សម្តេច ហ៊ុន សែន ប្រាប់មេសិទ្ធិមនុស្ស UN ថា «សម័យខ្មែរក្រហម គឺគ្មានសិទ្ធិអ្វីទាំងអស់ ផ្ទុយទាំងស្រុងពីបច្ចុប្បន្ន»

2019-07-05 01:58:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងជំនួបពិភាក្សាការងារជាមួយឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោកស្រី Michelle Machelet កាលពីថ្ងៃទី៤ ខែកក្កដា ឆ្នាំ២០១៩ នៅក្រុងហ្សឺណែវ ប្រទេសស្វីសថា ពាក់ព័ន្ធនឹងសិទ្ធិមនុស្ស ពីដើមបើមើលទៅសម័យខ្មែរក្រហម គឺគ្មានសិទ្ធិអ្វីទាំងអស់ ហើយជាការពិតអ្វីដែលកម្ពុជាមានសព្វថ្ងៃនេះ មានបរិបូរណ៍ដោយសិទ្ធិនៅប្រទេសកម្ពុជា។

រូបថត៖ ហ្វេសប៊ុកសម្តេច ហ៊ុន សែន

នៅក្នុងជំនួបនោះសម្ដេចតេជោ បានមានប្រសាសន៍ថា ឆ្នាំកន្លងទៅនេះ ភាគីទាំង២បានចុះកិច្ចព្រមព្រៀងជាមួយគ្នាបន្ដអាណត្តិនៃការិយាល័យសិទ្ធិមនុស្សនៅប្រទេសកម្ពុជា រយៈពេល២ឆ្នាំ។ ដើម្បីចៀសវាងការបារម្ភ កម្ពុជាចុះហត្ថលេខាទៅលើកិច្ចព្រមព្រៀងនេះ រៀងរាល់ពីរឆ្នាំម្ដង ដើម្បីកុំឲ្យមានកង្វល់។ សម្ដេចក៏បានគូសបញ្ជាក់ផងដែរថា «នៅពេលណាគេនិយាយអំពីសិទ្ធិមនុស្សនៅប្រទេសកម្ពុជា កាន់តែច្រើន សម្ដេចតែងតែស្វាគមន៍អំពីតម្រូវការសិទ្ធិមនុស្សជាមួយយើងតែម្ដង»។

សម្តេច ហ៊ុន សែន បានគូសបញ្ជាក់ផងដែរថា កន្លងមកនេះមានការលាបពណ៌ដល់ប្រទេសកម្ពុជាដោយរូបភាពផ្សេងៗនោះ ប៉ុន្តែអ្វីដែលកម្ពុជានៅតែធ្វើគឺលើការងារអភិវឌ្ឍន៍ ការប្រកាន់ខ្ជាប់លទ្ធិប្រជាធិបតេយ្យ ការការពារ និងលើកតម្កើងសិទ្ធិមនុស្ស។

ពាក់ព័ន្ធនឹងការិយាល័យសិទ្ធិមនុស្ស ក៏ដូចជាពាក់ព័ន្ធនឹងតំណាងរបស់អគ្គលេខាធិការនៃអង្គការសហប្រជាជាតិ ចំណុចនេះសម្ដេចបានគូសបញ្ជាក់ថា មានតែអគ្គលេខាធិការនៃអង្គការសហប្រជាជាតិទេ ដែលមានសិទ្ធិក្នុងការជ្រើសរើសអ្នកណាជាតំណាង ដើម្បីធ្វើការងារជាមួយប្រទេសកម្ពុជាដែលកន្លងមកនេះ ប្រទេសកម្ពុជាបានទទួល ៦នាក់មកហើយ។ ហើយជាធម្មតា ជាទំនៀមទម្លាប់សម្ដេចនាយករដ្ឋមន្ដ្រី បានគូសបញ្ជាក់ថា កម្ពុជាមិនដែលបដិសេធ ឬច្រានចោលនៃការតែងតាំង នៃឯកអគ្គរាជទូត ឬការស្នើសុំតែងតាំង តំណាងរបស់អគ្គលេខាធិការនៃអង្គការសហប្រជាជាតិឡើយ។

មិនត្រឹមតែប៉ុណ្ណោះទេ សម្ដេច ហ៊ុន សែន ក៏បានគូសបញ្ជាក់ដែរកន្លងមកនេះ ក៏មានការស្នើសុំដោយខាងអង្គការសហប្រជាជាតិ ក្នុងការតែងតាំងចៅក្រមសម្រាប់ខ្មែរក្រហមប៉ុណ្ណោះដែរ គឺខាងកម្ពុជា មិនដែលបដិសេធការស្នើតែងតាំងនោះឡើយ។ ប៉ុន្ដែសម្ដេចថា ការស្នើសុំតែងតាំងទាំងអស់នេះ ដោយអគ្គលេខាធិការ ឬមួយក៏ការងារអស់នេះ កម្ពុជាអាចទទួលបាននៅពេលសម្ដេចនៅជានាយករដ្ឋមន្ដ្រី នៃព្រះរាជាណាចក្រកម្ពុជា ហើយបើអ្នកក្រោយទៀតសម្ដេចមិនច្បាស់ទេ។ ចំពោះវេនទី៣នៃការពិនិត្យមើលស្ថានភាពសិទ្ធិមនុស្សនេះ គឺប្រទេសកម្ពុជាបានធ្វើការងារចប់សព្វគ្រប់ហើយ។

ក្នុងឱកាសនៃជំនួបនេះ លោកស្រី Michelle Machelet បានគូសបញ្ជាក់ផងដែរថា របាយការណ៍នៅក្នុងការត្រួតពិនិត្យប្រចាំឆ្នាំនេះ នឹងចេញនៅថ្ងៃទី ៥ កក្កដា ហើយលោកស្រី ក៏បានមានប្រសាសន៍ផងដែរថា បានលឺថា ប្រទេសកម្ពុជាបានទទួលយកនៃអនុសាសន៍ជាច្រើន ដែលបានលើកឡើងកន្លងទៅនេះ។

លោកស្រីបានបន្តថា ការិយាល័យរបស់លោកស្រី ត្រៀមក្នុងការជួយដល់ប្រទេសកម្ពុជាជានិច្ច ជាពិសេសក្នុងការធ្វើការរៀបចំ និងការពិនិត្យមើលឡើងវិញ នៅពាក់កណ្ដាលអាណត្តិនៃរបាយការណ៍នេះ៕

អត្ថបទ៖ សំភី