កីឡាករប្រដាល់មួយរូប ដែលចាន់ សំអាត ចាត់ទុកជាអ្នកមានគុណ គ្មានថ្ងៃបំភ្លេច
- 2019-07-05 07:00:51
- ចំនួនមតិ 0 | ចំនួនចែករំលែក 0
កីឡាករប្រដាល់មួយរូប ដែលចាន់ សំអាត ចាត់ទុកជាអ្នកមានគុណ គ្មានថ្ងៃបំភ្លេច
ចន្លោះមិនឃើញ
«ខុន ស៊ីចាន់ ជាអ្នកមានគុណដំបូងជួយខ្ញុំឲ្យប្រឡូកក្នុងគុនខ្មែរនិងគុនចម្រុះរហូតមានឈ្មោះដូចថ្ងៃនេះ»។ នេះជាការលើកឡើងរបស់អ្នកប្រដាល់ ចាន់ សំអាត។
កីឡាករគុនចម្រុះ ចាន់ សំអាត មិនដែលបំភ្លេចរៀមច្បង ខុន ស៊ីចាន់ ដែលនាំឲ្យរូបគេមានឈ្មោះបោះសំឡេងរហូតដល់បច្ចុប្បន្ននេះទេ។ ខុន ស៊ីចាន់ ជាមនុស្សម្នាក់ដំបូងគេដែលបានមើលឃើញអំពីទេពកោសល្យរបស់ សំអាត កាលពីឆ្នាំ ២០០៨ ពេលមានកម្មវិធីប្រកួតប្រដាល់សប្បាយៗនៃថ្ងៃបុណ្យចូលឆ្នាំខ្មែរនៅវត្ត «ផ្លាត» ខេត្តឧត្ដរមានជ័យ។
តាំងពីពេលនោះមក សំអាត ក៏បានដើរតាមគន្លង ខុន ស៊ីចាន់ ទៅហាត់ជាមួយលោក គ្រូ ឡោ វុទ្ធី នៅក្លិប កងពលធំអន្តរាគមន៍លេខ៣ខេត្តព្រះវិហារ តាមការត្រួសត្រាយផ្លូវ។ មិនត្រឹមតែជួយមិនគិតគុនស្រ័យ ខុន ស៊ីចាន់ ក៏បានសណ្ដោង សំអាត មកឡើងវ៉ៃនៅភ្នំពេញជារឿយៗហើយតម្លៃខ្លួនសម្រាប់កីឡាករថ្មីៗដំបូងបានចន្លោះពី ៨ ទៅ ១០ ម៉ឺនប៉ុណ្ណោះ។ ទោះធ្វើសោហ៊ុយមិនគ្រប់គ្រាន់ ប៉ុន្តែ សិស្សច្បងមកពីស្រុកអន្លង់វែងដូចគ្នាមិនត្រឹមតែជួយយកអាសាទេថែមទាំងជួយទាំងលុយកាក់ ឬ ទិញម្ហូបញុំាទៀតផង។
កីឡាករគុនចម្រុះវ័យ ២៦ ឆ្នាំរូបនេះពិពណ៌នាថា ខុន ស៊ីចាន់ ជាមនុស្សដំបូងណែនាំខ្លួនឲ្យក្លាយជាកីឡាករប្រដាល់។ គេចាំបានពេលនោះ ខុន ស៊ីចាន់ និយាយមកកាន់ខ្លួនថា៖ «អើ ! សំអាត មិនទាន់ចេះក្បាច់ តែមើលទៅវ៉ៃស៊ូគ្រាន់បើ ហើយបើបានហាត់ទៀតបែបល្អ»។
មួយទៀត ចាន់ សំអាត រំលឹករឿងស្រក់ទឹកភ្នែកមិនភ្លេចអនុស្សាវរីយ៍កន្លងទៅជាមួយ ស៊ីចាន់៖ «ខ្ញុំមិនច្បាស់ឆ្នាំ តែមានថ្ងៃមួយនោះ ខ្ញុំបានចូលរួមប្រកួតថ្នាក់ជាតិពេលរសៀល។ ដល់ពេលត្រូវទៅប្រកួតនៅស្ថានីយទូរទស្សន៍បាយ័នផង។ ខ្ញុំវ៉ៃចាញ់ព្រោះវាអស់ស៊ុហ្វរលីង។ បង ខុន ស៊ីចាន់ ស្ដីឲ្យខ្ញុំថា វ៉ៃដូចគ្មានចិត្តស៊ូសោះ។ ខ្ញុំតូចចិត្តពេលចុះលើរេញ ហើយពេលគាត់ឌុបម៉ូតូ ខ្ញុំក៏ស្រក់ទឹកភ្នែកបណ្ដើរពេលកំពុងជិះពីក្រោយគាត់។ នេះរឿងខ្ញុំតូចចិត្តមែនទែន ដែលខ្ញុំចាំមិនភ្លេចជាមួយគាត់»។
