រកឃើញផូស៊ីលសត្វសមុទ្រ និងផ្កាថ្មច្រើនប្រភេទ នៅខេត្តបន្ទាយមានជ័យ

2019-07-19 04:30:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមការងារសិក្សាអំពីផូស៊ីលមានលោក លឹម វណ្ណច័ន្ទ អ្នកបុរាណវិទ្យា សហការជាមួយលោក ហ៊ុន សីហា អ្នកស្រាវជ្រាវសត្វ លោក សៀង សុថាន អ្នកធរណីវិទ្យា បានចុះពិនិត្យ ភ្នំមួយចំនួនក្នុងខេត្តបន្ទាយមានជ័យ ក្នុងឆ្នាំ២០១៩នេះ។ ជាលទ្ធផលក្រុមស្រាវជ្រាវបានរកឃើញផូស៊ីលសត្វសមុទ្រ ផ្កាថ្មជាច្រើនប្រភេទ។ ក្នុងនោះប្រភេទមួយចំនួនគឺអាចកំណត់អត្តសញ្ញាណបាន និងខ្លះមិនទាន់អាចកំណត់អត្តសញ្ញាណបាននៅឡើយទេ ដោយទាមទារឱ្យមានការសិក្សាជាបន្តទៅទៀត។ នេះបើតាមការចុះផ្សាយរបស់ក្រសួងបរិស្ថាន កាលពីថ្ងៃទី១៨ ខែកក្កដា ឆ្នាំ២០១៩។

អ្វីជា Crinoid? ក្រសួងបរិស្ថានពន្យល់ថា វាជាប្រភេទសត្វ ដែលស្ថិតនៅក្នុងសាខានៃពពួកផ្កាយសមុទ្រ និងផ្កាថ្ម។ ដើមរបស់វាមានលក្ខណៈជាកង់ៗ មានទំហំតូចៗ រហូតដល់២,៥សង់ទីម៉ែត្រ និងមានផ្កា។ ពូជប្រភេទនេះត្រូវបានរកឃើញនៅប្រទេសកម្ពុជា នៅភ្នំកងវ៉ា ភ្នំបាក់ ភ្នំជញ្ជាំង ភ្នំស្វាយ នៅខេត្តបន្ទាយមានជ័យ។ តាមតារាងនៃGeologic Time Chart ផូស៊ីលគ្រីណូអ៊ីត កើតឡើងនៅក្នុងសម័យបាលេអូសូអ៊ីក។

គួររំលឹកថា កាលពីពេលថ្មីៗនេះ តាមរយៈការស្រាវជ្រាវដោយក្រុមការងារផ្នែកបេតិកភណ្ឌ និងបុរាណវិទ្យា ក្រសួងបរិស្ថាន ដោយសហការជាមួយនឹងមន្ទីរបរិស្ថានខេត្តមណ្ឌលគិរី បានចុះទៅពិនិត្យមើលស្លាកស្នាម និងសំណល់ផូស៊ីល នៅចំណុចភ្នំពីរ ស្ថិតក្នុងភូមិសាស្រ្តស្រុកកោះញែក ក្នុងដែនជម្រកសត្វព្រៃស្រែពក ខេត្តមណ្ឌលគិរី។ ក្នុងនោះ គឺបានរកឃើញវត្តមានបន្សល់ទុកនូវសំណល់ផូស៊ីលសត្វសមុទ្រជាច្រើនប្រភេទនៅក្នុងដែនជម្រកសត្វព្រៃដ៏មានសក្ដានុពលមួយនេះ៕ ចុចអានបន្ថែម៖ រកឃើញផូស៊ីលសមុទ្រ នៅខេត្តមណ្ឌលគិរី

អត្ថបទ និងរូបថត៖ ក្រសួងបរិស្ថាន