លោក ហ៊ុន ម៉ាណែត៖ យើងរួមគ្នាជាខ្មែរតែមួយកសាងស្រុក និងថែរក្សាសុខសន្តិភាព

2019-07-15 02:10:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហ៊ុន ម៉ាណែត បានថ្លែងថា «យើងត្រូវការប្រជាពលរដ្ឋយើង មិនថាបក្សណាឬបក្សណានោះទេ ឬសាសនានោះទេ គឺស្រលាញ់គ្នា យើងរួមគ្នាជាខ្មែរតែមួយ យើងរួមគ្នាកសាងស្រុកភូមិយើង និងថែរក្សាសុខសន្តិភាព។ នេះគឺជាអ្វីដែលសម្តេចតេជោ ហ៊ុន សែន ប្រមុខរាជរដ្ឋាភិបាលចង់បាន គឺចង់បានសេចក្តីសុខ សេចក្តីសប្បាយរីករាយ និងសន្តិភាព»។

ការថ្លែងខាងលើនេះ ក្នុងពិធីសម្ពោធដាក់ឲ្យប្រើប្រាស់នូវអគារសិក្សា ១ខ្នង ៥បន្ទប់ នៅសាលាបឋមសិក្សាមេមាំង ស្ថិតនៅឃុំល្វា ស្រុកព្រៃឈរ ខេត្តកំពង់ចាម កាលពីព្រឹកថ្ងៃទី១៤ ខែកក្កដា ២០១៩។

លោកបន្តថា ការវិវត្តទៅមុខរបស់ប្រទេសជាតិ និងការថែរក្សាសុខសន្តិភាព ស្ថិរភាពនៅថ្ងៃនេះ គឺបានមកពីការដឹកនាំមាននិរន្តរភាព៤០ឆ្នាំ ព្រោះថាការដឹកនាំខុសធ្វើឲ្យប្រទេសក្រឡាប់ចាក់។ ជាក់ស្ដែងរបបដឹកនាំកាលពីអតីតកាលរួមមានរបបលន់ នល់ របបប៉ុល ពត បានបំផ្លាញខ្ទេច។

លោក ហ៊ុន ម៉ាណែត លើកឡើងថា ទោះបីសប្បុរជនជាខ្មែរទៅនៅបរទេសក៏ដោយ ក៏បេះដូងនៅតែជាខ្មែរ ហើយជួយគៀងគរសប្បុរសជនកសាងសមិទ្ធផលផ្សេងៗ នៅក្នុងដំណាក់កាលប្រទេសមានសុខសន្តិភាព ធ្វើឲ្យប្រជាពលរដ្ឋខ្មែរទាំងក្នុង និងក្រៅប្រទេសមានលទ្ធភាពចូលរួមកសាងសមិទ្ធផល និងជួយស្រុកកំណើត។ នេះហើយ គឺជាគោលនយោបាយឈ្នះ-ឈ្នះរបស់រាជរដ្ឋាភិបាល ធ្វើឲ្យប្រទេសមានសុខសន្តិភាព និងធ្វើឲ្យខ្មែរនៅលើពិភពលោកបានជួយគ្នា រួមគ្នាកសាងសមិទ្ធផលនៅក្នុងស្រុក។ នេះគឺជាមោទនភាពណាស់ដែលខ្មែររួបរួមគ្នា ជួយគ្នា។

រាជរដ្ឋាភិបាលបានខិតខំដោះស្រាយណាស់នៅអ្វីដែលជាតម្រូវការប្រជាជនចង់បាន ខិតខំកសាងសមិទ្ធផលនានា និងបង្កឱកាសសប្បុរសជន អង្គការ សមាគមចូលរួមកសាងសមិទ្ធផលផ្សេងៗរួមមាន មន្ទីរពេទ្យ វត្តអារាម សាលារៀន ដែលអាចជួយដោះស្រាយតម្រូវការប្រជាពលរដ្ឋ និងបង្កលក្ខណៈងាយស្រួលដល់កូនចៅ។ នេះគឺជាគោលគំនិតសំខាន់របស់រាជរដ្ឋាភិបាលក្នុងការយកចិត្តទុកដាក់ចំពោះវិស័យអប់រំ។ អ្នកដែលដើរតួសំខាន់ក្រៅពីរដ្ឋាភិបាលនៅក្នុងវិស័យអប់រំ គឺលោកគ្រូ អ្នកគ្រូ ដែលជួយកសាងប្រព័ន្ធអប់រំនៅកម្ពុជា។

«យើងក្លាយជាប្រទេសកូនខ្លាសេដ្ឋកិច្ចមួយនៅអាស៊ី ដោយសារតែការអភិវឌ្ឍសមត្ថភាពរបស់មន្ត្រីយើង ដោយសារប្រព័ន្ធអប់រំខ្មែរយើង។ ដូច្នេះគុណបំណាច់របស់លោកគ្រូ អ្នកគ្រូគ្រប់ជំនាន់ គឺមានគុណខ្លាំងណាស់ក្នុងអាជីពសំខាន់បំផុតដែលធានានិរន្តភាពនៃការរីកចម្រើន»។ នេះជាការលើកឡើងបន្ថែមរបស់លោក ហ៊ុន ម៉ាណែត៕