វៀតណាម និងកម្ពុជា ប្រតិកម្មនឹងនាយករដ្ឋមន្រ្តីសិង្ហបុរី ដែលថា «វៀតណាមឈ្លានពានចូលកម្ពុជា»

2019-06-05 02:06:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងការបរទេសវៀតណាម បានបញ្ចេញប្រតិកម្មចំពោះការលើកឡើងរបស់លោក Lee Hsien Loong នាយករដ្ឋមន្រ្តីសិង្ហបុរីដែលថា ការធ្វើអន្តរាគមន៍របស់យោធាវៀតណាមនៅកម្ពុជា ដើម្បីប្រយុទ្ធនឹងខ្មែរក្រហម ជាការ «ឈ្លានពាន»។ នេះបើតាមការចុះផ្សាយរបស់ Vietnam Express កាលពីថ្ងៃទី៤ ខែមិថុនា ឆ្នាំ២០១៩។

លោកស្រី Le Thi Thu Hang ថ្លែងនាពេលកន្លងមក (រូបថត៖ Sputnik News)

លោកស្រី Le Thi Thu Hang អ្នកនាំពាក្យក្រសួងការបរទេសវៀតណាម បានថ្លែងថា វៀតណាមមានការសោកស្តាយចំពោះការលើកឡើងបែបនេះ ហើយថាវាមិនបានឆ្លុះបញ្ចាំងពីប្រវត្តិសាស្រ្តពិតឡើយ ដែលបណ្តាលឱ្យមានការគិតលើផ្លូវអវិជ្ជមានរបស់សាធារណៈមតិ។

លោកស្រីបញ្ជាក់ថា ក្រសួងការបរទេសវៀតណាម នឹងពិភាក្សាជាមួយក្រសួងការបរទេសសិង្ហបុរី។

អ្នកនាំពាក្យរូបនេះ អះអាងថា ការចូលរួមចំណែក និងការលះបង់របស់វៀតណាម ក្នុងការជួយប្រជាជនកម្ពុជា ដើម្បីបញ្ចប់របបប្រល័យពូជសាសន៍របស់ខ្មែរក្រហម ដែលនេះគឺជាការពិត ហើយត្រូវបានទទួលស្គាល់យ៉ាងទូលំទូលាយ។

ក្នុងនាមជាសមាជិកអាស៊ាន វៀតណាមនឹងបន្តធ្វើការជាមួយសមាជិកទាំងអស់ ដើម្បីកសាងសហគមន៍ដ៏រឹងមាំមួយ ដែលដើរតួនាទីយ៉ាងសំខាន់ក្នុងតំបន់។ នេះជាការបញ្ជាក់បន្ថែមរបស់លោកស្រី Le Thi Thu Hang។

ប្រតិកម្មនេះ ធ្វើឡើងបន្ទាប់ពីនាយករដ្ឋមន្រ្តីសិង្ហបុរី កាលពីសប្តាហ៍មុន បានបង្ហោះសារតាមហ្វេសប៊ុករបស់លោក ដែលជាខ្លឹមសារក្នុងសំបុត្រផ្ញើទៅកាន់រដ្ឋាភិបាលថៃដើម្បីចែករំលែកទុក្ខចំពោះមរណភាពរបស់អតីតនាយករដ្ឋមន្ត្រីថៃគឺឧត្តមសេនីយ៍ Prem Tinsulanonda។ នៅក្នុងសារនោះ លោកនាយករដ្ឋមន្ត្រីសិង្ហបុរី បានសង្កត់ធ្ងន់អំពីតួនាទីរបស់អតីតនាយករដ្ឋថៃរូបនោះក្នុងការការពារសន្តិសុខតំបន់អាស៊ីអាគ្នេយ៍នៅទសវត្សរ៍៨០និងសន្តិសុខរបស់សមាជិកអាស៊ានទាំង៥ នៅពេលនោះ ដោយទប់ទល់ការវាតទីរបស់ប្រទេសកុម្មុយនិស្តវៀតណាម ដែលបាន«ឈ្លានពាន»ប្រទេសកម្ពុជាដែលស្ថិតក្នុងរបបខ្មែរក្រហម ហើយដែលការណ៍នេះបានរារាំងការទទួលស្គាល់រដ្ឋាភិបាលទីក្រុងភ្នំពេញថ្មីដែលកើតចេញពីអន្តរាគមន៍យោធារបស់វៀតណាមនៅពេលនោះ។

