វៀតណាម ប្រើវិធីសាស្រ្តមួយបង្កើនចំណូលដើម្បីឆាប់បានសង់ផ្លូវល្បឿនលឿន មកព្រំដែនកម្ពុជា

2019-07-11 02:58:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរក្រុងហូជីមិញ និងខេត្តតៃនិញ គ្រោងបើកឱ្យមានការសាងសង់ផ្សារទំនើប និងមណ្ឌលអាជីវកម្មផ្សេងទៀតនៅតាមបណ្តោយផ្លូវល្បឿនលឿនពី ហូជីមិញ មកម៉ុកបៃ (ព្រំដែនវៀតណាម-កម្ពុជា) ដើម្បីបង្កើនចំណូលសម្រាប់សាងសង់ផ្លូវនេះ។ នេះបើតាមការចុះផ្សាយរបស់ Vietnam News កាលពីថ្ងៃទី១០ ខែកក្កដា ឆ្នាំ២០១៩។

ផ្លូវល្បឿនលឿន នៅភាគខាងត្បូងវៀតណាម (រូបថត៖ VNExpress)

អាជ្ញាធរក្រុងខេត្តទាំង២ បានប្រកាសបើកឱ្យមានការដេញថ្លៃសាងសង់ពីសំណាក់ក្រុមហ៊ុនឯកជន និងផ្តល់សំណងដល់ប្រជាជនដែលរងផលប៉ះពាល់ផងដែរ។

សូមរំលឹកថា កាលពីខែមេសាកន្លងទៅ អគ្គនាយកដ្ឋានផ្លូវថ្នល់វៀតណាម បានបញ្ជូនសំណើនៃការសិក្សាផ្លូវល្បឿនលឿនដែលមានប្រវែង ៥៣,៣គីឡូម៉ែត្រនេះ ទៅកាន់ក្រសួងដឹកជញ្ជូនវៀតណាម។

ការសាងសង់ផ្លូវនេះ នឹងធ្វើឡើងក្រោមទម្រង់ដៃគូរដ្ឋ-ឯកជន។ វានឹងធ្វើឡើងក្នុង ២ដំណាក់កាល ហើយនឹងចំណាយប្រមាណ ៤៥៩,៣៦លានដុល្លារ។ ផ្លូវនេះមាន៤គន្លង (ហើយគ្រោងពង្រីកដល់ ៦-៨គន្លង) ដែលអាចឱ្យយានយន្តអាចបើកបរក្នុងល្បឿនពី ៨០ ទៅ ១២០គីឡូម៉ែត្រក្នុងមួយម៉ោង។

ផ្លូវល្បឿនលឿននេះ នឹងជួយពង្រឹងការតភ្ជាប់តំបន់សេដ្ឋកិច្ចភាគខាងត្បូងវៀតណាម និងច្រករបៀងសេដ្ឋកិច្ច ខាងកើត-ខាងលិច ដែលរួមមាន មីយ៉ាន់ម៉ា ថៃ ឡាវ កម្ពុជា និងវៀតណាម។ វាក៏នឹងតភ្ជាប់បណ្តាញផ្លូវហាយវេអាស៊ាន ពោលគឺផ្លូវល្បឿនលឿន ភ្នំពេញ-បាវិត ដែលស្ថិតក្នុងគម្រោងសាងសង់របស់រាជរដ្ឋាភិបាលកម្ពុជាផងដែរ៕

ប្រភព៖ Vietnam News ប្រែសម្រួល៖ សំភី