ស.ស.ស.ក ចេញសេចក្តីថ្លែងការណ៍ រឿងមន្រ្តីគយច្រកព្រែកចាកប្តឹងអ្នកកាសែតទារសំណង១០ម៉ឺនដុល្លារ

2019-06-05 01:11:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហភាពសហព័ន្ធអ្នកសារព័ត៌មានកម្ពុជា កាលពីថ្ងៃទី០៤ ខែមិថុនា បានចេញសេចក្តីថ្លែងការណ៍ពាក់ព័្ធករណីអ្នកសារព័ត៌មាន Online ចំនួន៨រូប រួមទាំងសហការីផ្សេងទៀត ត្រូវបានមន្រ្តីគយច្រកព្រែកចាក ខេត្តកំពត ដាក់ពាក្យប្តឹងទៅកាន់ព្រះរាជអាជ្ញាអមសាលាដំបូងខេត្តកំពត ពីបទ«ជេរប្រមាថចំពោះអ្នករាជការសាធារណៈ, បទប៉ះពាល់ដល់សិទ្ធិខាងរូបភាពនៃបុគ្គល និង បទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ» ដោយទាមទារសំណងជាប្រាក់ចំនួន ១០ម៉ឺនដុល្លារ។

លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា ថ្លែងក្នុងសន្និសីទកាសែតមួយនាពេលកន្លងមក

ករណីប្តឹងផ្តល់នេះ បានធ្វើឡើងបន្ទាប់ពីមានហេតុការណ៍កើតឡើងនាថ្ងៃទី២៨ ខែឧសភា ឆ្នាំ២០១៩ នៅបរិវេណប៉ុស្ដិ៍គយព្រែកចាក ព្រំប្រទល់កម្ពុជា-វៀតណាម ស្ថិតក្នុងខេត្តកំពត រវាងមន្ដ្រីគយ និងអ្នកសារព័ត៌មាន Online មួយក្រុម ដែលបានចុះយកព័ត៌មានពាក់ព័ន្ធការដឹកទំនិញឆ្លងកាត់ប៉ុស្ដិ៍គយព្រែកចាក ខេត្តកំពត។

សហភាពសហព័ន្ធអ្នកសារព័ត៌មានកម្ពុជា បានស្នើសុំដល់ភាគីពាក់ព័ន្ធ ព្រមទាំងស្ថាប័នអនុវត្តច្បាប់ ពិចារណាប្រើប្រាស់ ច្បាប់ស្តីពីរបបសារព័តមាន ដើម្បីអនុវត្តលើបណ្តឹងដែលពាក់ព័ន្ធអ្នកសារព័ត៌មាន ហើយក៏ស្វាគមន៍ផងដែរ ប្រសិនបើភាគីទាំងសង្ខាង ឈានដល់ ការព្រមព្រៀងផ្សះផ្សា និងទម្លាក់ចោលពាក្យបណ្តឹង។

ជាមួយគ្នានេះ សហភាពសហព័ន្ធអ្នកសារព័ត៌មានកម្ពុជា បានធ្វើការអំពាវនាវឱ្យអ្នកសារព័ត៌មាន មេត្តាប្រកាន់ឲ្យបានខ្ជាប់ខ្ជួននូវ ក្រមសីលធម៌វិជ្ជាជីវៈសារព័ត៌មាន ជាពិសេសនៅក្នុងពេលចុះយក ព័ត៌មាន ដោយគប្បីជៀសវាងនូវ ការគំរាមកំហែង ការបំពាន ការរារាំងតួនាទីសមត្ថកិច្ចមន្ត្រីរាជការ សាធារណៈ ព្រមទាំងមិនរំលោភបំពានលើរូបរាងកាយ សិទ្ធិ តម្លៃ និងអត្តសញ្ញាណបុគ្គលឯកជន។ ហើយស្នើសុំដល់ផ្នែកពាក់ព័ន្ធ រួមទាំងមន្ត្រីអង្គភាពរដ្ឋ ជៀសវាងការប្រើពាក្យសម្តីប្រមាថ ការប៉ះពាល់រាងកាយ ការឆក់យក សម្ភារៈឧបករណ៍យកព័ត៌មាន និងបំផ្លាញចោលសម្ភារៈនានាទាំងនោះរបស់អ្នកយកព័ត៌មាន ដោយសហការពេញលេញផ្តល់ព័ត៌មានដល់អ្នកសារព័ត៌មាន ដើម្បីរួមគ្នាលើកកម្ពស់ «សិទ្ធិទទួល បានព័ត៌មាន» និងលើកកម្ពស់ការផ្សព្វផ្សាយព័ត៌មានដែលមានគុណប្រយោជន៍ដល់សាធារណជន។

សហភាពសហព័ន្ធអ្នកសារព័ត៌មានកម្ពុជាបានបញ្ជាក់ថា ខ្លួននឹងបន្តតាមដានដោយយកចិត្តទុកដាក់បំផុតទៅលើនីតិវិធី និងចំណាត់ការនានារបស់តុលាការចំពោះរឿងក្តីខាងលើនេះ៕

អត្ថបទ៖ សោភា