រកឃើញជើងឯក Champions League ឆ្នាំនេះហើយ ព្រមទាំងកំណត់ត្រាថ្មីសំខាន់ៗ

2019-06-02 00:13:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហង្សក្រហម Liverpool បានក្លាយជាជើងឯក UEFA Champions League ឆ្នាំ២០១៩នេះ បន្ទាប់ពីយកឈ្នះក្រុមមកពីអង់គ្លេសដូចគ្នាគឺមាន់ខ្នាយមាស Tottenham Hotspur ក្នុងលទ្ធផល ២-០ ក្នុងវគ្គផ្តាច់ព្រ័ត្រកាលពីយប់មិញ ដែលធ្វើឡើងនៅទីក្រុងម៉ាឌ្រីត ប្រទេសអេស្ប៉ាញ។

២គ្រាប់នេះ ធ្វើបានដោយ Mohamed Salah ១គ្រាប់ជាការស៊ុតបាល់ប៉េណាល់ទីនៅនាទី២ និង១គ្រាប់ទៀតជាការស៊ុតបញ្ចូលទីដោយ Divock Origi នៅនាទី៨៧។ ១គ្រាប់របស់ Salah នេះ គឺជាគ្រាប់បាល់លឿនបំផុតទី២ នៅវគ្គផ្តាច់ព្រ័ត្រ UCL ពោលគឺត្រឹមនាទី ១:៤៨ តាមពីក្រោយ Paolo Maldini ដែលធ្វើបានឱ្យ AC Milan នៅនាទី ០០:៥០ ពេលប្រកួតទល់នឹង Liverpool ក្នុងឆ្នាំ២០០៥។

កីឡាករសញ្ជាតិអេហ្ស៊ីប Salah បានក្លាយជាកីឡាករអាហ្វ្រិកទី៥ ដែលរកគ្រាប់បាល់បាននៅក្នុងវគ្គផ្តាច់ព្រ័ត្រពានអឺរ៉ុប បន្ទាប់ពី Rabah Madjer, Samuel Eto'o, Didier Drogba និង Sadio Mane។ ឯ Origi ក្លាយជាកីឡាករបែលហ្សិកទី២ ដែលរកគ្រាប់បាននៅវគ្គផ្តាច់ព្រ័ត្រ Champions League បន្ទាប់ពី Yannick Carrasco ដែលរកគ្រាប់បាល់បានឱ្យ Atletico Madrid ពេលប៉ះ Real Madrid នៅក្នុងឆ្នាំ២០១៦។

ជ័យជម្នះនេះ បានធ្វើឱ្យ Liverpool លើកពាន Champions League ជាលើកទី៦ តាមពីក្រោយតែពីរក្រុមប៉ុណ្ណោះគឺ Real Madrid ដែលឈ្នះពាននេះ ១៣ដង និង AC Milan ដែលឈ្នះពាន ៧ដង។ នេះក៏ជាការស្តារជ័យជម្នះឡើងវិញផងដែរ បន្ទាប់ពីបានត្រឹមជាជើងឯករងកាលពីឆ្នាំមុន ដោយប្រកួតចាញ់ Real Madrid នៅវគ្គផ្តាច់ព្រ័ត្រ។

Klopp គឺជាអ្នកចាត់ការទូទៅរបស់ក្រុម Liverpool ទី៤ ដែលជួយឱ្យក្រុមនេះឈ្នះពានអឺរ៉ុប បន្ទាប់ពីលោក Bob Paisley, លោក Joe Fagan និងលោក Rafael Benitez។ លោកក៏ជាអ្នកចាត់ការក្រុមទូទៅសញ្ជាតិអាល្លឺម៉ង់ទី៥ ដែលដឹកនាំក្រុមឈ្នះពានអឺរ៉ុបផងដែរ បន្ទាប់ពីលោក Dettmar Cramer, លោក Jupp Heynckes, លោក Ottmar Hitzfeld និងលោក Udo Lattek ប៉ុន្តែលោកគឺជនជាតិអាល្លឺម៉ង់ទី២ ដែលជួយក្រុមមិនមែននៅលីគអាល្លឺម៉ង់ លើកពានអឺរ៉ុប (ទី១ គឺលោក Heynckes នៅ Real Madrid)។

ក្នុងការប្រកួតនេះ Liverpool គ្រប់គ្រងបាល់ ៣៥% ឯ Spurs ៦៥%។ ការណ៍នេះ បានធ្វើឱ្យក្រុមហង្សក្រហម ក្លាយជាក្រុមទី២ ដែលគ្រប់គ្រងបាល់បានតិចជាងគូប្រកួតនៅវគ្គផ្តាច់ព្រ័ត្រ Champions League ប៉ុន្តែឈ្នះជើងឯក។ ក្រុម Inter Milan ធ្លាប់ធ្វើបានដូច្នេះក្រោមការដឹកនាំរបស់លោក Jose Mourinho ពេលប្រកួតឈ្នះ Bayern Munich ក្នុងឆ្នាំ២០១០។

នេះគឺជាលើកដំបូងហើយក្នុងប្រវត្តិសាស្រ្តវគ្គផ្តាច់ព្រ័ត្រ Champions League ដែលគ្មានការពិន័យកាតណាមួយសោះឡើយ៕