បាក់រលំអគារនៅខេត្តព្រះសីហនុ៖ គ្រួសារសពទទួលបានថវិកាពី ៦ ទៅ ៧ម៉ឺនដុល្លារ

2019-06-25 02:01:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដោយថវិកាឧបត្ថម្ភសម្រាប់ជនរងគ្រោះក្នុងឧបទ្ទហេតុបាក់រលំអគារនៅខេត្តព្រះសីហនុ ដែលបានទទួលពីសប្បុរសជននានាមានចំនួនច្រើនគួរសមដែរនោះ គឺក្នុងគ្រួសារសពនីមួយៗនឹងទទួលបានរវាងពី ៦ម៉ឺន ទៅ៧ម៉ឺនដុល្លារ។ ថវិកាទាំងនេះ នឹងបញ្ចូលទៅក្នុងសៀវភៅធនាគារ ហើយនឹងប្រគល់ជូនទៅក្រុមគ្រួសារនៅពេលដ៏ខ្លីខាងមុខ។ នេះបើតាមការបង្ហោះនៅលើទំព័រហ្វេសប៊ុកសម្តេច ហ៊ុន សែន កាលពីយប់មិញ។

រូបថត៖ ហ្វេសប៊ុកសម្តេច ហ៊ុន សែន

សូមជម្រាបថា កាលពីថ្ងៃទី ២៤ ខែមិថុនាម្សិលមិញនេះ សម្តេច ហ៊ុន សែន បានអញ្ជើញចុះទៅជួបជនរងគ្រោះដែលត្រូវសង្រ្គោះជីវិតបានពីគំនរដែក និងផ្ទាំងបេតុង ដែលបានបាក់ធ្លាក់សង្កត់ពីលើ នៅក្នុងពេទ្យបង្អែកក្រុងព្រះសីហនុ។

ទំព័រហ្វេសប៊ុកដដែលបន្តថា៖

«ទន្ទឹមនឹងភាពក្តុកក្តួល និងខ្លោចផ្សារ សម្តេចនាយករដ្ឋមន្រ្តី មានក្តីរំភើបក្រៃលែងដែលបានមកឃើញកូនក្មួយមួយចំនួនដែលត្រូវបានសង្រ្គោះយកចេញពីគំនរអគារ៧ជាន់ ដែលបានបាក់ធ្លាក់សង្កត់ពីលើកាលពីថ្ងៃទី ២២ មិថុនាកន្លងមកនេះ។ ក្មួយៗមានសំណាង អាយុថ្លៃណាស់ ដែលបានរួចផុតពីគ្រោះថ្នាក់ដល់ជីវិត»។

«ទន្ទឹមនឹងនោះដែរ សម្តេចតេជោ បានយកថវិកាដែលទទួលបានពីសប្បុរសជននានាដែលបានជួយឧបត្ថម្ភដល់កូនក្មួយរងបួសទាំងអស់ ដែលក្នុងម្នាក់ៗទទួលបានថវិកា១ម៉ឺនដុល្លារអាមេរិក។ ចំពោះកូនក្មួយ២នាក់ដែលបានសង្រ្គោះក្រោយគេនៅសៀលថ្ងៃនេះ គឺ២នាក់នេះបានទទួលថវិកាឧបត្ថម្ភ ៣ម៉ឺនដុល្លារអាមេរិក»។

យោងតាមសេចក្តីប្រកាសព័ត៌មានរបស់រដ្ឋបាលខេត្តព្រះសីហនុ ឱ្យដឹងថា ប្រតិបត្តិការនៃការរុករកជនរងគ្រោះនៅក្រោមគំនរបាក់បែកនៃអគាររលំ រយៈពេល២ថ្ងៃកន្លះ ចាប់ពីថ្ងៃទី២២ ដល់ថ្ងៃទី២៤ ខែមិថុនា ឆ្នាំ២០១៩ ត្រូវបានបិទបញ្ចប់ជាស្ថាពរ ត្រឹមវេលាម៉ោង ៧កន្លះយប់ថ្ងៃទី២៤ ខែមិថុនា ឆ្នាំ២០១៩។ ក្នុងនោះជនរងគ្រោះដែលក្រុមការងារបានជួយសង្គ្រោះមានចំនួនសរុប ៥៤នាក់ (ស្លាប់ ២៨នាក់ ស្រី៤នាក់ និងរបួស ២៦នាក់ ស្រី២នាក់)៕

អត្ថបទ៖ សំភី