យ៉ាងណាក្ដី អ្នកប្រដាល់មកពីស្រុកអន្លង់វែងគូសបញ្ជាក់ថាសិស្សច្បង ខុន ស៊ីចាន់ ត្រូវចាត់ទុកដូចជាបងប្រុសអីចឹងហើយក៏គ្មានការខឹងអ្វីដែរ ព្រោះអ្វីៗដែល ស៊ីចាន់ បានប្រាប់គឺចង់ឲ្យខ្លួនល្អក្នុងវិស័យកីឡាប្រដាល់តែប៉ុណ្ណោះ។ សំអាត តែងតែចងចាំរាល់អំពីល្អរបស់ជួយខ្លួន ដូច ខុន ស៊ីចាន់, គ្រូបង្វឹក ឡោ វុទ្ធី, សពលោកគ្រូម៉ា សេរី និង ភរិយា, គ្រូហ៊ុន ច័ន្ទរាជ្យ, មិត្តរួមក្រុម និងអ្នកជួយជ្រោមជ្រែងជាច្រើនទៀត។
គួរដឹងថា ចាន់ សំអាត ចាប់ផ្ដើមប្រឡូកលើសង្វៀនប្រដាល់ដំបូងនៅឆ្នាំ ២០០៨ បន្ទាប់ពីមានការបង្ហាញផ្លូវរបស់កីឡាករ ខុន ស៊ីចាន់ និងនាំឲ្យទៅស្គាល់ និងហ្វឹកហាត់ជាមួយគ្រូបង្វឹក ឡោ វុទ្វី នៅក្លិបកងពលធំអន្តរាគមន៍លេខ៣ខេត្តព្រះវិហារ។ នៅឆ្នាំ ២០១៣ គេចាប់ផ្ដើមហ្វឹកហាត់ក្បាច់គុនចម្រុះ ពេលកម្មវិធី Khmer Warrior Challenge រៀបឡើងដោយស្ថានីយទូរទស្សន៍ស៊ីធីអិន និង MyTV។ ក្នុងកម្មវិធីនេះ តម្រូវឲ្យស្នាក់នៅ ហូបចុកជុំគ្នា និងហាត់ជុំគ្នាជាមួយគ្រូជាច្រើន មានប្រដាល់សេរី យូដូ និងគុនចម្រុះជាដើម។ រហូតដល់ឆ្នាំ ២០១៤ គេបានស្គាល់គ្រូហ៊ុន ច័នរាជ្យ និងបន្តហ្វឹកហាត់នៅក្លិប Cambodian Top Team ដល់សព្វថ្ងៃ។ ទីបំផុត ចាន់ សំអាត ជាម្ចាស់ខ្សែក្រវាត់ Khmer Warrior Challenge វគ្គ ៣នៅឆ្នាំ ២០១៤។
កីឡាករមកពីខេត្តឧត្តរមានជ័យរូបនេះ ត្រូវបានសង្វៀនលំដាប់អន្តរជាតិ ONE Championship រៀបចំឲ្យចូលរួមប្រកួតសាជាថ្មី ក្នុងកម្មវិធី ONE Warrior Series នាដើមខែ សីហា ឆ្នាំ ២០១៩ ខាងមុខនៅប្រទេសសិង្ហបុរី។ ការឡើងសង្វៀន ONE លើកនេះគឺ ប្រកួតក្នុងប្រភេទទម្ងន់ ពី ៥៦ ទៅ ៦០ គីឡូក្រាម ខុសពីការប្រកួតកន្លងទៅក្នុងប្រភេទទម្ងន់ពី ៦០ ទៅ ៦៥ គីឡូក្រាម។ សូមបញ្ជាក់ថា ៣ប្រកួតនៅ ONE Warrior Series ចាន់ សំអាត ឈ្នះ ១ និងចាញ់ ២៕