រដ្ឋមន្រ្តីកសិកម្ម ស្នើឱ្យក្រុមហ៊ុនវៀតណាម ពង្រីកការវិនិយោគនៅកម្ពុជា បង្កើនផលិតកម្មជ្រូកសាច់ក្នុងស្រុក

2019-06-26 03:52:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានស្នើឲ្យក្រុមហ៊ុនស៊ីភីវៀតណាម ពិចារណាពង្រីកការវិនិយោគមកកម្ពុជា ដោយសហការជាមួយក្រុមហ៊ុនស៊ីភីកម្ពុជា ដើម្បីបង្កើនផលិតកម្មជ្រូកសាច់ក្នុងស្រុកធានាដល់ចំនួនផ្គត់ផ្គង់ឲ្យបានគ្រប់គ្រាន់ ធានាគុណភាព និងសុវត្ថិភាពសាច់គ្មានជំងឺឆ្លង ព្រមទាំងជួយបង្កើតការងារជូនប្រជាពលរដ្ឋ និងជាពិសេសប្រើប្រាស់វត្ថុធាតុដើមក្នុងស្រុកឲ្យអស់លទ្ធភាពផងដែរ។

សំណើខាងលើនេះ ធ្វើឡើងក្នុងជំនួបរវាងលោក វេង សាខុន និងគណៈប្រតិភូក្រុមហ៊ុនស៊ីភីវៀតណាម ដឹកនាំដោយលោក ឡេ ស៊ឹងវួយ កាលពីថ្ងៃទី២៤ ខែមិថុនា ឆ្នាំ២០១៩ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ក្នុងឱកាសនេះ លោករដ្ឋមន្ត្រីបានវាយតម្លៃខ្ពស់ចំពោះសមិទ្ធផលដែលក្រុមហ៊ុនស៊ីភីវៀតណាមសម្រេចបាននាពេលកន្លងមក ទាំងការងារផលិតកម្ម និងបសុព្យាបាល និងជាពិសេសថ្មីៗនេះ បានទប់ស្កាត់ការរាលឆ្លងជំងឺប៉េស្តជ្រូកអាហ្វ្រិកក្នុងកសិដ្ឋានរបស់ខ្លួនបានយ៉ាងល្អប្រសើរ។ មេរៀន និងបទពិសោធន៍ដ៏ល្អៗទាំងអស់នេះ កម្ពុជានឹងរៀនសូត្រតាម ដើម្បីជាទុនក្នុងការលើកតម្កើងផ្នែកបច្ចេកទេស ទាំងការងារផលិតកម្ម និងបសុព្យាបាល ជាពិសេសយន្តការនៃការទប់ស្កាត់ និងលុបបំបាត់ជំងឺប៉េស្តជ្រូកអាហ្វ្រិកដ៏កាចសាហាវនេះ។

កិច្ចប្រជុំនេះ ភាគីទាំងពីរបានឯកភាពឲ្យអគ្គនាយកដ្ឋានសុខភាពសត្វ និងផលិតកម្មសត្វ ទៅបំពេញទស្សនកិច្ចជាផ្លូវការនៅក្រុមហ៊ុនស៊ីភីវៀតណាម ដើម្បីផ្លាស់ប្តូរបទពិសោធន៍ និងស្វែងយល់បន្ថែមពីការងារបច្ចេកទេសចិញ្ចឹម ការផលិតចំណី និងជាពិសេសយន្តការនៃការការពារ និងទប់ស្កាត់ជំងឺប៉េស្តជ្រូកអាហ្វ្រិកដែលក្រុមហ៊ុនបានអនុវត្តនាពេលកន្លងមក ហើយទទួលបានជោគជ័យ៕

អត្ថបទ និងរូបថត៖ ក្រសួងកសិកម្ម

អត្ថបទ៖ សំភី