ក្រុមគ្រួសារជនរងគ្រោះដោយបាក់អគារនៅខេត្តព្រះសីហនុ ប្តឹងទាមទារសំណងពីក្រុមហ៊ុន

2019-07-26 04:23:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមគ្រួសារជនរងគ្រោះដែលស្លាប់ដោយសារការបាក់អគារនៅខេត្តព្រះសីហនុ បានដាក់ពាក្យបណ្តឹងទៅសាលាដំបូងខេត្តព្រះសីហនុ ប្តឹងទាមទារសំណងពីក្រុមហ៊ុន XI GANG TANG GONG YOU JI HAISAO ។ ការដាក់ពាក្យបណ្តឹងនេះ គឺតាមរយៈក្រុមមេធាវីស្ម័គ្រចិត្តរបស់សម្តេចនាយករដ្ឋមន្ត្រី។

ក្រុមគ្រួសារជនរងគ្រោះដែលប្តឹង គឺមានចំនួន ៧គ្រួសារ មកពីខេត្តព្រៃវែង និងខេត្តកំពង់ចាម រួមមានៈ ១. ឈ្មោះ សុន សុផាត ២. ឈ្មោះ ផឹម អិត ៣. ឈ្មោះ ភួន ផានិត ៤. ឈ្មោះ ឆេង ចំរើន ៥. ខឹម សាខន ៦. ឈ្មោះ យឹម ថេន ៧. ឈ្មោះ ឈុំ ចិនឡាង។

លោក យឹម ប៉ុណ្ណារ៉េត ប្រធានលេខាធិការដ្ឋានរដ្ឋបាលសាលាដំបូងខេត្តព្រះសីហនុ បានបញ្ជាក់ប្រាប់ [ខ្លីៗ] នៅព្រឹកថ្ងៃទី២៦ ខែកក្កដា ឆ្នាំ២០១៩ថា ពិតជាមានក្រុមគ្រួសារជនរងគ្រោះដោយសារការបាក់អគារនៅខេត្តព្រះសីហនុ បានដាក់ពាក្យបណ្តឹងទាមទារសំណងពីក្រុមហ៊ុនពិតប្រាកដមែន ដោយលោកចៅក្រម សុខ ហេង ជាអ្នកកាន់សំណុំរឿងនេះ។ ប៉ុន្តែលោកមិនបានបញ្ជាក់លម្អិតនោះទេ។

គួរបញ្ជាក់ថា អគារកម្ពស់ ៧ជាន់ នៅខេត្តព្រះសីហនុ បានបាក់ស្រុត កាលពីវេលាម៉ោងជិត៥ព្រឹក ថ្ងៃទី២២ ខែមិថុនា ឆ្នាំ២០១៩ បានបណ្តាលឲ្យកម្មករស្លាប់ចំនួន ២៨នាក់ និងរងរបួសចំនួន ២៦នាក់។ សំណង់អគារនេះ មានទំហំទទឹង ១៥ម៉ែត្រ បណ្តោយ ៣០ម៉ែត្រ និងកំពុងដំណើរការសាងសង់បានប្រមាណ ៧០ ទៅ ៨០ភាគរយ។

រដ្ឋបាលខេត្តព្រះសីហនុបានបញ្ជាក់ថា ការដ្ឋានសំណង់នេះ មានម្ចាស់ឈ្មោះ CHEN KHUN ភេទប្រុស អាយុ៣៩ឆ្នាំ បានជួលដីសម្រាប់សាងសង់អគារពីឈ្មោះ ញឹក ហ៊ុយ ភេទប្រុស អាយុ៦៥ឆ្នាំ ជនជាតិខ្មែរ ម៉ៅការសាងសង់ដោយក្រុមហ៊ុនឈ្មោះ XI GANG TANG GONG YOU JI HAISAO មានថៅកែម៉ៅការសាងសង់ឈ្មោះ DENG XING GUI ភេទប្រុស អាយុ៤៨ឆ្នាំ និងអ្នកម៉ៅការបូកជញ្ជាំងអាគារឈ្មោះ AGO YU ភេទប្រុស អាយុ២៩ឆ្នាំ។ បច្ចុប្បន្នអ្នកទាំង៤នាក់នេះ ត្រូវបានឃុំខ្លួននៅក្នុងពន្ធនាគារខេត្តព្រះសីហនុ៕

អត្ថបទ៖ សោភា