ទៅ ៥៣,២ភាគរយ។

យោងតាមផែនការថាមពលវៀតណាម បង្ហាញថា ចាប់ពីឆ្នាំ២០១៦ ដល់ ២០២០ ថាមពលអគ្គិសនីសរុប ដែលមកពីប្រភពថាមពលធ្យូងថ្ម គឺមានចំនួន ១៣ ៨៥០មេហ្គាវ៉ាត់, ២០២១-២០២៥ កើនឡើងដល់ ២១ ៦០០មេហ្គាវ៉ាត់ តែថយចុះវិញមកត្រឹម ៨៧០០មេហ្គាវ៉ាត់ ក្នុងឆ្នាំ២០២៦-២០៣០។

អ្នកជំនាញលើកឡើងថា ត្រឹមឆ្នាំ២០៣០ រោងចក្រថាមពលធ្យូងថ្ម នឹងចូលរួមចំណែក ៥៣,២ភាគរយនៃថាមពលអគ្គិសនីសរុបរបស់វៀតណាម។ ដូច្នេះវានឹងក្លាយជាជម្រើសដ៏ល្អបំផុតទាំងតម្លៃទាប និងប្រភពដែលអាចជឿជាក់បាន ប៉ុន្តែបញ្ហាប្រឈមនោះគឺខ្វះមូលនិធិ ការវិនិយោគ និងប៉ះពាល់ដល់បរិស្ថានផងដែរ៕

ប្រភព៖ Vietnam News ប្រែសម្រួល៖ សំភី