គ្រាន់តែ១យប់ សម្តេច ស ខេង ទទួលបានព័ត៌មានសំណង់អត់ច្បាប់ដល់ទៅ ៥កន្លែងនៅខេត្តព្រះសីហនុ

2019-06-26 06:18:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងបញ្ជាក់ថា គណៈកម្មការពិសេស បានចុះទៅត្រួតពិនិត្យឡើងវិញការដ្ឋានសំណង់ទាំងអស់ ទាំងសំណង់ដែលបានសាងសង់រួចហើយ កំពុងដំណើរការអាជីវកម្ម និងសំណង់ដែលកំពុងដំណើរការសាងសង់នៅខេត្តព្រះសីហនុ។ ក្នុងនោះគ្រាន់តែ១យប់ សម្តេចទទួលបានព័ត៌មានបឋមថា មានសំណង់អត់ច្បាប់ដល់ទៅ ៥កន្លែងទៅហើយ។ សម្តេចថ្លែងទៅកាន់អ្នកកាសែតដូច្នេះ ក្រោយធ្វើពិធីដុតបំផ្លាញចោលគ្រឿងញៀន ក្នុងទិវាអន្តរជាតិប្រយុទ្ធប្រឆាំងគ្រឿងញៀន នៅកោះពេជ្រនាព្រឹកថ្ងៃទី២៦ ខែមិថុនា ឆ្នាំ២០១៩។

សម្ដេច ស ខេង បានបញ្ជាក់យ៉ាងដូច្នេះថា៖ «គ្រាន់តែយប់មិញ (២៥ មិថុនា) ខ្ញុំទទួលព័ត៌មានពីឯកឧត្តម ជា សុផារ៉ា មកថា ជាបឋមមានសំណង់៥កន្លែងដែលកំពុងសាងសង់អត់មានច្បាប់ទាំងអស់។ ដូច្នេះនេះជាហានិភ័យមួយធំ ហើយយើងត្រូវធ្វើអាហ្នឹងទាំងអស់ឡើងវិញ។ ហើយខ្ញុំបានដឹកនាំត្រួតពិនិត្យឯកសាររដ្ឋបាលទាំងអស់របស់ខេត្តព្រះសីហនុ តើមានភាពមិនប្រក្រតីអ្វីខ្លះ? ហើយយើងចាត់ការតាមជាក់ស្តែង បើរកឃើញមានមន្ត្រីពាក់ព័ន្ធនឹងចាត់ការហើយ»។

ទាក់ទងបណ្តាអគារសំណង់នៅក្នុងរាជធានីភ្នំពេញ និងតាមបណ្តាខេត្ត សម្តេច ស ខេង បានបញ្ជាក់ថា សម្តេចបញ្ជាឲ្យអគ្គនាយកដ្ឋានរដ្ឋបាលក្រសួងមហាផ្ទៃ ត្រួតពិនិត្យទាំងអស់ និងធ្វើការណែនាំ ហើយជាដំបូងគឺធ្វើនៅខេត្តព្រះសីហនុជាមុន៕

អត្ថបទ៖ សោភា