កម្ពុជា-ហុងគ្រី ឯកភាពបើកស្ថានទូតក្នុងប្រទេសទាំង២ឡើងវិញ

2019-06-14 06:28:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន នាយករដ្ឋមន្រ្តីកម្ពុជា និងលោក Viktor Orban នាយករដ្ឋមន្រ្តីហុងគ្រី បានឯកភាពគ្នាដែរថា នៅក្នុងខួប ៦៥ឆ្នាំនៃទំនាក់ទំនងការទូតរវាងប្រទេសទាំងពីរ នៅឆ្នាំ២០២១ កម្ពុជានឹងបើកស្ថានទូតរបស់ខ្លួននៅទីក្រុងប៊ុយដាប៉េស ឯហុងគ្រីក៏នឹងបើកស្ថានទូតរបស់ខ្លួននៅរាជធានីភ្នំពេញដូចគ្នាដែរ។ ការឯកភាពនេះ ធ្វើឡើងក្នុងជំនួបពិភាក្សាទ្វេភាគីកាលពីថ្ងៃទី១៣ ខែមិថុនា ឆ្នាំ២០១៩ នៅប្រទេសហុងគ្រី។

រូបថត៖ ហ្វេសប៊ុកសម្តេច ហ៊ុន សែន

សម្តេចតេជោ បានមានប្រសាសន៍ដែរថា បើទោះបីជាកន្លងមកប្រទេសទាំងពីរធ្លាប់បើកស្ថានទូត ក្នុងប្រទេសផងខ្លួនក៏ពិតមែន ប៉ុន្តែប្រទេសទាំងពីរបានបិទស្ថានទូតរៀងៗខ្លួន។ តាមរយៈដំណើរទស្សនកិច្ចផ្លូវការ នៅប្រទេសហុងគ្រីនៅពេលនេះ សម្តេចចង់ឃើញប្រទេសទាំងពីរ ធ្វើការបើកស្ថានទូតជាថ្មីឡើងវិញ ដើម្បីជួយគ្នាទៅវិញទៅមក ពិសេសបង្កើនកិច្ចសហប្រតិបត្តិការសម្រាប់ប្រទេសទាំងពីរ។

សម្តេច ហ៊ុន សែន ក៏បានស្នើឲ្យមានការជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងទេសចរណ៍ សម្រាប់ប្រទេសទាំងពីរឲ្យកាន់តែមានទំហំធំឡើងថែមទៀត។ ជាមួយគ្នានេះ សម្តេចបានគោរពអញ្ជើញលោកនាយករដ្ឋមន្រ្តីហុងគ្រី មកបំពេញទស្សនកិច្ចផ្លូវការនៅកម្ពុជា ស្របពេលដែលកម្ពុជាធ្វើជាម្ចាស់ផ្ទះ នៃកិច្ចប្រជុំកំពូលអាស៊ឹមនៅឆ្នាំ២០២០។

សម្តេចក៏បានស្នើឲ្យហុងគ្រី ជួយជួសជុលប្រាសាទកោះកេរិ៍ ជាមួយនឹងបទពិសោធន៍ដែលហុងគ្រីធ្លាប់អភិរក្សតំបន់ប្រវត្តិសាស្រ្តបុរាណរបស់ខ្លួន។

សម្តេចក៏បានសន្យាថា នឹងអញ្ជើញចូលរួមក្នុងកិច្ចប្រជុំស្តីពីបញ្ហាទឹក ក្នុងប្រទេសហុងគ្រីនៅពេលខាងមុខផងដែរ។

ជាការឆ្លើយតប លោកនាយករដ្ឋមន្រ្តីហុងគ្រី បានទទួលយកសំណើ នៃការអញ្ជើញបំពេញទស្សនកិច្ចផ្លូវការ និងការអញ្ជើញចូលរួមកិច្ចប្រជុំកំពូលអាស៊ឹម នៅពេលខាងមុខ៕

អត្ថបទ៖ សំភី