លោក គួច ចំរើន ថាបើខេត្តព្រះសីហនុសុទ្ធតែសំរាម គឺគេមិនចង់មកលេងទេ
- 2019-07-13 08:03:36
- ចំនួនមតិ 0 | ចំនួនចែករំលែក 0
លោក គួច ចំរើន ថាបើខេត្តព្រះសីហនុសុទ្ធតែសំរាម គឺគេមិនចង់មកលេងទេ
ចន្លោះមិនឃើញ
លោក គួច ចំរើន អភិបាលខេត្តព្រះសីហនុ បានលើកឡើងថា គេមកទស្សនានៅខេត្តព្រះសីហនុ គឺគេចង់មកយកនូវបរិយាកាសល្អ ស្រូបចូលក្នុងរាងកាយរបស់គេ ហើយនៅទីនេះពោរពេញដោយសំរាម ប្រាកដណាស់អ្នកទេសចរទាំងនោះ គេមិនចង់មកទីនេះទេ។ «ពួកគេនឹងនិយាយមិនល្អពីយើងផងដែរ»។ ការថ្លែងនេះ ក្នុងពិធីបើកយុទ្ធនាការសំអាតសំរាមនៅទូទាំងក្រុងព្រះសីហនុ នាព្រឹកថ្ងៃទី១៣ ខែកក្កដា ឆ្នាំ២០១៩។
លោក គួច ចំរើន បញ្ជាក់ថា សំរាមដែលនៅសេសសល់ក្នុងខេត្តព្រះសីហនុ ពិតជាមានចំនួនយ៉ាងច្រើន។ សំរាមកើនឡើងដោយសារតែមនុស្សជាអ្នកប្រើប្រាស់រយៈពេលកន្លងមក សំរាមពិតជាលើសពីតម្រូវការនៃការដឹកជញ្ជូនចេញ ធ្វើឱ្យសំរាមនៅសេសសល់ជាបន្តបន្ទាប់។
លោកអភិបាលខេត្តបានមានប្រសាសន៍យ៉ាងដូច្នេះថា៖ «ថ្ងៃនេះយើងបង្កើតជាកម្មវិធីប្រមូលសំរាមចេញពីទីក្រុងព្រះសីហនុ បានបែងចែកជាបួនគោលដៅ មានមនុស្សជិត ៥០០០នាក់ និងគ្រឿងចក្រជិត ២០០គ្រឿង ដើម្បីបើកយុទ្ធនាការប្រមូលសំរាមដែលនៅសេសសល់ ដឹកជញ្ជូនទៅកាន់ទីលានចាក់សំរាម ។ យើងបែងចែកជាបួនគោលដៅនេះជាគោលដៅទី១ ចុះទៅតាមសង្កាត់នីមួយៗ ខ្ញុំជឿជាក់ថា លោកអភិបាលក្រុង និងប្រធានមន្ទីរបរិស្ថាន បានរៀបចំបែងចែក ទៅតាមគោលដៅគំនរសំរាមនៅក្នុងក្រុងរបស់យើង មានសម្ភារៈ ឧបករណ៍ផ្សេងៗទៀតដើម្បីសម្អាតសំរាមក្រុងព្រះសីហនុ ។ សំរាមមិនមែនជាករណីដែលគួរស្អប់ខ្ពើមនោះទេ តែអ្នកដែល ប្រើប្រាស់ចោលសំរាមតាមដងផ្លូវសាធារណៈ ទើបជារឿងដែលយើងស្អប់ខ្ពើម»។
លោកបន្តថា បញ្ហាសំរាមកំពុងរីកធំលើសពីសមត្ថភាពក្រុមហ៊ុនដឹកជញ្ជូនចេញ យ៉ាងណាក៏ដោយគឺរួមគ្នាខិតខំគ្រប់គ្រងសំរាមនេះឱ្យបានច្បាស់លាស់ រៀបចំផែនការឱ្យបានគត់មត់ក្នុងការដឹកជញ្ជូនចេញឱ្យបានទាន់ពេលវេលា តាមចំនួនសំរាមដែលជញ្ជូនចេញឱ្យងាយស្រួល ហើយអ្នកពាក់ព័ន្ធបង្កើតសំរាម ត្រូវចូលរួមទុកដាក់សំរាមឱ្យបានត្រឹមត្រូវ និងទៀងទាត់តាមពេលវេលាកំណត់។
«សំរាមធ្វើឲ្យបរិស្ថានមិនស្អាត ធ្វើឱ្យប៉ះពាល់ដល់សោភ័ណភាព សំរាមបង្កគ្រោះថ្នាក់ដល់សុខភាពសាធារណៈរបស់យើងគ្រប់គ្នា ផ្តើមចេញពីបញ្ហានេះ វានឹងក្លាយជាបញ្ហាប្រឈមដល់សុខភាព កើតនូវជំងឺផ្សេងៗ មេរោគផ្សេងៗ គ្រោះថ្នាក់ដល់សុខភាព សំរាមធ្វើឲ្យប៉ះពាល់ដល់ស្ថានភាពសេដ្ឋកិច្ចប្រជាពលរដ្ឋនៅទីនេះផងដែរ ព្រោះថាអ្នកទេសចរទាំងឡាយ អ្នកធ្វើដំណើរទាំងឡាយ អ្នកធ្វើជំនួញទាំងឡាយ គេពិតជាមិនចង់ឱ្យមានផលប៉ះពាល់សុខភាពរបស់គេនោះទេ»។ នេះជាការលើកឡើងបន្ថែមរបស់លោក គួច ចំរើន៕
អត្ថបទ និងរូបថត៖ រដ្ឋបាលខេត្តព្រះសីហនុ