គណៈប្រតិភូ EU មកកម្ពុជា មិនមែនក្នុងបេសកកម្ម EBA នោះទេ

2019-06-06 06:50:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគ្គលេខាធិការរង នៃមន្ទីរការបរទេសសហភាពអ៊ឺរ៉ុប លោក Jean-Christophe Belliard បានដឹកនាំគណៈប្រតិភូជួបពិភាក្សាការងារជាមួយលោក ប្រាក់ សុខុន ឧបនាយករដ្ឋមន្រ្តី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី០៦ ខែមិថុនា ឆ្នាំ២០១៩ នៅទីស្តីការក្រសួងការបរទេស។

លោក Jean-Christophe Belliard បានថ្លែងថា លោករីករាយដែលបានមកដល់កម្ពុជា ដោយលោកបញ្ជាក់ថា លោកមកកម្ពុជានេះ មិនមែនក្នុងបេសកកម្ម EBA នោះទេ ហើយលោកមកនេះ គឺស្ថានទូតបារាំងបានអញ្ជើញឱ្យមកចូលរួមសន្និសីទមួយនៅក្នុងស្ថានទូតបារាំងនៅភ្នំពេញ ហើយលោកនឹងថ្លែងសុន្ទរកថាអំពីទំនាក់ទំនងរវាងសហគមន៍អឺរ៉ុប និងអាស៊ាន។ នេះបើតាមលោក កេត សោផាន់ អ្នកនាំពាក្យក្រសួងការបរទេសកម្ពុជា បានថ្លែងប្រាប់ក្រុមអ្នកកាសែតក្រោយជំនួបពិភាក្សានេះ។

លោកឧបនាយករដ្ឋមន្ត្រី ប្រាក់ សុខុន សង្ឃឹមថា អគ្គលេខាធិការរង នៃមន្ទីរការបរទេសសហភាពអ៊ឺរ៉ុប រួមទាំងសហការី មកកម្ពុជាលើកដំបូង ពិតជាបានឃើញនូវអ្វីដែលជាក់ស្តែងនៅលើទីតាំង ខុសពីអ្វីដែលជាព័ត៌មានមិនមែនជាការពិតនៅក្នុងបណ្តាញសារព័ត៌មានមួយចំនួនបានផ្សាយ ហើយនេះ គឺជាបេសកម្មក្នុងការកសាងទំនុកចិត្តរវាងភាគីទាំងពីរ កម្ពុជា និងសហគមន៍អឺរ៉ុប។

លោកបានថ្លែងអំណរគុណសហគមន៍អឺរ៉ុបដែលបានផ្តល់ជំនួយដល់កម្ពុជាលើវិស័យជាច្រើន ក្នុងរយៈពេលជាង ២០ឆ្នាំកន្លងមកនេះ។ លោកបានបន្តថា កម្ពុជាបានខិតខំត្រៀមនឹងរៀបចំយ៉ាងខ្លាំងជាមួយក្រសួងពាក់ព័ន្ធ សភា និងសង្គមស៊ីវិល រួមទាំងផ្នែកឯកជន ដើម្បីរៀបចំឲ្យបានជោគជ័យនៅកិច្ចប្រជុំកំពូលអាស៊ីអឺរ៉ុបនៅកម្ពុជា នៅឆ្នាំ២០២០។

អ្នកនាំពាក្យក្រសួងការបរទេសបន្តថា ការពិភាក្សារវាងភាគីទាំងពីរបានឯកភាពគ្នាលើគោលការណ៍ធំៗ គឺភាគីទាំងពីរនឹងបន្តកិច្ចសន្ទនា ដើម្បីរកដំណោះស្រាយនៅក្នុងការរក្សា EBA ជូនកម្ពុជាបន្តទៀត និងគោរពគ្នាទៅវិញទៅមក៕

អត្ថបទ៖ សោភា