សម្តេច ហ៊ុន សែន៖ សកល​លោក​កំពុង​ប្រឈមមុខនឹង​ព័ត៌មាន​ក្លែង​បន្លំ ញុះញង់ ជេរប្រមាថ និង​រំលោភ​សិទ្ធិ​បុគ្គល

  • 2019-06-12 04:42:28
  • ចំនួនមតិ 0 | ចំនួនចែករំលែក 0

ចន្លោះមិនឃើញ


សម្តេច​នាយក​រដ្ឋមន្រ្តី ហ៊ុន សែន បាន​ថ្លែង​ថា បច្ចេកវិទ្យា​ឌីជីថល​នៃ​ប្រព័ន្ធ​ផ្សព្វផ្សាយ​ព័ត៌មាន បាន​ផ្តល់​គុណ​វិបត្តិ​ផ្សេងៗ ដែល​ធ្វើ​ឱ្យ​សកល​លោក​កំពុង​ប្រឈម​នឹង​ព័ត៌មាន​ក្លែង​បន្លំ ការ​ញុះញង់​បញ្ឆេះ​កំហឹង ការ​ជេរ​ប្រមាថ​ដោយ​ការ​ស្អប់ខ្ពើម និង​ឧក្រិដ្ឋកម្ម​ព័ត៌មាន​វិទ្យា​ដូចជា ការ​ហែកចូល​បំផ្លាញ​ឯកសារ​សាធារណៈ ការ​ជំរិត​ទារ​ប្រាក់​តាម​ប្រព័ន្ធ​អនឡាញ ការ​រំលោភ​លើ​សិទ្ធិ​បុគ្គល​ឯកជន​ជាដើម ហើយ​វា​បាន​នឹង​កំពុង​គំរាម​កំហែង​ដល់​សន្តិសុខ​ទាំង​នៅក្នុង​តំបន់ និង​សកល​លោក​ទាំងមូល។

ការ​ថ្លែង​ខាងលើ​នេះ​ក្នុង​ពេល​ដែល​សម្តេច ហ៊ុន សែន បាន​អញ្ជើញ​ជាអធិបតី​បើក​ជាផ្លូវការ​នូវ​សន្និសីទ​កំពូល​សារព័ត៌មានអាស៊ី លើកទី១៦ ដែលប្រារព្ធ​ធ្វើឡើង​នាព្រឹក​ថ្ងៃទី១២ ខែមិថុនា ឆ្នាំ​២០១៩ នៅ​សណ្ឋាគារ​សុខា ក្នុង​ខេត្តសៀមរាប។

សម្តេច​បន្ត​ថា៖ «ដូចនេះ​តម្រូវ​ឱ្យ​ភាគី​ពាក់ព័ន្ធ​បង្កើន នូវ​កិច្ច​សហប្រតិបត្តិការ​ឱ្យកាន់តែ​ជិត​ស្និទ្ធ​ថែមទៀត​ទាំង​ក្នុង​ក្របខណ្ឌ​ទ្វេភាគី ក្របខណ្ឌ​ក្នុងតំបន់ និង​សកល​លោក ដើម្បី​ប្រយុទ្ធ​ប្រឆាំង​ទៅនឹង​ព័ត៌មាន​ក្លែងបន្លំ និង​ឧក្រិដ្ឋកម្ម​ព័ត៌មាន​វិទ្យា​នេះ»។

ជាមួយគ្នា​នេះ ប្រមុខ​រាជរដ្ឋាភិបាល​កម្ពុជា ក៏បាន​កត់សម្គាល់​ផងដែរ​ថា នៅក្នុង​កិច្ចប្រជុំ​កំពូល​អាស៊ី-អឺរ៉ុប នៅទីក្រុងប្រ៊ុចសែលនាពេលកន្លងទៅថ្មីៗនេះ បណ្តា​ប្រទេស​នៅ​អឺរ៉ុប​ទាំងអស់​ដែល​ឡើង​ថ្លែង​យោបល់​នៅក្នុង​កិច្ច​ប្រជុំ​ពេញ​អង្គ សុទ្ធតែ​លើកឡើង​ពីការ​ព្រួយបារម្ភ​អំពី​ព័ត៌មាន​ក្លែងបន្លំ និង​ឧក្រិដ្ឋកម្ម​ព័ត៌មាន​វិទ្យា។

សូម​ជម្រាប​ថា សន្និសីទ​កំពូល​សារព័ត៌មាន​អាស៊ី លើក​ទី១៦ ដែល​កម្ពុជា​ធ្វើជា​ម្ចាស់ផ្ទះ​នេះ ធ្វើឡើង​ក្រោម​ប្រធាន​បទ «ប្រព័ន្ធ​ផ្សព្វផ្សាយ​ឌីជីថល-អភិវឌ្ឍន៍ទីផ្សារ»។ សន្និសីទ​ថ្ងៃនេះ នឹងជជែក​ពិភាក្សា​ទៅ​លើ​បញ្ហា​ប្រឈម​របស់​ស្ថាប័ន​សារព័ត៌មាន និង​វិស័យ​ព័ត៌មាន​ក្នុង​យុគសម័យ​បច្ចេកវិទ្យា​ទំនើប​នេះ និងការ​ប្រកួត​ប្រជែង​ដ៏ខ្លាំងក្លា​ជាមួយ​បណ្តាញ​សង្គម​នេះ នឹងមាន​អ្នក​ចូលរួម​ជាថ្នាក់​ដឹកនាំ និង​តំណាង​ស្ថាប័ន​រដ្ឋាភិបាល ស្ថាប័ន​សារព័ត៌មាន ព្រមទាំង​អ្នក​សារព័ត៌មាន​ជាតិ និង​អន្តរ​ជាតិ​ប្រមាណ ៥០០​នាក់ មកពី​បណ្ដា​ប្រទេស​ជាង​៤០ នៅក្នុង​តំបន់ និង​លើពិភពលោក៕

អត្ថបទ៖ សំភី

អត្ថបទថ្មី
;