នាយករដ្ឋមន្រ្តីកម្ពុជា ស្នើឱ្យចិនជួយបណ្តុះបណ្តាលលើវិស័យវិទ្យាសាស្រ្ត និងបច្ចេកវិទ្យា

2019-06-19 06:57:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេចនាយករដ្ឋមន្រ្តី ហ៊ុន សែន បានស្នើសុំឲ្យភាគីចិនជួយសហការបណ្ដុះបណ្ដាលធនធានមនុស្ស និងសហការជាមួយនឹងរាជបណ្ឌិត្យសភាកម្ពុជា ក្រសួងអប់រំ យុវជន និងកីឡា ក៏ដូចជាក្រសួងការងារ និងបណ្ដុះបណ្ដាលវិជ្ជាជីវៈកម្ពុជាផងដែរ ដើម្បីជំរុញវិស័យនេះ ឱ្យកាន់តែរីកចម្រើនទៅមុខ។ សម្តេចស្នើដូច្នេះ ក្នុងជំនួបជាមួយលោក Wang Gang អនុប្រធានសភាប្រឹក្សាប្រជាជនចិន និងជាអតីតរដ្ឋមន្រ្តីក្រសួងវិទ្យាសាស្រ្ត និងបច្ចេកវិទ្យាចិន នាព្រឹកថ្ងៃទី១៩ ខែមិថុនា ឆ្នាំ២០១៩ នៅវិមានសន្តិភាព។

រូបថត៖ ហ្វេសប៊ុកសម្តេច ហ៊ុន សែន

ក្នុងជំនួបនេះ លោក Wang Gang បានជម្រាបជូនសម្តេចថា នេះជាលើកទី១ហើយ ដែលលោកបានមកកាន់ប្រទេសកម្ពុជា។ ដំណើរទស្សនកិច្ចរបស់លោកមកពេលនេះ គឺមានគោលបំណងសំខាន់២៖ ទី១គឺដើម្បីចូលជួបសម្តែងការគួរសមជូនចំពោះសម្ដេចតេជោនាយករដ្ឋមន្រ្តី និងទី២ គឺដើម្បីពង្រឹងនូវកិច្ចសហប្រតិបត្តិការរវាងប្រទេសទាំងពីរ ជាពិសេសលើវិស័យវិទ្យាសាស្ត្រ និងបច្ចេកវិទ្យា។

ជាការឆ្លើយតបសម្ដេច ហ៊ុន សែន បានមានប្រសាសន៍ថា កិច្ចសហប្រតិបត្តិការលើវិស័យវិទ្យាសាស្ត្រ និងបច្ចេកវិទ្យា គឺចាំបាច់ត្រូវការធនធានមនុស្ស ការស្រាវជ្រាវ និងជំរុញការអភិវឌ្ឍក្នុងយុគសម័យឌីជីថល ឬក្នុងសម័យបដិវត្តន៍ឧស្សាហកម្មទី៤នេះ ដែលចាំបាច់ណាស់ត្រូវមានការសិក្សាស្រាវជ្រាវ។

សម្តេចបន្តថា សម្រាប់ប្រទេសកម្ពុជា ក៏បានប្រើប្រាស់បច្ចេកវិទ្យា និងវិទ្យាសាស្ត្រនេះផងដែរ ក្នុងន័យនេះ កម្ពុជាកំពុងតែតម្រង់ទិសរបស់ខ្លួនដើម្បីធ្វើយ៉ាងណាឲ្យសមស្របទៅតាមចរន្តនៃយុគសម័យឌីជីថល និងបដិវត្តន៍ឧស្សាហកម្មទី៤ ដែលត្រូវការបណ្ដុះបណ្ដាលធនធានមនុស្ស ឱ្យបានកាន់តែច្រើនលើវិស័យនេះ៕

អត្ថបទ៖ សំភី