លោក Lee Hsien Loong ថ្លែងក្នុងវេទិកា Shangri-La Dialogue កាលពីថ្ងៃទី៣១ ខែឧសភា ឆ្នាំ២០១៩ (រូបថត៖ AFP)

VOA បានដកស្រង់សម្តីលោក Lee Hsien Loong ដែលបានថ្លែងសុន្ទរកថាក្នុងពិធីបើកវេទិកា Shangri-La Dialogue ដែលជាកិច្ចប្រជុំកំពូលសន្តិសុខទ្វីបអាស៊ី កាលពីយប់ថ្ងៃទី៣១ ខែឧសភាថា៖ «បន្ទាប់ពីសង្រ្គាមត្រជាក់បានបញ្ចប់ សហរដ្ឋអាមេរិកបានក្លាយជាប្រទេសមហាអំណាចតែមួយគត់។ អាស៊ីអាគ្នេយ៍បានចូលទៅក្នុងដំណាក់កាលថ្មីមួយ។ សង្រ្គាមឥណ្ឌូចិនបានបញ្ចប់ទៅ ហើយប្រទេសកុម្មុយនីស្តនានា[នៅឥណ្ឌូចិន]បានបើកចំហនយោបាយជាងមុន។ ប៉ុន្មានឆ្នាំមុននោះ ប្រទេសវៀតណាមបានឈ្លានពានកម្ពុជា ហើយក្លាយជាការគំរាមកំហែងយ៉ាងខ្លាំងដល់ប្រទេសជិតខាងខ្លួនដែលមិនមែនកុម្មុយនីស្ត។ ប៉ុន្តែឥឡូវនេះ វៀតណាមបានចូលជាសមាជិកអាស៊ាន ដោយរួមទាំង កម្ពុជា ឡាវ និងមីយ៉ាន់ម៉ាផងដែរ។ នេះជាករណីនៃការប្រែក្លាយសង្រ្គាមឲ្យទៅជាសន្តិភាព»។

ជាមួយគ្នានេះ មន្រ្តីជាន់ខ្ពស់របស់កម្ពុជា ក៏បានបញ្ចេញប្រតិកម្មចំពោះការលើកឡើងរបស់លោកនាយករដ្ឋមន្រ្តីសិង្ហបុរី ខាងលើនេះផងដែរ។

សម្តេច ទៀ បាញ់ ឧបនាយករដ្ឋមន្រ្តី រដ្ឋមន្ត្រីការពារជាតិកម្ពុជា ដែលទើបត្រឡប់មកពីកិច្ចប្រជុំ Shangri-La កាលពីយប់ថ្ងៃច័ន្ទ បានបញ្ជាក់ប្រាប់ VOA នៅរសៀលថ្ងៃអង្គារថា ការលើកឡើងដោយប្រើពាក្យ«ការឈ្លានពានរបស់វៀតណាម»មិន«យុត្តិធម៌»ចំពោះកងទ័ពស្ម័គ្រចិត្តវៀតណាមក៏ដូចជាពលរដ្ឋកម្ពុជាដែលរងគ្រោះដោយរបបខ្មែរក្រហមនោះទេ។ សម្តេចបានបញ្ជាក់ថា វាជាការស្នើសុំរបស់កម្ពុជាដើម្បីឲ្យភាគីវៀតណាមមកជួយ«រំដោះ»កម្ពុជាពីរបបប្រល័យពូជសាសន៍។

សម្តេច ទៀ បាញ់ ថ្លែងនាពេលកន្លងមក

រដ្ឋមន្ត្រីការពារជាតិរូបនេះបញ្ជាក់ថា នៅក្នុងអំឡុងកិច្ចប្រជុំ Shangri-La Dialogue នៅសិង្ហបុរីកាលពីចុងសប្តាហ៍កន្លងទៅ សម្តេចបានលើកចំណុចអាក់អន់ចិត្តបន្តិចបន្តួចរបស់ភាគីកម្ពុជានេះ ទៅជម្រាបជូនរដ្ឋមន្ត្រីការពារជាតិសិង្ហបុរី Ng Eng Hen រួចហើយ។

«យើងបញ្ជាក់ឲ្យគាត់ថា ពាក្យនោះគឺមិនត្រឹមត្រូវទេ។ ដូច្នេះគាត់ចង់កែតម្រូវរបៀបណា អានេះគឺជាសិទ្ធិរបស់គាត់ទេ។ យើងក៏មិនហ៊ានទៅផ្ទៀងផ្ទាត់ ឬក៏ទៅបញ្ជាគេថា អញ្ចុះអញ្ចេះនោះ យើងអត់មានទេ»។

ទោះជាយ៉ាងណា សម្តេច ទៀ បាញ់ មិនរំពឹងថា ការប្រើពាក្យរបស់នាយករដ្ឋមន្ត្រីសិង្ហបុរីថា «វៀតណាមឈ្លានពាន» នេះ នឹងប៉ះពាល់អ្វីធ្ងន់ធ្ងរដល់ទំនាក់ទំនងកម្ពុជាជាមួយសិង្ហបុរី ឬសមាជិកអាស៊ានទេ ដោយសម្តេចថា ការថ្លែងនេះគឺជាការថ្លែងជាទូទៅប៉ុណ្ណោះ ហើយវាជាការយល់ច្រឡំអំពីប្រវត្តិសាស្ត្រ។

លោកសុខ ឥសាន អ្នកនាំពាក្យគណបក្សប្រជាជនកម្ពុជា ថ្លែងប្រាប់ VOA ថា ក្នុងនាមជាជនរងគ្រោះម្នាក់នៃរបបខ្មែរក្រហមម្នាក់ លោកយល់ស្របនឹងទស្សនៈថា ការជជែកអំពីបរិបទភូមិសាស្ត្រនយោបាយនៅពេលនោះមិនត្រូវមើលរំលងប្រជាជនកម្ពុជាជាច្រើនលាននាក់ដែលរងគ្រោះដោយរបបនោះ ហើយតាមទស្សនៈផ្ទាល់របស់លោក អន្តរាគមន៍របស់វៀតណាមជាការ«រំដោះ»។

ប៉ុន្តែអ្នកនាំពាក្យគណបក្សកាន់អំណាចរូបនេះ បានបន្ថយទម្ងន់នៃប្រតិកម្មរបស់កម្ពុជាចំពោះទំនាក់ទំនងការទូតរវាងកម្ពុជានិងសិង្ហបុរី ដោយលោកបញ្ជាក់ថា៖

«គាត់និយាយតាំងឆ្នាំ[១៩]៧៩។ លោក Lee Hsien Loong មានជួបប្រទះនឹងរបបប្រល័យពូជសាសន៍ជិតអស់ជីវិតដូចយើងខ្ញុំឯណា? អ៊ីចឹងគាត់និយាយមួយបែបរបស់គាត់។ អាហ្នឹងជារឿងគាត់។ យើងអត់មានថ្នាំងថ្នាក់អីទេ»។

លោក សុខ ឥសាន បន្ថែមថា ការវិនិច្ឆ័យអំពីភាពខុសត្រូវនៃការប្រើពាក្យប្រវត្តិសាស្ត្រនេះគឺទីបំផុតអាស្រ័យលើប្រជាជន៖

«យើងថាខុសក៏អត់ថាខុស។ យើងថាត្រូវក៏អត់ថាត្រូវដែរ។ ស្រេចតែលើការវិនិច្ឆ័យរបស់ប្រជាជនគាត់ ឬមួយក៏ប្រជាជននៅអាស៊ីអាគ្នេយ៍ ឬមួយក៏ប្រជាជនកម្ពុជាដែលឲ្យតម្លៃថា គាត់និយាយត្រូវ ឬខុស»៕

ប្រភព៖ Vietnam Express | VOA News ប្រែសម្រួល៖ សំភី